ലോകമെമ്പാടും ഏറെ ഉപയോക്താക്കളുള്ള വാട്ട്സ്ആപ്പിന്‍റെ ഐപാഡ് പതിപ്പ് വരുന്നു. ഐപാഡുകൾക്കായുള്ള വാട്ട്സ്ആപ്പ് ബീറ്റാ പതിപ്പിന്റെ ടെസ്റ്റിംഗ് മെറ്റ ആരംഭിച്ചതായാണ് റിപ്പോർട്ട്. ഐപാഡിന് അനുയോജ്യമായ ഒരു ബീറ്റ പതിപ്പിന്റെ പരീക്ഷണം തുടങ്ങിയതായും മൊബൈൽ പതിപ്പിന്റെ എല്ലാ ഫീച്ചറുകളും ഈ പതിപ്പിലുമുണ്ടാകുമെന്നുമാണ് വിവരം.
നിലവിൽ ഐപാഡ് ഉപയോക്താക്കൾ ആപ്പ് ഉപയോഗിക്കുന്നതിനായി വാട്ട്സ്ആപ്പ് വെബ് പതിപ്പിനെയാണ് ആശ്രയിക്കുന്നത്. ഇപ്പോൾ ഒരുക്കുന്ന ഐപാഡ് ഒഎസ്സിനെയുള്ള വാട്ട്സ്ആപ്പിലൂടെ ഉപയോക്താക്കൾക്ക് ഏത് ആപ്പിൾ ഡിവൈസുകളിലും അവരുടെ സന്ദേശങ്ങൾ ആക്‌സസ് ചെയ്യാൻ സാധിക്കും. വാട്ട്സ്ആപ്പ് ഉടൻ തന്നെ ഐപാഡ് ഒഎസ്സിനുളള പതിപ്പ് ഔദ്യോഗികമായി പുറത്തിറക്കുമെന്നാണ് റിപ്പോർട്ട്. ഈ പതിപ്പും ഐഫോണുമായി ലിങ്ക് ചെയ്തു കഴിഞ്ഞാൽ ഉപയോക്താക്കൾക്ക് അവരുടെ ഫോൺ ഇന്റർനെറ്റുമായി ബന്ധിപ്പിക്കേണ്ട ആവശ്യമില്ലാതെ തന്നെ ഐപാഡിൽ വാട്ട്സ്ആപ്പ് ഉപയോഗിക്കാൻ കഴിയും. കൂടാതെ സ്വകാര്യത ഉറപ്പാക്കുന്ന എൻഡ്-ടു-എൻഡ് എൻക്രിപ്ഷൻ ഫീച്ചറുമുണ്ടാകും. എന്നാൽ ഐപാഡിനുള്ള വാട്ട്സ്ആപ്പ് പതിപ്പ് എപ്പോൾ മുതൽ ലഭ്യമാകുമെന്ന് ഔദ്യോഗിക പ്രഖ്യാപനം ഉണ്ടായിട്ടില്ല.
