ഏകദിന ലോകകപ്പിലെ ഇന്ത്യന്‍ ടീമിന്റെ പുതിയ ജഴ്‌സി പങ്കുവച്ച് സ്‌പോണ്‍സര്‍മാരായ അഡിഡാസ്. ഇന്ന് വൈകുന്നേരം 7.30ന് ജഴ്‌സി ഔദ്യോഗികമായി ലോഞ്ച് ചെയ്യാനിരികയാണ് ഇത്. ഇന്ത്യ നിലവില്‍ ഉപയോഗിക്കുന്ന ഏകദിന കിറ്റിന്റെ അതേ തീം തന്നെയാണ് പുതിയ ജഴ്‌സിയും പിന്തുടരുന്നതെങ്കിലും അതില്‍ ചില നിര്‍ണായക മാറ്റങ്ങള്‍ വരുത്തിയിട്ടുണ്ട്.
തോളിലെ വെള്ള വരകള്‍ക്കുപകരം ഇന്ത്യയുടെ ത്രിവര്‍ണപതാകയാണ് കൂട്ടിച്ചേര്‍ത്തിരിക്കുന്നത്. ടീമിന്റെ ലോഗോയിലെ മൂന്ന് നക്ഷത്രങ്ങള്‍ക്ക് പകരം ഇതില്‍ രണ്ടെണ്ണമാണ് ഉള്ളത്. അത് 1983 ലെയും 2011 ലെയും ഇന്ത്യയുടെ ഐതിഹാസിക വിജയങ്ങളെയാണ് സൂചിപ്പിക്കുന്നത്. 3 കാ ഡ്രീം എന്നതാണ് ലോകകപ്പ് പ്രചാരണത്തിന് അഡിഡാസ് പുറത്തിറക്കിയ മുദ്രാവാക്യം. ടീം ഇന്ത്യയ്ക്ക് രാജ്യം നല്‍കുന്ന അചഞ്ചലമായ പിന്തുണ എന്നാണ് അഡിഡാസ് ഈ കാമ്പെയ്‌നെ വിശേഷിപ്പിച്ചിരിക്കുന്നത്.
