അമേരിക്കയില്‍ ചൈനീസ് പുതുവത്സരാഘോഷത്തിനിടെയുണ്ടായ വെടിവയ്പില്‍ 10 പേര്‍ കൊല്ലപ്പെട്ടു. പത്തിലേറെ പേര്‍ക്കു പരിക്കേറ്റു. ഇവരില്‍ പലരുടെയും നില ഗുരുതരമാണ്.
കലിഫോര്‍ണിയ സംസ്ഥാനത്ത് ലോസ്ആഞ്ചലസിന്റെ കിഴക്കേ അതിര്‍ത്തിയിലുള്ള മോന്ററേ പാര്‍ക്ക് നഗരത്തിലെ ഡാന്‍സ് ബാറില്‍ ശനിയാഴ്ച രാത്രിയായിരുന്നു സംഭവം. ഒരു പുരുഷനാണ് വെടിവയ്പു നടത്തിയതെന്ന് പോലീസ് പറഞ്ഞു. അക്രമിക്കായി തെരച്ചില്‍ ഊര്‍ജിതമാക്കി. ആക്രമണസമയത്ത് ആയിരക്കണക്കിനു പേര്‍ സ്ഥലത്തുണ്ടായിരുന്നു. മോന്ററേ പാര്‍ക്കില്‍ ചൈനീസ് വംശജര്‍ ഉള്‍പ്പെടെയുള്ള ഏഷ്യക്കാരാണു ഭൂരിപക്ഷം. 60,000 പേരാണു നഗരത്തിലുള്ളത്.
ഈ വര്‍ഷം അമേരിക്കയില്‍ നടക്കുന്ന അഞ്ചാമത്തെ കൂട്ടക്കൊലയാണു മോണ്ടേറേ പാര്‍ക്കില്‍ അരങ്ങേറിയത്.
