വാഹനങ്ങളിലെ അഗ്നിബാധയുടെ കാരണങ്ങള്‍: അറിയേണ്ടതെല്ലാം

വാഹനങ്ങളിലെ അഗ്നിബാധയുമായി ബന്ധപ്പെട്ട് നിരവധി സംഭവങ്ങളാണ് സംസ്ഥാനത്ത് റിപ്പോർട്ട് ചെയ്യപ്പെടുന്നത്. കഴിഞ്ഞ ദിവസം കണ്ണൂരില്‍ വാഹനത്തിലുണ്ടായ അഗ്നിബാധയില്‍ പൂര്‍ണ്ണഗര്‍ഭിണിയും ഭര്‍ത്താവും മരിച്ചിരുന്നു. സമാനമായ സംഭവം ഇന്ന് തിരുവനന്തപുരത്തെ വെഞ്ഞാറമൂട്ടിലും ഉണ്ടായെങ്കിലും യാത്രക്കാരന് ജീവഹാനി സംഭവിച്ചില്ല. ഇത്തരത്തിലുള്ള അപകടങ്ങള്‍ തുടര്‍ക്കഥയാകുമ്പോള്‍ വാഹനങ്ങളിലെ അഗ്നിബാധയെക്കുറിച്ച് ശ്രദ്ധിക്കേണ്ട ചില കാര്യങ്ങള്‍ പങ്കുവയ്കക്കുകയാണ് പെരുമ്പാവൂര്‍ മോട്ടോര്‍ വെഹിക്കിള്‍ ഇന്‍സപെക്ടര്‍ ദിലീപ് കുമാര്‍ കെ.ജെ.

പല തീപിടുത്തങ്ങളും നമ്മൾ തന്നെ ക്ഷണിച്ചുവരുത്തുന്നതാണ്. പലപ്പോഴും അറിവില്ലായ്മയാണ് ഈ അപകടങ്ങളിലെ പ്രധാന വില്ലൻ. നിരുപദ്രവകാരിയായി തോന്നുന്ന വണ്ടുകൾ പോലും അഗ്നിബാധക്ക് കാരണമാകുന്നുണ്ടെന്നതാണ് സത്യം. അഗ്നിബാധയുടെ പ്രധാന കാരണങ്ങൾ ചുവടെ ചേര്‍ക്കുന്നു.

1. ഫ്യൂവൽ ലീക്കേജ്

കാലപ്പഴക്കം മൂലവും ശരിയായ മെയിൻന്റനൻസിന്റെ അഭാവം നിമിത്തവും ഫ്യൂവൽ ലൈനിൽ ലീക്കേജുകൾ സംഭവിക്കാം. ഉപയോഗിക്കാതെ കിടക്കുന്ന വാഹനങ്ങളിൽ ചില ക്ഷുദ്രജീവികളുടെ ആക്രമണം മൂലം ഇന്ധനചോർച്ച ഉണ്ടാകാം. ഗ്രാമപ്രദേശങ്ങളിലും മരങ്ങൾ ധാരാളമായി വളർന്നുനിൽക്കുന്ന പ്രദേശങ്ങളിലും വനാതിർത്തിയിലും ചില പ്രത്യേകതരം വണ്ടുകൾ റബ്ബർ കൊണ്ട് നിർമ്മിച്ച ഇന്ധന ലൈനിൽ വളരെ ചെറിയ ദ്വാരം ഇടുന്നത് ശ്രദ്ധയിൽപെട്ടിട്ടുണ്ട്.

ബയോ ഫ്യുവൽ ആയ എഥനോൾ അടങ്ങിയ ഇന്ധനങ്ങൾ ഉയോഗിക്കുന്ന വാഹനങ്ങളിലാണ് ഇത്തരത്തിൽ വണ്ടുകളുടെ ആക്രമണം കൂടുതൽ കണ്ടെത്തിയിട്ടുള്ളത്. മാരുതി വാഹനങ്ങളിൽ ഇത്തരത്തിലുള്ള പരാതികൾ നിത്യസംഭവങ്ങളാണ്. ചില വാഹനങ്ങളിൽ കാറ്റലിറ്റിക്‌ കൺവെർട്ടർ വാഹനത്തിന്റെ മധ്യഭാഗത്തിനു താഴെ സ്ഥിതിചെയ്യുന്നതുകൊണ്ട് ഇത്തരത്തിലുള്ള ചെറിയ സുഷിരങ്ങളിൽ കൂടി, വാഹനം ഓടിത്തുടങ്ങുമ്പോൾ സ്പ്രേ രൂപത്തിൽ വരുന്ന ഫ്യൂവൽ വളരെ പെട്ടെന്ന് വാഹനം കത്തുന്നതിന് കാരണമാകാറുണ്ട്. ഏകദേശം 280°C ആണ് പെട്രോളിന്റെ സെല്‍ഫ് ഇഗ്നീഷന്‍ ടെംപറേച്ചർ (സ്പാര്‍ക്ക് ഇല്ലാതെ തന്നെ കത്തുന്ന അവസ്ഥ); ഡീസലിന്റെ 210°C ഉം. എന്നാലും ഡീസലിനെ അപേക്ഷിച്ച് പെട്രോൾ പെട്ടെന്ന് വാപ്പൊറൈസ് ചെയ്യുന്നതിനാൽ തീപിടിക്കാനുള്ള സാധ്യത കൂടുതലാണ്. സൈലൻസറിന്റെയും എസ്ഹോസ്റ്റ് സിസ്റ്റത്തിന്റേയും പല ഭാഗങ്ങൾ ഏകദേശം 600 മുതൽ 700°C വരെ ചൂട് പിടിക്കാൻ സാധ്യതയുള്ള ഭാഗങ്ങളാണ്. അതിനാൽ തന്നെ ഈ ഭാഗത്തുണ്ടാവുന്ന ഫ്യൂവൽ ലീക്കേജ് അത്യന്തം അപകടകരമാണ് .

ഇന്ധന ലീക്കേജ് മാത്രമല്ല, എൻജിൻ കമ്പാർട്ട്മെന്റിൽ ബ്രേക്ക് സ്റ്റിയറിംഗ് തുടങ്ങിയ സംവിധാനങ്ങളിലുള്ള ഫ്ളൂയിഡും ലീക്ക് ആകാനുള്ള സാധ്യതയുണ്ട്. ഗ്യാസ്കറ്റുകൾ, വാഷറുകൾ, റബ്ബർ റിങ്ങുകൾ എന്നിവയിലുണ്ടാകുന്ന പൊട്ടലുകളാണ് ലീക്കേജിനുള്ള സാധ്യത വർദ്ധിപ്പിക്കുന്നത്. ഇത്തരം ലീക്കേജുകൾ പെട്ടെന്ന് തീ പിടിത്തത്തിലേക്ക് നയിക്കില്ലെങ്കിലും ഒരിക്കൽ തീപടർന്നാൽ അത് ഗുരുതരമാകുന്നതിന് കാരണമാകും. മാത്രവുമല്ല, ഇത്തരം ലീക്കേജുകൾ മൂലം ഇന്ധന ലീക്കേജ് ശ്രദ്ധയിൽപെടാതിരിക്കാനും കാരണമാകും.

2. ഗ്യാസ് ലീക്കേജ്

എൽപിജി മുതലായവ ഇന്ധനമായി ഉപയോഗിക്കുന്ന വാഹനങ്ങൾക്ക് ലീക്കേജിനുള്ള സാധ്യതകൾ കൂടുതലാണ്. സമീപകാലത്ത് പെട്ടെന്ന് തീ ആളിപ്പടർന്നുള്ള അപകടങ്ങളിലും പ്രത്യേകിച്ച് ഗ്യാസ് ആയി കൺവെർട്ട് ചെയ്തിട്ടുള്ള പഴയ പെട്രോൾ വാഹനങ്ങളിലും ഗ്യാസ് ലീക്കേജ് ആണ് പ്രധാന വില്ലൻ. നിരന്തരമായ പരിചരണം ആവശ്യമുള്ളതാണ് ഇത്തരം വാഹനങ്ങൾ.

ഈ വാഹനങ്ങളിൽ ഉപയോഗിച്ചിട്ടുള്ള എൽപിജി കൺവേർഷൻ കിറ്റിലെ സോളിനോയ്ഡ് വാൽവ്, റെഗുലേറ്റർ/വാപ്പൊറൈസർ, ഫിൽട്ടർ, ഗ്യാസ് ട്യൂബ്, ടാങ്ക് തുടങ്ങിയ എല്ലാ ഭാഗങ്ങളും വർഷത്തിലൊരിക്കൽ സർവ്വീസ് ചെയ്യണമെന്നും ഗ്യാസ് ടാങ്ക് അഞ്ചു വർഷം കൂടുമ്പോൾ പ്രഷർ ടെസ്റ്റ് നടത്തുകയും 15 വർഷം കഴിഞ്ഞാൽ മാറ്റണമെന്നുമാണ് ഗ്യാസ് സിലിണ്ടർ റൂൾസ് പ്രകാരം നിഷ്കർഷിച്ചിട്ടുള്ളത്. എന്നാൽ ദൗർഭാഗ്യകരമെന്നു പറയട്ടെ, പലരും ഇത് പിടിപ്പിച്ചുകഴിഞ്ഞാൽ പിന്നെ തിരിഞ്ഞുനോക്കുക പോലുമില്ല.

3. അൾട്ടറേഷനുകൾ

55/ 60 വാട്ട്സ് ബൾബുകൾ ഘടിപ്പിക്കുന്ന ഹോൾഡറുകളിൽ 100-130 വാട്ട് ഹാലജൻ ബൾബുകൾ ഘടിപ്പിച്ച് നിരത്തിലിറങ്ങുന്നവർ അപകടം ക്ഷണിച്ചുവരുത്തുന്നവരാണ്. കുറഞ്ഞ വോൾട്ടേജുള്ള ബൾബുകൾക്കായി ഡിസൈൻ ചെയ്തിട്ടുള്ള കനം കുറഞ്ഞ വയറുകളും പ്ലാസ്റ്റിക് ഹോൾഡറുകളിലുമാണ്, പല രാജ്യങ്ങളും നിരോധനം ഏർപ്പെടുത്തിയിട്ടുള്ള 300°C വരെ ചൂടാകാവുന്ന ഇത്തരം ബൾബുകൾ ഘടിപ്പിക്കുന്നത്. നിയമവിധേയമല്ലാത്ത സെനോൺ/ പ്ലാസ്മ HID ബൾബുകളും ബല്ലാസ്റ്റുകളും അധികതാപം സൃഷ്ടിക്കുന്നവയാണ്.

മനസിലാക്കേണ്ട വസ്തുത, ഓവർ ഹീറ്റ് ആകുന്നത് ഫ്യൂസ് ഉരുകുന്നതിലേക്ക് നയിക്കില്ല എന്നതാണ്. ഷോർട്ട് സർക്യൂട്ട് ആയാൽ മാത്രമെ ഫ്യൂസ് ഉരുകുകയുള്ളൂ എന്ന് മനസിലാക്കണം. പലപ്പോഴും ഇങ്ങനെയുള്ള തീപിടുത്തം ആരംഭിക്കുന്നത് ഹെഡ് ലൈറ്റിൽ നിന്നാണ് എന്നുള്ളതിന്റെ കാരണവും മറ്റൊന്നല്ല. കൂടുതൽ വാട്ട്സുള്ള ഹോണുകളും ലൈറ്റിന്റെ ആർഭാടങ്ങളും സ്പീക്കറുകളും എല്ലാം അഗ്നിബാധക്ക് കാരണമാകാം. പല വാഹനങ്ങളിലും ഇത്തരം മോഡിഫിക്കേഷനുകൾക്ക് താഴ്ന്ന നിലവാരത്തിലുള്ള, കനം കുറഞ്ഞ വയറിങ്ങുകളാണ് ഉപയോഗിക്കാറ് എന്നതും വയർ കരിയുന്നതിനും തീപിടുത്തത്തിലേക്ക് നയിക്കുന്നതിനും കാരണമാകും.

വാഹന മാനുഫാക്ചററുടേതല്ലാത്ത വ്യാജ വയറിംഗ് ഹാർനെസുകളും, കപ്ലിംങ്ങിനു പകരം വയർ പിരിച്ച് ചേർത്ത് ഘടിപ്പിക്കുന്നതും അപകടകരമാണ്. ബാറ്ററിയുടെ പോസിറ്റീവ് ടെർമിനലിൽ നിന്ന് ഫ്യൂസ് ബോക്സ് വഴി അല്ലാതെ വലിക്കുന്ന ചെറിയ ഇലക്ട്രിക് വയറുകൾ പോലും വലിയ തീപിടുത്തത്തിലേക്ക് നയിച്ചേക്കാം.

4. ഫ്യൂസുകൾ

വാഹന നിർമ്മാതാക്കൾ നിഷ്കർഷിച്ചിട്ടുള്ള ഫ്യൂസുകൾ മാറ്റി കൂടുതൽ കപ്പാസിറ്റിയുള്ള ഫ്യൂസുകൾ ഘടിപ്പിക്കുന്നതും വയറുകളോ, കമ്പിയോ പകരം പിടിപ്പിക്കുന്നതും, പ്രത്യേകിച്ച് പഴയ വാഹനങ്ങളിലും മറ്റും തീപിടുത്തസാധ്യത വർദ്ധിപ്പിക്കുന്നു.

5. ബാറ്ററികളും ചാർജിംഗ് സർക്യൂട്ടും

പഴയതും തകരാറുള്ളതുമായ ബാറ്ററികൾ പലപ്പോഴും തീപിടുത്തത്തിന് കാരണമാകാറുണ്ട്. ചാർജിംഗ് സിസ്റ്റത്തിലെ തകരാറുകൾ നിമിത്തം ഓവർ ചാർജാക്കുന്നതും അതുമൂലം ഉത്പാദിപ്പിക്കപ്പെടുന്ന കൂടുതൽ അളവിലുള്ള അതീവ ജ്വലനസാധ്യതയുള്ള ഹൈഡ്രജൻ വാതകവും സ്ഫോടനത്തിന് കാരണമായേക്കാം.

ഇടിയുടെ ആഘാതം മൂലവും ബാറ്ററി അഗ്നിബാധക്ക് കാരണമാകാം. ഇലക്ടിക് വാഹനങ്ങളിൽ ചിലതെങ്കിലും പ്രാരംഭ ഡിസൈൻ ഘട്ടങ്ങളിൽ തീപിടുത്ത സാധ്യത റിപ്പോർട്ട് ചെയ്യപ്പെട്ടിട്ടുണ്ട്. ആയത് മിക്കവാറും പരിഹാരം കാണാൻ നിർമ്മാതാക്കൾക്ക് കഴിഞ്ഞിട്ടുണ്ട്. ടെസ്‌ല, ഷെവർലെ വോൾട്ട് എന്നിവ ഇതിന് ഉദാഹരണങ്ങളാണ്.

6. കാറ്റലിറ്റിക് കൺവർട്ടറുകളും എസ്ഹോസ്റ്റ് സിസ്റ്റവും

സാധാരണയായി കാറ്റലിറ്റിക് കൺവെർട്ടറിന്റെ താപനില 600°C മുതൽ 750°C വരെയാണ്. എന്നാൽ ക്ലോഗിംഗ് മൂലമോ, സ്പാർക്ക് പ്ലഗിന്റെ തകരാർ നിമിത്തമോ ഭാഗിക ജ്വലനം ഇവിടെ വച്ച് നടക്കുന്നതിനാൽ കാറ്റലിറ്റിക് കൺവർട്ടറിന്റെ താപനില വളരെ പെട്ടെന്നു തന്നെ 1000°C മുകളിലേക്ക് ഉയരുന്നതിനും ഇതിനോട് ചേർന്നു നിൽക്കുന്ന ഫ്ളോർ മാറ്റിലോ, വയറുകളിലോ, ഇന്ധന കുഴലുകളിലോ അഗ്നിബാധ ഉടലെടുക്കുന്നതിനും കാരണമാകും. എസ്ഹോസ്റ്റ് മാനിഫോൾഡിനെ സ്പർശിക്കുന്ന രീതിയിലുള്ള ഫ്യൂവൽ ലൈനുകളും ഇലക്ട്രിക് ലൈനുകളും ഇന്ധന ലീക്കേജുകളും ശ്രദ്ധിക്കേണ്ട ഒന്നാണ്.

7. കൂളിംഗ് സിസ്റ്റത്തിന്റെ തകരാർ

ലീക്കേജ് മൂലമോ, മറ്റ് യാന്ത്രിക തകരാർ മൂലമോ കൂളിംഗ് സിസ്റ്റത്തിന് തകരാറുകൾ സംഭവിക്കുന്നതും ലൂബ്രിക്കേഷൻ സിസ്റ്റത്തിന്റെ തകരാറുകളും എഞ്ചിന്റെ താപനില വർദ്ധിക്കുന്നതിനും അതുമൂലം റബ്ബർ ഭാഗങ്ങൾ ഉരുകി തീപിടുത്തത്തിലേക്ക് നയിക്കാനും ഇടയുണ്ട്.

8. കൂട്ടിയിടികളും മെക്കാനിക്കൽ തകരാറുകളും

കൂട്ടിയിടികൾ പലപ്പോഴും തീപിടുത്തത്തിന് കാരണമാകാറുണ്ട്. ഇന്ധനടാങ്കിലും ബാറ്ററിയിലും ഏൽക്കുന്ന ക്ഷതങ്ങൾ തീപിടുത്തത്തിലേക്ക് നയിച്ചേക്കാം. ടയർ പൊട്ടി റോഡിൽ ഉരഞ്ഞും അപകടം ഉണ്ടാകാം. വലിയ വാഹനങ്ങളിൽ പ്രൊപ്പല്ലർ ഷാഫ്റ്റ് പൊട്ടി ഇന്ധന ടാങ്കിൽ ഇടിച്ച് തീപിടുത്തത്തിന് കാരണമാകാറുണ്ട്. കേരളത്തിലെ റോഡപകടങ്ങളിൽ ഏറ്റവും കൂടുതൽ പേർ മരിച്ച അതിദാരുണമായ പൂക്കിപ്പറമ്പ് ബസ് അപകടത്തിൽ 44 പേർ കൊല്ലപ്പെടുകയും 22 പേർക്ക് ഗുരുതരമായി പരിക്കേൽക്കുകയും ചെയ്തത് ഇത്തരത്തിലൊന്നാണ്. അപകടത്തിൽപെട്ട പ്രണവം ബസിന്റെ പ്രൊപ്പല്ലർ ഷാഫ്റ്റ് പൊട്ടി ഡീസൽ ടാങ്കിൽ ഇടിച്ച് കത്തിപ്പിടിച്ചതാണ് അപകടത്തെ ഇത്ര ഭീകരമാക്കിയത്.

9. പാർക്കിംഗ് സ്ഥലവും പരിസരങ്ങളും

ഉണങ്ങിയ പുൽമൈതാനങ്ങളിൽ പാർക്ക് ചെയ്യുമ്പോൾ ചൂടു പിടിച്ച സൈലൻസറിൽ തട്ടി അഗ്നിബാധക്ക് കാരണമാകാം. ഏകദേശം 300 വാഹനങ്ങൾ അഗ്നിക്കിരയായ 2019 -ലെ ബാംഗ്ലൂർ യാലഹങ്കയിലെ ഏയ്റോ ഇൻഡ്യ എയർഷോയിലെ തീപിടുത്തം ഇത്തരത്തിലുള്ള ഒന്നാണെന്നാണ് വിദഗ്ധർ കണ്ടെത്തിയത്. ചപ്പുചവറുകളും പ്ലാസ്റ്റിക് പേപ്പറുകളും കൂടിക്കിടക്കുന്ന ഇടങ്ങളും തീപിടുത്തത്തിന് സാധ്യതയുള്ള സ്ഥലങ്ങളിലും പാർക്ക് ചെയ്യുന്നത് ഒഴിവാക്കുക തന്നെ വേണം.

10. തീപ്പെട്ടി/ ലൈറ്റർ/ സ്‌റ്റൗ എന്നിവയുടെ ഉപയോഗം

തീപ്പെട്ടിയോ, ലൈറ്ററുകളോ കത്തിച്ചുപിടിച്ചു കൊണ്ട് എഞ്ചിൻ കംപാർട്ട്മെന്റോ, ഫ്യൂവൽ ടാങ്കോ, ഫ്യൂവൽ ലൈനുകളോ പരിശോധിക്കുന്നതോ, റിപ്പയറിങ്ങിനു ശ്രമിക്കുന്നതോ അപകടത്തിലേക്ക് നയിക്കാറുണ്ട്. ഇരുചക്ര വാഹനങ്ങളിലും മറ്റും സൈലൻസറിൽ സ്പർശിക്കുന്ന രീതിയിൽ, പ്ലാസ്റ്റിക് ബാഗുകളും തീപിടുത്തത്തിലേക്ക് നയിച്ചേക്കാവുന്ന ഓയിലുകളും ഇന്ധനവും മറ്റും കൊണ്ടുപോകുന്നതും തീപിടുത്തത്തിന്റെ കാരണങ്ങളിൽപെടുന്നു.

11. ആംബുലൻസുകൾ

ആംബുലൻസിന് തീപിടിച്ച് രോഗി മരിച്ചതടക്കം നിരവധി സംഭവങ്ങൾ അടുത്ത കാലത്തായി റിപ്പോർട്ട് ചെയ്യപ്പെട്ടിട്ടുണ്ട്. ആംബുലൻസിലെ ഓക്സിജൻ സിലിണ്ടർ ആണ് ഇതിലെ പ്രധാന വില്ലൻ. കത്താൻ ആവശ്യമായ വാതകമാണ് ഓക്സിജൻ എന്ന് എല്ലാവർക്കും അറിയാം; എന്നാൽ അത് സ്ഫോടനത്തിനു തന്നെ കാരണമായേക്കാം എന്ന അറിവ് കുറവാണ്.

സാധാരണയായി 21% ഓക്സിജനാണ് അന്തരീക്ഷത്തിൽ ഉണ്ടാവുക. എന്നാൽ അതിമർദ്ദത്തിലുള്ള ഓക്സിജൻ ടാങ്കിൽ നിന്നുള്ള ലീക്കേജ് പലപ്പോഴും ചെറിയ സ്പാർക്കിനെ വരെ വലിയ അഗ്നിബാധയിലേക്ക് നയിക്കും. 24 ശതമാനത്തിലധികം ഓക്സിജൻ അന്തരീക്ഷവായുവിലുണ്ടാകുന്നത് പ്രവചനാതീതമായ ഫലമുളവാക്കും. അധിക മർദ്ദത്തിലുള്ള ഓക്സിജൻ ഓയിൽ, ഗ്രീസ്, റബ്ബർ എന്നിവയുമായി പ്രതിപ്രവർത്തിക്കുമെന്നാണ് കണ്ടെത്തിയിട്ടുള്ളത്.

ഓക്സിജൻ സിലിണ്ടറുകൾ സാധാരണയായി ഇരുമ്പ് ബ്രാക്കറ്റുകൾ ഉപയോഗിച്ച് ഉറപ്പിച്ചിട്ടുണ്ടാവുമെങ്കിലും താൽക്കാലികമായി സിലിണ്ടർ വാഹനത്തിൽ എടുത്തുവച്ച് പോകുന്നവരുമുണ്ട്. ഇത്തരം സാഹചര്യങ്ങളിൽ വാഹനം ഇടിച്ചാലോ, വാഹനം ചെറുതായി ചെരിഞ്ഞാൽ പോലുമോ സിലിണ്ടർ മറിഞ്ഞുവീണോ, നിരങ്ങിനീങ്ങിയോ റെഗുലേറ്ററുകൾകൾക്ക് തകരാർ സംഭവിച്ച് ഓക്സിജൻ ലീക്കേജ് സംഭവിക്കുകയും അത് അഗ്നിബാധയിലേക്ക് നയിക്കുകയും ചെയ്യാം.

പരിഹാര മാർഗ്ഗങ്ങൾ

• കൃത്യമായ ഇടവേളകളിൽ മെയിന്റനൻസ് ചെയ്യുക. വാഹനം നിർത്തിയിട്ടിരുന്ന തറയിൽ ഓയിൽ ലീക്കേജ് ഉണ്ടോ എന്ന് പരിശോധിക്കുന്നതും ദിവസത്തിൽ ഒരിക്കലെങ്കിലും ബോണറ്റ് തുറന്ന് പരിശോധിക്കുന്നതും ശീലമാക്കുക. സ്വകാര്യവാഹനങ്ങളിലടക്കം ചെറിയ ഫയര്‍ എക്സ്റ്റിങ്ഗ്യൂഷർ എളുപ്പം ഉപയോഗിക്കാൻ കഴിയുന്ന രീതിയിൽ സൂക്ഷിക്കുക. വാഹനത്തിന്റെ പുറം മാത്രമല്ല, എഞ്ചിൻ കംപാർട്ട്മെന്റ് വൃത്തിയാക്കി വയ്ക്കുന്നതും ശീലമാക്കുക. ലീക്കേജ് കണ്ടെത്തുന്നതിനു മാത്രമല്ല, ചെറിയ അഗ്നിബാധ ഗുരുതരമാകുന്നത് തടയുന്നതിനും ഇത് ഉപകാരപ്പെടും.

• കൃത്യമായ ഇടവേളകളിൽ ഗ്യാസ് ലൈനുകളിൽ പരിശോധന നടത്തിയും, ഗ്യാസ് ലീക്കേജ് ഉണ്ടോയെന്ന് ഇടയ്ക്കിടെ പരിശോധിസിച്ചും ഗ്യാസിന്റെ ഗന്ധം അനുഭവപ്പെട്ടാൽ സർവ്വീസ് സെൻററിൽ കാണിച്ച് റിപ്പയർ ചെയ്യുകയും ചെയ്യുക.

• വാഹന നിർമ്മാതാക്കൾ നിഷ്കർഷിച്ചിട്ടുള്ളതും നിയമവിധേയമായതുമായ പാർട്സുകൾ ഉപയോഗിക്കുന്നതും അനാവശ്യമായ ആൾട്ടറേഷനുകളും ഒഴിവാക്കുക തന്നെ വേണം.

• ഇന്ധന കുഴലുകളും വയറുകളും കൃത്യമായി ക്ലിപ്പ് ചെയ്ത് ഉറപ്പിക്കണം.

• പാനൽ ബോർഡ് വാണിംഗ് ലാംപുകളും, മീറ്ററുകളും സദാ നിരീക്ഷിക്കുകയും കൃത്യമായ ഇടവേളകളിൽ കൂളന്റും എഞ്ചിൻ ഓയിലും മാറ്റുകയും ചെയ്യുക.

• വലിയ വാഹനങ്ങളിൽ പ്രൊപ്പല്ലർ ഷാഫ്റ്റിന് ഇരുമ്പ് ബ്രാക്കറ്റുകൾ ഘടിപ്പിക്കണം.
• കന്നാസിലും മറ്റും ഇന്ധനം വാങ്ങിസൂക്ഷിക്കുന്നതും കൊണ്ടുപോകുന്നതും കർശനമായി ഒഴിവാക്കണം.

• വളരെ ചൂടുള്ള കാലാവസ്ഥയിൽ ഡാഷ് ബോർഡിൽ വച്ചിട്ടുള്ള വാട്ടർ ബോട്ടിലുകൾ ലെൻസ് പോലെ പ്രവർത്തിച്ച് (പ്രിസം ഇഫക്ട്) സീറ്റ് അപ്ഹോൾസ്റ്ററിയും പ്ലാസ്റ്റിക് ഭാഗങ്ങളും തീപിടിച്ചിട്ടുള്ള സംഭവങ്ങൾ റിപ്പോർട്ട് ചെയ്യപ്പെട്ടിട്ടുണ്ട്.

• വിനോദയാത്രകളും മറ്റും പോകുമ്പോൾ സ്റ്റൗ ഉപയോഗിച്ച് ഭക്ഷണം പാകം ചെയ്യുന്നത് വാഹനത്തിൽ വച്ചാകരുത്.

• വാഹനത്തിനകത്ത് ഇന്ധനം, തീപ്പെട്ടി, ലൈറ്ററുകൾ, സ്പ്രേകൾ, സാനിറ്റൈസറുകൾ, സ്ഫോടകവസ്തുക്കൾ എന്നിവ സൂക്ഷിക്കുന്നത് ഒഴിവാക്കേണ്ടുന്ന ശീലങ്ങളിൽ ഒന്നാണ്.

• ആംബുലൻസുകളിൽ ഓക്സിജൻ സിലിണ്ടറുകൾ കൃത്യമായി ബ്രാക്കറ്റുകൾ ഉപയോഗിച്ച് ഉറപ്പിക്കുകയും റെഗുലേറ്ററുകൾക്ക് തകരാറുകളില്ല എന്ന് ഉറപ്പാക്കുകയും ചെയ്യേണ്ടതാണ്.

• സാധാരണ കാറിന്റെ സീറ്റുകളും മറ്റും അഗ്നിബാധയെ ചെറുക്കുന്ന രീതിയിലുള്ള മെറ്റീരിയൽസ് ഉപയോഗിച്ചാണ് നിർമ്മിക്കുക എന്നാൽ പെട്ടെന്ന് തീ ആളിപ്പിടിക്കുന്ന റെക്സിൻ കവറുകളും പോളിസ്റ്റർ തുണിക്കവറുകളും അഗ്നി ആളിപ്പിടിക്കുന്നതിന് കാരണമാകാം എന്നതിനാൽ തന്നെ ഒഴിവാക്കേണ്ടതാണ്.
സർവ്വോപരി ഡിഫൻസീവ് ഡ്രൈവിംഗ് രീതികൾ സ്വായത്തമാക്കുക എന്നതും പ്രധാനമാണ്

തീപിടിച്ചാൽ എന്തു ചെയ്യണം?

എത്രയും പെട്ടെന്ന് വാഹനം നിർത്തുകയും എൻഞ്ചിൻ ഓഫ് ആക്കുകയും ചെയ്യുക എന്നതാണ് അടിയന്തിരമായി ചെയ്യേണ്ടത്. ഇതു മൂലം തീ പെട്ടെന്ന് പടരുന്നതു തടയാം, മാത്രവുമല്ല വയറുകൾ ഉരുകിയാൽ ഡോർ ലോക്കുകൾ തുറക്കാൻ പറ്റാതെയും ഗ്ലാസ് താഴ്ത്താൻ കഴിയാതെയും കത്തുന്ന വാഹനത്തിനകത്ത് കുടുങ്ങിപ്പോകുന്ന അത്യന്തം അപകടകരമായ സാഹചര്യം ഉടലെടുക്കുകയും ചെയ്യാം. ഇത്തരം സാഹചര്യത്തിൽ സൈഡ് ഗ്ലാസ് പൊട്ടിക്കാനുള്ള ശ്രമം നടത്തുന്നതാണ് എളുപ്പം. സീറ്റിൽ കിടന്നുകൊണ്ട് കാലുകൾ ഉപയോഗിച്ച് വശങ്ങളിലെ ഗ്ലാസ്സുകൾ ചവിട്ടിപ്പൊട്ടിക്കാൻ ശ്രമിക്കണം.
ചുറ്റിക പോലുള്ള ഉപകരണങ്ങൾ വാഹനത്തിനകത്ത് കയ്യെത്താവുന്ന രീതിയിൽ സൂക്ഷിക്കുന്നത് ശീലമാക്കുക.

DCP ടൈപ്പ് ഫയര്‍ എക്സ്റ്റിങ്ഗ്യൂഷർ ചില വാഹനങ്ങൾക്ക് നിർബന്ധമാണ്. പാസഞ്ചർ വാഹനങ്ങളിലെങ്കിലും ഇത് നിർബന്ധമായും വാങ്ങി ഉപയോഗിക്കാൻ കഴിയുന്ന രീതിയിൽ സൂക്ഷിക്കുന്നത് ശീലമാക്കുക. വാഹനത്തിലെ യാത്രക്കാരെ പുറത്തിറക്കിയാൽ ആദ്യം ചെയ്യേണ്ടത്, ഫയർഫോഴ്സിനെ വിവരമറിയിക്കുക എന്നതാണ്. തീ നിയന്ത്രണാതീതമായതിനു ശേഷം അറിയിക്കുന്നത് വിലപ്പെട്ട സമയം നഷ്ടപ്പെടുത്തുന്നതിനു കാരണമാകും.

ഫയർ എക്സ്റ്റിങ്ഗ്യൂഷർ ഉപയോഗിച്ചോ, വെള്ളം ഉപയോഗിച്ചോ അഗ്നിബാധ നിയന്ത്രിക്കുന്നതിന് ശ്രമിക്കാവുന്നതാണ്. ഇവ ലഭ്യമല്ലെങ്കിൽ പൂഴിമണ്ണും ഉപയോഗിക്കാം. തീ നിയന്ത്രണാതീതമായി മാറിയാൽ വാഹനത്തിന്റെ സമീപത്തു നിന്ന് മാറി മറ്റ് വാഹനങ്ങൾ വരുന്നത് അത് വഴി വരുന്നത് തടയാൻ ശ്രമിക്കാം. ഇന്ധനടാങ്ക്, ടയർ എന്നിവ പൊട്ടിത്തെറിക്കാൻ സാധ്യതയുള്ളതിനാൽ അത് കൂടുതൽ അപകടത്തിന് ഇടയാക്കും.