ഗാര്‍ഹിക തൊഴിലാളികള്‍ക്ക് കൂടുതല്‍ അവകാശങ്ങള്‍ നല്‍കിക്കൊണ്ട് രാജ്യത്തെ തൊഴില്‍ നിയമത്തില്‍ പുതിയ പരിഷ്‌ക്കാരങ്ങള്‍ വരുത്താന്‍ സൗദിയിലെ മനുഷ്യവിഭവ, സാമൂഹിക വികസന മന്ത്രാലയം. ഇതിനായി പുതിയ നിയമ ഭേദഗതി കൊണ്ടുവന്നിരിക്കുകയാണ് അധികൃതര്‍. ഹൗസ് ഡ്രൈവര്‍മാര്‍ ഉള്‍പ്പെടെയുള്ള ഗാര്‍ഹിക തൊഴിലാളികള്‍ക്ക് മറ്റു തൊഴിലാളികളെ പോലെ ആഴ്ചയിലുള്ള അവധി, വാര്‍ഷിക അവധി, രോഗാവധി, സേവനാന്തര ആനുകൂല്യങ്ങള്‍ തുടങ്ങിയ അവകാശങ്ങള്‍ നല്‍കുന്നതാണ് പുതിയ ചട്ടങ്ങള്‍.
തൊഴില്‍ കരാര്‍
ഗാര്‍ഹിക തൊഴിലാളിയും സ്‌പോണ്‍സറും തമ്മില്‍ തൊഴില്‍ കരാര്‍ നിര്‍ബന്ധമാക്കുന്നതാണ് പുതിയ മാറ്റങ്ങള്‍. ഗാര്‍ഹിക തൊഴിലാളികളുടെ തൊഴില്‍ സംവിധാനം, അവകാശങ്ങള്‍, കടമകള്‍ എന്നിവ കൃത്യമായി വ്യക്തമാക്കുന്നതായിരിക്കണം തൊഴില്‍ കരാര്‍. തൊഴിലാളിയും സ്‌പോണ്‍സറും തമ്മിലുള്ള തൊഴില്‍ കരാര്‍ കൃത്യമായി തയ്യാറാക്കി ഓണ്‍ലൈന്‍ പ്ലാറ്റ്ഫോമില്‍ അപ് ലോഡ് ചെയ്യണമെന്നും പുതിയ മാര്‍ഗ നിര്‍ദ്ദേശങ്ങള്‍ വ്യവസ്ഥ ചെയ്യുന്നു. കരാറില്‍ ഉള്‍പ്പെട്ടിട്ടില്ലാത്ത തൊഴിലുകള്‍ ചെയ്യാന്‍ നിര്‍ബന്ധിക്കുന്നത് കരാര്‍ ലംഘനമായി പരിഗണിക്കപ്പെടും. ഹൗസ് ഡ്രൈവര്‍ തസ്തികയില്‍ ഉള്‍പ്പെടുന്നവര്‍ മറ്റു ജോലികള്‍ ചെയ്യുന്നതും നിയമ വിരുദ്ധമാണ്. തൊഴില്‍ കരാറില്‍ പറയുന്ന വ്യവസ്ഥകള്‍ ലംഘിച്ചാല്‍ ഇരു കൂട്ടര്‍ക്കും പരാതിപ്പെടാന്‍ അര്‍ഹതയുണ്ടാകും.
കൂടുതല്‍ അവധി
ഗാര്‍ഹിക തൊഴിലാളികള്‍ക്ക് മറ്റ് മേഖലയിലെ ജീവനക്കാരെ പോലെ ആഴ്ചയില്‍ ഒരു ദിവസം വിശ്രമ അവധിക്ക് അര്‍ഹതയുണ്ടായിരിക്കും. അതോടൊപ്പം വര്‍ഷത്തില്‍ 30 ദിവസത്തെ അവധിയും നല്‍കണം. രണ്ടു വര്‍ഷം പൂര്‍ത്തിയാവുന്ന മുറയ്ക്കാണ് ഇതിന് അര്‍ഹത ഉണ്ടായിരിക്കുക. അവധി എടുത്തില്ലെങ്കില്‍ അതിന് നഷ്ടപരിഹാരം നല്‍കണം. ഇതിനു പുറമെ, എന്തെങ്കിലും അസുഖം പിടിപെടുന്ന പക്ഷം 30 ദിവസത്തെ രോഗാവധിക്കും ഗാര്‍ഹിക തൊഴിലാളികള്‍ അര്‍ഹരാണ്. ഗ്രാറ്റുവിറ്റി അടക്കമുള്ള സേവനാനന്തര ആനുകൂല്യങ്ങള്‍ക്കും ഇവര്‍ക്ക് അര്‍ഹതയുണ്ടായിരിക്കുമെന്നും പുതിയ ഭേദഗതിയില്‍ വ്യക്തമാക്കുന്നുണ്ട്.
ബാങ്ക് അക്കൗണ്ടില്‍ ശമ്പളം
ഗാര്‍ഹിക ജീവനക്കാര്‍ക്ക് ബാങ്ക് അക്കൗണ്ട് വഴി ശമ്പളം നല്‍കണമെന്നും പുതിയ തൊഴില്‍ നിബന്ധനകളില്‍ പറയുന്നുണ്ട്. ശമ്പളത്തോടൊപ്പം മറ്റ് ആനുകൂല്യങ്ങളും ബാങ്ക് അക്കൗണ്ട് വഴി തന്നെ നല്‍കണം. അധിക ജോലിക്ക് തുല്യമായ അധിക വേതനവും നല്‍കണം.
21 വയസ്സില്‍ താഴെയുള്ളവരെ ജോലിക്ക് നിര്‍ത്തരുത്
21 വയസ്സിന് താഴെ പ്രായമുള്ള ഒരാളെ ഗാര്‍ഹിക തൊഴിലാളിയായി ജോലിക്ക് നിര്‍ത്താന്‍ പാടില്ലെന്നതാണ് മറ്റൊരു നിയമം. നിറം, ലിംഗം, പ്രായം, ദേശം എന്നിവയുടെ അടിസ്ഥാനത്തിലുള്ള വിവേചനം പാടില്ല. ഗാര്‍ഹിക തൊഴിലാളിയുടെ പാസ്പോര്‍ട്ടോ സ്വകാര്യ രേഖകളോ തിരിച്ചറിയല്‍ കാര്‍ഡോ വാങ്ങിവയ്ക്കാന്‍ സ്‌പോണ്‍സര്‍ക്ക് അധികാരമുണ്ടായിരിക്കില്ല.
അതേസമയം, തൊഴില്‍ വേളയില്‍ ലഭിക്കുന്ന സ്പോണ്‍സറെ കുറിച്ചോ വീട്ടുകാരെ കുറിച്ചോ ഉള്ള രഹസ്യങ്ങള്‍ മറ്റുള്ളവരുമായി പങ്കുവയ്ക്കാന്‍ പാടില്ലെന്നും നിയമം അനുശാസിക്കുന്നു. അനാവശ്യമായി സ്പോണ്‍സറുടെ വ്യക്തിപരമോ കുടുംബപരമോ ആയ കാര്യങ്ങളില്‍ ഇടപെടാന്‍ പാടില്ല. നിയമപരമായ കാരണങ്ങളില്ലാതെ ജോലിയില്‍ നിന്ന് മാറി നില്‍ക്കാന്‍ ജീവനക്കാര്‍ക്ക് അവകാശമുണ്ടിയിരിക്കില്ല. സ്വന്തം നിലയില്‍ മറ്റെന്തെങ്കിലും ജോലിയില്‍ ഏര്‍പ്പെടുന്നതിലും വിലക്കുണ്ട്. ഇസ്ലാമിക നിയമങ്ങളെയും സാമൂഹിക മൂല്യങ്ങളെയും രാജ്യത്ത് പ്രാബല്യത്തിലുള്ള മറ്റ് നിയമങ്ങളെയും അനുസരിക്കുകയും ബഹുമാനിക്കുകയും ചെയ്യണമെന്നും നിയമം വ്യവസ്ഥ ചെയ്യുന്നുണ്ട്.
