ഹമാസിനെതിരായ പോരാട്ടം ആരംഭിച്ച് ഇതുവരെ വിവിധ ഭീകരസംഘങ്ങളുടെ 11,000 കേന്ദ്രങ്ങള്‍ തകര്‍ത്തതായി ഇസ്രായേല്‍. കഴിഞ്ഞ രാത്രിയില്‍ വ്യോമാക്രമണത്തില്‍ ജബലിയയിലെ ഹമാസ് കേന്ദ്രം പൂര്‍ണമായും നശിച്ചു.
ആക്രമണ സമയത്ത് നിരവധി ഹമാസ് ഭീകരര്‍ ഇവിടെ ഉണ്ടായിരുന്നതായാണ് വിവരം. ഹമാസിന്റെ സെന്റര്‍ ജബലിയ ബറ്റാലിയന്‍ കമാന്‍ഡര്‍ ഇബ്രാഹിം ബിയാരിയും കൊല്ലപ്പെട്ടവരിലുള്‍പ്പെടുന്നു. കൂടാതെ വെസ്റ്റ് ബാങ്കില്‍ പിടികിട്ടാപ്പുള്ളികളായുള്ള 46 പാലസ്തീനികളെ വധിച്ചു.
ഭീകരരെ സഹായിക്കുകയും അവര്‍ക്ക് ധനസഹായം നല്കുകയും ചെയ്ത, വെസ്റ്റ് ബാങ്കിലെ രാഷ്ട്രീയ പാര്‍ട്ടിയായ ഫതഹിന്റെ ജനറല്‍ സെക്രട്ടറി അതാ അബു റുമാലിയയെയും മകനെയും പോലീസ് അറസ്റ്റ് ചെയ്തു.
യുദ്ധമാരംഭിച്ച് ഇതുവരെ 12 സൈനികര്‍ കൊല്ലപ്പെട്ടതായി ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു അറിയിച്ചു. വളരെ സങ്കീര്‍ണമായ യുദ്ധത്തിലാണ് ഇസ്രായേല്‍. അതില്‍ സുപ്രധാനമായ നേട്ടങ്ങളുണ്ട്, നിര്‍ഭാഗ്യവശാല്‍ വേദനാജനകമായ നഷ്ടങ്ങളും. അദ്ദേഹം കൂട്ടിച്ചേര്‍ത്തു.
