ഐഎസ്എൽ -ൽ ഇന്ന് കരുത്തരായ ജംഷഡ്‌പൂർ എഫ്‌സി -യെ കേരള ബ്ലാസ്‌റ്റേഴ്‌സ് എഫ്‌സി നേരിടും. കഴിഞ്ഞ എട്ട് മത്സരങ്ങളിലും അജയ്യരായിട്ടായിരുന്നു മഞ്ഞപ്പടയുടെ മുന്നേറ്റം. കൊച്ചി കലൂർ ജവഹർലാൽ നെഹ്‌റു സ്‌റ്റേഡിയത്തിൽ ഇന്ന് വൈകിട്ട് 7.30 -നാണ് മത്സരം.
തുടര്‍ച്ചയായ മത്സരങ്ങളില്‍ അപരാജിത കുതിപ്പ് നടത്തുന്ന ബ്ലാസ്റ്റേഴ്സിന് ഇന്നത്തെ മത്സരം നിര്‍ണ്ണായകമാണ്. ജംഷഡ്‌പൂരിനെ തകര്‍ത്ത് മത്സരം സ്വന്തമാക്കിയാല്‍, പോയിന്റ് പട്ടികയിൽ 25 പോയിന്‍റുമായി മൂന്നാം സ്ഥാനത്തെത്താന്‍ ബ്ലാസ്റ്റേഴ്സിനു കഴിയും. കൂടാതെ, ഐഎസ്എൽ ഷീൽഡിനുള്ള പോരാട്ടത്തിലും ബ്ലാസ്റ്റേഴ്സിന് മുന്നേറാം.
അതേ സമയം സസ്പെന്‍ഷനിലിരിക്കുന്ന മിഡ് ഫീൽഡ് താരം ഇവാൻ കലിയുഷ്‌നി ഇന്ന് കളത്തിൽ ഇറങ്ങില്ലെന്നത് ബ്ലാസ്റ്റേഴ്സിന് വലിയ വെല്ലുവിളിയാണ്. കഴിഞ്ഞ മത്സരങ്ങളില്‍ നാല് മഞ്ഞക്കാർഡുകൾ കിട്ടിയതിനാണ് സസ്പെന്‍ഷന്‍. ഇവാനു പകരം വിക്‌ടർ മോങ്ങിൽ മധ്യനിരയിൽ എത്തിയേക്കുമെന്നാണ് കരുതുന്നത്. കൂടാതെ, അഡ്രിയാൻ ലൂണ, ജിയാനു, സഹൽ, കെ.പി. രാഹുൽ തുടങ്ങിയ പ്രതിഭകൾ കരുത്തരായ ജംഷഡ്‌പൂരിനെ മറികടക്കാന്‍ സഹായിക്കുമെന്നാണ് ബ്ലാസറ്റേഴ്സ് പ്രേമികള്‍ കരുതുന്നത്.
