സംസ്ഥാനത്ത് ഇന്ന് പ്രത്യേക മന്ത്രിസഭാ യോഗം ചേരും. അന്ധ വിശ്വാസങ്ങൾക്കും അനാചാരങ്ങൾക്കും എതിരെയുള്ള ബില്ലിന് മന്ത്രിസഭാ യോഗത്തിൽ അംഗീകാരം നൽകും. ഡിസംബർ അഞ്ചിന് നിയമസഭാ സമ്മേളനം ചേരുമ്പോൾ അവതരിപ്പിക്കേണ്ട ബില്ലുകളുടെ കാര്യത്തിലും ഇന്ന് തീരുമാനമുണ്ടാകും.
അന്ധവിശ്വാസങ്ങളുടെ പേരിലുള്ള അതിക്രമങ്ങൾ തടയാൻ നിയമ നിർമ്മാണം നടത്തുമെന്ന് സംസ്ഥാന സർക്കാർ നേരത്തേ പ്രഖ്യാപിച്ചിരുന്നു. 2021 ഓഗസ്റ്റ് ആറിന് കെഡി പ്രസേനൻ എംഎൽഎ നിയമസഭയിൽ ഇതേ വിഷയത്തിൽ സ്വകാര്യ ബിൽ അവതരിപ്പിച്ചപ്പോൾ മുഖ്യമന്ത്രിക്ക് വേണ്ടി ദേവസ്വം മന്ത്രി കെ രാധാകൃഷ്ണനായിരുന്നു മറുപടി പറഞ്ഞത്. അന്ധവിശ്വാസം തടയാനുള്ള ബില്ലിന്റെ കരട് സർക്കാർ തയാറാക്കിയിട്ടുണ്ടെന്നും നിയമപരിഷ്‌കരണ കമ്മീഷന്റെ അഭിപ്രായം അറിഞ്ഞശേഷം നിയമനിർമ്മാണം നടത്തുമെന്നായിരുന്നു അന്ന് സഭയിലെ മറുപടി. എന്നാൽ പിന്നീട് നടപടികൾക്ക് വേഗം കുറഞ്ഞു.
ഇലന്തൂരിലെ നരബലിയുടെ പശ്ചാത്തലത്തിൽ അന്ധവിശ്വാസത്തിനും അനാചാരത്തിനുമെതിരെ നിയമം കൊണ്ടുവരണമെന്ന ആവശ്യം വീണ്ടും ശക്തമായിരുന്നു. ഈ സാഹചര്യത്തിലാണ് നടപടികൾ വേഗത്തിലാക്കാനുള്ള സർക്കാർ തീരുമാനം.
