ആദ്യ ടി-20 മത്സരത്തില്‍ ഇന്ത്യയുടെ ത്രസിപ്പിക്കുന്ന വിജയത്തിനു ശേഷം ശ്രീലങ്കക്കെതിരായ രണ്ടാം മത്സരം ഇന്ന് നടക്കും. പൂനെയിലെ മഹാരാഷ്‌ട്ര ക്രിക്കറ്റ് അസോസിയേഷൻ സ്‌റ്റേഡിയത്തിൽ വച്ചാണ് രണ്ടാം മത്സരം. ഇന്നത്തെ മത്സരം ജയിച്ചാൽ ഇന്ത്യക്ക് പരമ്പര സ്വന്തമാക്കാം.
ക്രിക്കറ്റ് പ്രേമികളെ ആവേശത്തിലാക്കി അവസാന ഓവർ വരെ നീണ്ട പോരാട്ടത്തില്‍ ഇന്ത്യ രണ്ട് റണ്‍സിനാണ് ലങ്കയെ പരാജയപ്പെടുത്തിയത്. അതേസമയം ആദ്യ മത്സരത്തിലെ ആത്മവിശ്വാസത്തോടെയാണ് രണ്ടാം ടി-20 ക്ക് ഇന്ത്യ ഇന്ന് ഇറങ്ങുന്നത്. മുന്‍നിര ബാറ്റ്സ്മാന്മാര്‍ റണ്‍ വേട്ടയില്‍ പരാജയപ്പെടുമ്പോഴാണ് ഇന്ത്യക്ക് തിരിച്ചടിയുണ്ടാവുന്നതെന്നാണ് ക്രിക്കറ്റ് പ്രേമികളുടെ ആക്ഷേപം. അതിനാല്‍ ഓപ്പണർമാർ അടക്കമുള്ള മുൻനിര താരങ്ങൾ മികച്ച പ്രകടനം കാഴ്‌ച വച്ചാൽ ഇന്ത്യക്ക് ജയം അസാധ്യമല്ല.
ആദ്യമത്സരത്തിൽ വിക്കറ്റൊന്നും നേടാതിരുന്ന സ്‌പിന്നർമാരായ അക്‌സർ പട്ടേലും, യൂസ്‌വേന്ദ്ര ചാഹലും ഇന്നും കളിച്ചേക്കും. അതേസമയം, ആദ്യമത്സരത്തില്‍ പരിക്കേറ്റ മലയാളിതാരം സഞ്ജു സാംസണ് പകരം
പരമ്പരക്കുള്ള ഇന്ത്യൻ ടീമിൽ ജിതേഷ് ശർമ്മയെ ഉൾപ്പെടുത്തി. മൂന്നാം ടി-20 ജനുവരി ഏഴിനാണ് നടക്കുക.
