മോസ്‌കോ ഒരിക്കലും ആണവായുധങ്ങള്‍ ഉപയോഗിക്കില്ലെന്ന് പാശ്ചാത്യ രാജ്യങ്ങള്‍ അനുമാനിക്കുന്നത് തെറ്റാണെന്ന് വ്യക്തമാക്കി റഷ്യന്‍ പ്രസിഡന്റ് വ്ളാഡിമിര്‍ പുടിന്‍. ബുധനാഴ്ച മാധ്യമങ്ങളോട് സംസാരിക്കവെ ആണ് അദ്ദേഹം ഇക്കാര്യം പറഞ്ഞത്.
റഷ്യയുടെ ഉക്രെയിന്‍ അധിനിവേശം 1962 ലെ ക്യൂബന്‍ മിസൈല്‍ പ്രതിസന്ധിക്ക് ശേഷം റഷ്യയും പാശ്ചാത്യ രാജ്യങ്ങളും തമ്മിലുള്ള ബന്ധത്തിലെ ഏറ്റവും മോശമായ തകര്‍ച്ചയില്‍ എത്തിച്ചിരിക്കുകയാണ്. ഈ സാഹചര്യത്തില്‍ ഒരു ആഗോള യുദ്ധത്തിന്റെ അപകടസാധ്യത വര്‍ദ്ധിച്ചുകൊണ്ടിരിക്കുകയാണെന്ന് ക്രെംലിന്‍ ആവര്‍ത്തിച്ച് മുന്നറിയിപ്പും നല്‍കിയിട്ടുണ്ട്. ഉക്രെയ്‌നിലെ യുദ്ധം ആരംഭിച്ചതിന് ശേഷം ആദ്യമായി അന്താരാഷ്ട്ര വാര്‍ത്താ ഏജന്‍സികളുടെ മുതിര്‍ന്ന എഡിറ്റര്‍മാരോട് മുഖാമുഖം സംസാരിച്ച പുടിന്‍, സഖ്യത്തിന്റെ സൈനിക ശക്തിയെ ഉദ്ധരിച്ച് റഷ്യയ്ക്ക് നാറ്റോയെ ആക്രമിക്കാന്‍ കഴിയുമെന്ന പാശ്ചാത്യ അവകാശവാദങ്ങളെ മണ്ടത്തരം എന്ന് തള്ളിക്കളഞ്ഞു.
എന്നാല്‍ ആണവയുദ്ധത്തിന്റെ അപകടസാധ്യതയെക്കുറിച്ച് ചോദിച്ചപ്പോള്‍ രാജ്യത്തിന്റെ പ്രദേശിക സമഗ്രതയ്ക്കോ പരമാധികാരത്തിനോ ഭീഷണിയുണ്ടെങ്കില്‍ അത്തരം ആയുധങ്ങള്‍ ഉപയോഗിക്കാന്‍ റഷ്യയുടെ ആണവ സിദ്ധാന്തം അനുവദിച്ചിട്ടുണ്ടെന്ന് പുടിന്‍ പ്രതികരിച്ചു. ‘ചില കാരണങ്ങളാല്‍, റഷ്യ ഒരിക്കലും ഇത് ഉപയോഗിക്കില്ലെന്ന് പാശ്ചാത്യ രാജ്യങ്ങള്‍ വിശ്വസിക്കുന്നു, എന്നാല്‍ അത് സത്യമല്ല’. പുടിന്‍ പറഞ്ഞു.ഞങ്ങള്‍ക്ക് ഒരു ന്യൂക്ലിയര്‍ സിദ്ധാന്തമുണ്ട്, അത് എന്താണ് പറയുന്നതെന്ന് നോക്കൂ. ആരുടെയെങ്കിലും പ്രവൃത്തികള്‍ നമ്മുടെ പരമാധികാരത്തിനും പ്രാദേശിക അഖണ്ഡതയ്ക്കും ഭീഷണിയാണെങ്കില്‍, നമ്മുടെ കൈവശമുള്ള എല്ലാ മാര്‍ഗങ്ങളും ഉപയോഗിക്കുന്നത് സാധ്യമാണെന്ന് ഞങ്ങള്‍ കരുതുന്നു. ഇത് നിസ്സാരമായി, ഉപരിപ്ലവമായി എടുക്കരുത്. ‘ എന്നാണ് അദ്ദേഹം വ്യക്തമാക്കിയത്.
എന്നാല്‍ റഷ്യ ന്യൂക്ലിയര്‍ സേബര്‍ റാറ്റ്‌ലിംഗ് ഉപയോഗിച്ചുവെന്ന പാശ്ചാത്യ വാദങ്ങളെ പുടിന്‍ തള്ളിക്കളഞ്ഞു, യുദ്ധത്തില്‍ ആണവായുധങ്ങള്‍ ഉപയോഗിച്ച ഒരേയൊരു രാജ്യം അമേരിക്കയാണെന്ന് അദ്ദേഹം ചൂണ്ടിക്കാട്ടി.
