ജമ്മു കാശ്മീരിലെ രജൗരിയിൽ ഭീകരരുമായുണ്ടായ ഏറ്റുമുട്ടലിൽ രണ്ടു സൈനികർക്ക് വീരമൃത്യു. രാജൗരിയിലെ കാണ്ടി വനമേഖലയിലാണ് ഏറ്റുമുട്ടൽ നടന്നത്. കഴിഞ്ഞ മൂന്ന് ദിവസത്തിനിടെ ഉണ്ടാകുന്ന മൂന്നാമത്തെ ഏറ്റുമുട്ടലാണിത്.
കാണ്ടി വനമേഖലയിൽ ഭീകരരുടെ സാന്നിധ്യമുണ്ടെന്ന രഹസ്യ വിവരത്തിന്റെ അടിസ്ഥാനത്തിൽ സുരക്ഷാസേന രാവിലെ 7:30 ഓടെയാണ് സ്ഥലത്തെത്തിയത്. തുടർന്നു നടന്ന റെയ്ഡിനിടയിൽ സൈന്യവും ഭീകരരും തമ്മിൽ ശക്തമായ ഏറ്റുമുട്ടൽ നടക്കുകയായിരുന്നു. ഇതിനിടെ സൈനികർക്കു നേരെ ഭീകരർ സ്ഫോടകവസ്തു പ്രയോഗിക്കുകയും രണ്ട് സൈനികർ വീരമൃത്യു വരിക്കുകയായിരുന്നു എന്നും സൈന്യം പ്രസ്താവനയിൽ അറിയിച്ചു. ഒരു ഉദ്യോഗസ്ഥൻ ഉൾപ്പെടെ നാല് സൈനികർക്ക് പരിക്കേറ്റതായും റിപ്പോർട്ടുണ്ട്.
ഏറ്റുമുട്ടൽ സ്ഥലത്തേക്ക് കൂടുതൽ സൈന്യത്തെ അയച്ചതായാണ് വിവരം. പരിക്കേറ്റ ഉദ്യോഗസ്ഥരെ ഉദംപൂരിലെ കമാൻഡ് ഹോസ്പിറ്റലിലേക്ക് മാറ്റിയെന്നും സൈന്യം അറിയിച്ചു. ഒരു സംഘം ഭീകരർ ചെങ്കുത്തായ പാറക്കെട്ടുകളുള്ള പ്രദേശത്ത് കുടുങ്ങിക്കിടക്കുന്നതായും വിവരമുണ്ട്. ഭീകരരുടെ സംഘത്തിനും പരിക്കേറ്റിറ്റുണ്ടാകാനാണ് സാധ്യത. മേഖലയിൽ ഇപ്പോഴും ഓപ്പറേഷൻ പുരോഗമിക്കുകയാണ്.
