ഡിസ്നി സ്റ്റാര്‍ ചൊവ്വാഴ്ച മുതല്‍ ഇന്ത്യയില്‍ സ്റ്റാര്‍ വേള്‍ഡ് ചാനലിന്റെ സംപ്രേഷണം അവസാനിപ്പിച്ചു. പുതിയ താരിഫ് ഓര്‍ഡര്‍ പ്രശ്നങ്ങള്‍ കാരണം സ്റ്റാര്‍ വേള്‍ഡ് ഡിസ്നി സ്റ്റാര്‍ ഇന്ത്യയില്‍ സംപ്രേഷണം നിര്‍ത്തുമെന്ന് 2020 ജൂണ്‍ 22-ന് തന്നെ റിപ്പോര്‍ട്ട് വന്നിരുന്നു. എന്നാല്‍ എന്‍ടിഒയെക്കുറിച്ചുള്ള വ്യക്തതയില്ലാത്തതിനാല്‍ ജനറല്‍ ഇംഗ്ലീഷ് എന്റെര്‍ടെയ്‌മെന്റ് ചാനലായ സ്റ്റാര്‍ വേള്‍ഡ് സംപ്രേഷണം അവസാനിപ്പിക്കാനുള്ള തീരുമാനം നീണ്ടു പോവുകയായിരുന്നു.
സ്റ്റാര്‍ വേള്‍ഡ്, സ്റ്റാര്‍ വേള്‍ഡ് എച്ച്ഡി, സ്റ്റാര്‍ വേള്‍ഡ് പ്രീമിയര്‍ എച്ച്ഡി എന്നീ ഇംഗ്ലീഷ് ചാനലുകളാണ് സ്റ്റാര്‍ മാര്‍ച്ച് 14 മുതല്‍ നിര്‍ത്തലാക്കിയത്. ഇതിനൊപ്പം തന്നെ ബേബി ടിവി, യുടിവി എച്ച്ഡി, സ്റ്റാര്‍ സ്പോര്ട്സ് 1 മറാത്തി, സ്റ്റാര്‍ സ്പോര്ട്സ് 1 ബംഗ്ലാ എന്നിവയാണ് ചൊവ്വാഴ്ച അര്‍ദ്ധരാത്രി മുതല്‍ ഡിസ്നി സ്റ്റാര്‍ അവസാനിപ്പിച്ചിട്ടുണ്ട്. അതേ സമയം യുടിവി ആക്ഷന്‍ സ്റ്റാര്‍ ഗോള്‍ഡ് ത്രില്‍സ് എന്നും യുടിവി മൂവീസ് സ്റ്റാര്‍ ഗോള്‍ഡ് റൊമാന്‍സ് എന്ന പേരില്‍ ഡിസ്നി സ്റ്റാര്‍ റീബ്രാന്റ് ചെയ്തിട്ടുണ്ട്.
സ്റ്റാര്‍ മൂവീസ് സെലക്ട്, സ്റ്റാര്‍ സ്പോര്ട്സ് 1 തമിഴ് എച്ച്ഡി, സ്റ്റാര്‍ സ്പോര്ട്സ് 1 തെലുങ്ക് എച്ച്ഡി, ഡിസ്നി ചാനല്‍ എച്ച്ഡി, സ്റ്റാര്‍ ഗോള്‍ഡ് 2 എച്ച്ഡി, വിജയ് സൂപ്പര്‍ എച്ച്ഡി, ഏഷ്യാനെറ്റ് മൂവീസ് എച്ച്ഡി എന്നീ ചാനലുകള്‍ മാര്‍ച്ച് 15 മുതല്‍ പുതുതായി സംപ്രേഷണം ആരംഭിച്ചിട്ടുണ്ട്. ഇംഗ്ലീഷ് എന്റര്‍ടെയ്‌മെന്റ് ചാനലുകള്‍ കുറച്ചുകാലമായി ഇന്ത്യയില്‍ കാണികളെ കിട്ടാതെ ബുദ്ധിമുട്ടുകയാണ്.
ടെലികോം റെഗുലേറ്ററി അതോറിറ്റി ഓഫ് ഇന്ത്യയുടെ (ട്രായ്) എന്‍ടിഒ 2019-ല്‍ നടപ്പിലാക്കിയതോടെയാണ് ഇത്തരം ചാനലുകളുടെ ദുരിതം ആരംഭിച്ചത്. ഒപ്പം തന്നെ ഇംഗ്ലീഷ് ടെലിവിഷന്‍ കാഴ്ചക്കാര്‍ ഒടിടി പ്ലാറ്റ്ഫോമുകളിലേക്ക് മാറിയതോടെ ഇവര്‍ കൂടുതല്‍ പ്രതിസന്ധിയിലായി. 2020-ല്‍ സോണി പിക്ചേഴ്സ് നെറ്റ്വര്‍ക്ക് ഇന്ത്യ എഎക്‌സ്എന്‍, എഎക്‌സ്എന്‍ എച്ച്ഡി എന്നിവ അടച്ചുപൂട്ടാന്‍ തീരുമാനിച്ചിരുന്നു. നെറ്റ്വര്‍ക്ക്18 എഫ് വൈഐ ടിവി18 നിര്‍ത്തലാക്കുകയും ചെയ്തിരുന്നു.
