5 ജി സേവനത്തിന്റെ ആദ്യഘട്ടം ഇന്ന് മുതൽ കേരളത്തിനും ലഭ്യമാകുന്നു. കൊച്ചിയാണ് സംസ്ഥാനത്ത് ആദ്യമായി അതിവേഗ ഇന്റർനെറ്റ് സേവനം 5 ജി ലഭ്യമാകുന്ന നഗരം. വൈകിട്ട് 5.30ന് പനമ്പിള്ളി നഗർ ഹോട്ടൽ അവന്യൂ സെന്ററിൽ നടക്കുന്ന പരിപാടിയിൽ മുഖ്യമന്ത്രി കേരളത്തിലെ 5 ജി സേവനങ്ങൾക്കു തുടക്കം കുറിച്ചുകൊണ്ട് ഉദ്ഘാടനം ചെയ്യും.
കേരളത്തിൽ റിലയൻസ് ജിയോയാണ് 5 ജി സേവന ദാതാക്കൾ. നഗരത്തിലെ തിരഞ്ഞെടുക്കപ്പെട്ട മേഖലകളിലായിരിക്കും ആദ്യഘട്ടത്തിൽ സേവനം ലഭ്യമാകുക. കൊച്ചി നഗരത്തിലെ പല സ്ഥലങ്ങളിലും കഴിഞ്ഞ ഏതാനും ദിവസങ്ങളായി 5ജി സേവനം പരീക്ഷണാടിസ്ഥാനത്തിൽ ലഭ്യമായി തുടങ്ങിയിരുന്നു. കൊച്ചിയിലെ 130 ലേറെ ടവറുകൾ ജിയോ നവീകരിച്ചു. ഗുരുവായൂർ ക്ഷേത്ര പരിധിയിലും സേവനം ലഭ്യമാകും.
ഒക്ടോബറിലാണ് ഇന്ത്യയിൽ ഔദ്യോഗികമായി 5ജി സേവനം ലഭ്യമായി തുടങ്ങിയത്. ഒക്‌ടോബർ ഒന്ന് മുതൽ ഡൽഹി, മുംബൈ, വാരണാസി, ബാംഗ്ലൂർ എന്നിവിടങ്ങളിൽ എട്ടു നഗരങ്ങളിലായി എയർടെൽ 5G സേവനങ്ങൾ ആരംഭിച്ചിരുന്നു. എന്നാൽ 2023 ഡിസംബറോടെ 18 മാസത്തിനുള്ളിൽ ഇന്ത്യയെ പൂർണമായും 5ജിയിലേക്ക് എത്തിക്കാനാണ് ജിയോ ലക്ഷ്യമിടുന്നത്.
