ഒന്‍പത് മുതല്‍ പന്ത്രണ്ടാം ക്ലാസ് വരെയുള്ള വിദ്യാര്‍ത്ഥികളുടെ റിപ്പോര്‍ട്ട് കാര്‍ഡില്‍ പുതുമ വരുത്തി എന്‍.സി.ഇ.ആര്‍.ടി. മാര്‍ക്കിനപ്പുറം വിദ്യാര്‍ത്ഥികളുടെ പ്രകടനത്തിനും ഭാവിക്കുള്ള തയ്യാറെടുപ്പുകള്‍ക്കും പ്രാധാന്യം നല്‍കുന്നതാവും റിപ്പോര്‍ട്ട്. എന്‍.സി.ഇ.ആര്‍.ടിക്ക് കീഴിലുള്ള പരഖ് ആണ് പുതിയ ഹോളിസ്റ്റിക് പ്രോഗ്രസ് കാര്‍ഡുകള്‍ തയ്യാറാക്കുന്നത്.
എഴുത്തു പരീക്ഷയ്ക്കും മാര്‍ക്കിനുമപ്പുറം കുട്ടികളില്‍ പ്രായോഗിക അറിവും ക്രിയാത്മക ചിന്തയും വളര്‍ത്തുക എന്ന ലക്ഷ്യത്തോടെയാണ് എന്‍.സി.ഇ.ആര്‍.ടി പുതിയ പ്രോഗ്രസ് കാര്‍ഡുകള്‍ക്ക് രൂപം നല്‍കുന്നത്. ഹോളിസ്റ്റിക് പ്രോഗ്രസീവ് കാര്‍ഡ് എന്ന പേരിലാകും പുതിയ സംവിധാനം. ഇന്റേണല്‍ മാര്‍ക്കിന് പകരം വിദ്യാര്‍ത്ഥികളുടെ ഒരു വര്‍ഷത്തെ അക്കാദമിക പ്രകടനമാകും വിലയിരുത്തുക. ടൈം മാനേജേമെന്റ്, പ്രവേശന പരീക്ഷയ്ക്കുള്ള തയ്യാറെടുപ്പുകള്‍ , നൈപുണ്യങ്ങളിലെ മികവ് എന്നിവയുടെ അടിസ്ഥാനത്തില്‍ വിദ്യാര്‍ത്ഥികള്‍ക്ക് സ്വയം വിലയിരുത്താന്‍ കഴിയുന്ന ഭാഗങ്ങള്‍ റിപ്പോര്‍ട്ട് കാര്‍ഡിലുണ്ടാകും.
സ്‌കൂള്‍ വിദ്യാഭ്യാസത്തിന് ശേഷമുളള പഠനത്തെക്കുറിച്ച് വിദ്യാര്‍ത്ഥികള്‍ക്ക് ചിന്തിച്ച് തുടങ്ങാനും എച്ച്.പി.സി യില്‍ അവസരമുണ്ട്. എന്‍.സി.ഇ.ആര്‍.ടിയുടെ കീഴില്‍ കുട്ടികളുടെ മികവും പഠനരീതികളും പരിശോധിക്കുന്ന ജഅഞഅഗഒ ആണ് സെക്കന്‍ഡറി സ്‌കൂള്‍ തലത്തില്‍ റിപ്പോര്‍ട്ട് കാര്‍ഡുകള്‍ തയ്യാറാക്കുന്നത്.
ഹോളിസ്റ്റിക് പ്രോഗ്രസീവ് കാര്‍ഡ് പാഠ്യപദ്ധതിയില്‍ ഉള്‍പ്പെടുത്തണോ എന്ന് സംസ്ഥാനങ്ങള്‍ക്ക് തീരുമാനിക്കാം. നിലവിലെ അദ്ധ്യയന വര്‍ഷത്തില്‍ എച്ച്.പി.സി നിലവില്‍ വരില്ലെങ്കിലും അധ്യാപകര്‍ക്കും ഉദ്യോഗസ്ഥര്‍ക്കും ഇതിന് വേണ്ട പരിശീലനം നല്‍കും. ബിജെപി ഭരിക്കുന്ന ആറ് സംസ്ഥാനങ്ങളില്‍ ഇക്കൊല്ലം എട്ടാം ക്ലാസ് വരെയുള്ള വിദ്യാര്‍ത്ഥികള്‍ക്ക് പ്രോഗ്രസ് കാര്‍ഡ് നടപ്പിലാക്കുന്നുണ്ട്.
