ന്യൂഡല്‍ഹി: ദേശീയ മെഡിക്കല്‍ ബിരുദ പ്രവേശനത്തിനുളള നാഷണല്‍ എലിജിബിലിറ്റി കം എന്‍ട്രന്‍സ് (നീറ്റ് യു.ജി) പരീക്ഷയുടെ രജിസ്ട്രേഷന്‍ ആരംഭിച്ചു. neet.nta.nic.in എന്ന വെബ്സൈറ്റ് വഴിയാണ് രജിസ്ട്രേഷന്‍. ഏപ്രില്‍ ആറിന് രാത്രി ഒന്‍പതു മണി വരെ അപേക്ഷ സമര്‍പ്പിക്കാം.
ജനറല്‍ വിഭാഗത്തിന് 1,700/- രൂപയാണ് രജിസ്ട്രേഷന്‍ ഫീസ് ഇനത്തില്‍ അടക്കേണ്ടിവരിക. ഏപ്രില്‍ ആറ് രാത്രി 11.50 വരെ ഫീസ് അടക്കം. മേയ് ഏഴിനാണ് പരീക്ഷ നിശ്ചയിച്ചിരിക്കുന്നത്. മലയാളം ഉള്‍പ്പടെ 13 ഭാഷകളില്‍ പരീക്ഷ എഴുതാവുന്നതാണ്.
സര്‍ക്കാര്‍ അംഗീകൃത മെഡിക്കൽ/ ഡെന്റൽ/ ആയുഷ്, മറ്റ് കോളജുകൾ/ ഡീംഡ് സർവ്വകലാശാലകൾ/ ഇൻസ്റ്റിറ്റ്യൂട്ടുകൾ (എയിംസ്, ജിപ്മെർ) എന്നിവിടങ്ങളിലേക്കുള്ള മെഡിക്കല്‍ ബിരുദ പ്രവേശനപരീക്ഷയുടെ രജിസ്ട്രേഷനാണ് വിളിക്കുന്നത്. എം.ബി.ബി.എസ്/ ബി.ഡി.എസ്/ ബി.എ.എം.എസ്/ ബി.എസ്.എം.എസ് / ബി.യു.എം.എസ്/ ബി.എച്ച്.എം.എസ്, മറ്റ് ബിരുദ മെഡിക്കൽ കോഴ്സുകളിലേക്കാണ് ഇതുവഴി അഡ്മിഷന്‍ ലഭിക്കുക. കഴിഞ്ഞ വര്‍ഷം 17 ലക്ഷത്തിലധികം വിദ്യാർത്ഥികൾ നീറ്റ് പരീക്ഷക്ക് രജിസ്റ്റർ ചെയ്തിരുന്നു.
