സംസ്ഥാനത്തെ വിദ്യാലയങ്ങളിൽ ക്രിസ്തുമസ് പരീക്ഷ ഡിസംബർ 14 മുതൽ 22 വരെ നടത്താൻ ധാരണയായി. പൊതുവിദ്യാഭ്യാസ ഡയറക്ടറുടെ അധ്യക്ഷതയിൽ ചേർന്ന ക്വാളിറ്റി ഇംപ്രൂവ്മെന്റ് പ്രോഗ്രാം (ക്യുഐപി) മോണിറ്ററിങ് യോഗത്തിലാണ് പരീക്ഷയുടെ നടത്തിപ്പ് സംബന്ധമായ തീരുമാനം.
ഒന്ന് മുതൽ പത്ത് വരെയുള്ള ക്ലാസുകളിലെ വിദ്യാർത്ഥികൾക്ക് ഡിസംബർ 14 ന് ആരംഭിച്ച് 22 ന് അവസാനിക്കും വിധമാണ് പരീക്ഷകൾ ക്രമീകരിച്ചിരിക്കുന്നത്. ഒന്നും രണ്ടും വർഷ ഹയർ സെക്കൻഡറി ക്ലാസുകളിലെ പരീക്ഷ ഡിസംബർ 12 മുതൽ 22 വരെയായിരിക്കും. യോഗത്തിന്റെ തീരുമാനപ്രകാരം 23 മുതൽ ജനുവരി മൂന്ന് വരെ ക്രിസ്തുമസ് അവധി നൽകും.
എന്നാൽ മാർച്ച 13 ന് നിശ്ചയിച്ചിരിക്കുന്ന എസ് എസ് എൽ സി പരീക്ഷ റംസാൻ വ്രത സമയത്ത് ആയതിനാൽ ഇതുമായി ബന്ധപ്പെട്ട പരാതി സർക്കാറിന്റെ പരിഗണനക്ക് വിടാനും യോഗത്തിൽ തീരുമാനിച്ചു.
