വാട്‌സ്ആപ്പില്‍ പുതിയ ഒരു ഫീച്ചര്‍ കൂടി എത്തിച്ചിരിക്കുകയാണ് കമ്പനി. പുതിയ ഫീച്ചര്‍ കൂടുതലായി ഉപകാരപ്പെടുക വാട്‌സ്ആപ്പ് ഗ്രൂപ്പുകള്‍ക്കാണ്. വോയ്സ് ചാറ്റ് ഫീച്ചറാണ് അവതരിപ്പിച്ചിരിക്കുന്നത്.
ക്ലബ് ഹൗസ്, ടെലഗ്രാം, ഡിസ്‌കോര്‍ഡ് എന്നിവയില്‍ ഇതിനകം ലഭ്യമായ ഫീച്ചറാണ് വാട്‌സ്ആപ്പിലും അവതരിപ്പിച്ചിരിക്കുന്നത്. ഗ്രൂപ്പ് വോയ്സ് കോള്‍, വീഡിയോകോള്‍ ഉള്‍പ്പെടെ ഗ്രൂപ്പ് അംഗങ്ങള്‍ക്ക് സംവദിക്കാനുള്ള മറ്റ് ഫീച്ചറുകള്‍ ഇതിനകം വാട്‌സ്ആപ്പില്‍ ലഭ്യമാണ്. വോയ്സ് മെസേജ് പോലെയല്ല വോയ്സ് ചാറ്റ് പ്രവര്‍ത്തിക്കുന്നത്. ഗ്രൂപ്പ് അംഗങ്ങള്‍ക്ക് ഒരു വോയ്സ് ചാറ്റ് ആരംഭിക്കാനാവും. അതില്‍ പങ്കെടുക്കാനും സംസാരിക്കാനും താല്‍പര്യമുള്ളവര്‍ക്ക് പങ്കെടുക്കാം.
ഗ്രൂപ്പ് വോയ്സ് കോള്‍ ആരംഭിക്കുമ്പോള്‍ ഫോണ്‍ റിങ് ചെയ്യുന്നതുപോലെ വോയ്സ് ചാറ്റില്‍ റിങ് ഉണ്ടാകില്ല. പകരം ഒരു പുഷ് നോട്ടിഫിക്കേഷന്‍ മാത്രമായിരിക്കും ലഭിക്കുക. വോയ്സ് ചാറ്റില്‍ പങ്കെടുത്തുകൊണ്ടു തന്നെ മറ്റ് വാട്സാപ്പ് ചാറ്റുകള്‍ ഉപയോഗിക്കാനാവും. ചാറ്റില്‍ പങ്കെടുക്കാതെ തന്നെ ആരെല്ലാം ചാറ്റില്‍ പങ്കെടുക്കുന്നുണ്ടെന്നും കാണാനാകും.
33 മുതല്‍ 128 ആളുകള്‍ വരെയുള്ള വലിയ ഗ്രൂപ്പുകളിലാണ് വോയ്സ് ചാറ്റ് ഫീച്ചര്‍ അവതരിപ്പിച്ചിരിക്കുന്നത്. വോയ്സ് ചാറ്റ് ആരംഭിക്കുമ്പോള്‍ ചെറിയൊരു ബാനറായി വാട്സാപ്പിന് മുകളിലായി ആക്റ്റീവ് ചാറ്റിന്റെ വിവരങ്ങള്‍ കാണാം.
