ആശങ്കകള്‍ക്ക് വിരാമമിട്ട് ഓയൂരില്‍നിന്ന് കാണാതായ അബിഗേല്‍ സാറ എന്ന ആറു വയസുകാരിയെ കണ്ടെത്തി. കൊല്ലം ആശ്രമം മൈതാനത്ത് ഉപേക്ഷിക്കപ്പെട്ട നിലയിലാണ് കുട്ടിയെ കണ്ടെത്തിയത്. കുട്ടിയെ കാണാതായി 19 മണിക്കൂർ പിന്നിടുമ്പോഴാണ് കുട്ടിയെ കണ്ടെത്തിയെന്ന ആശ്വാസവാര്‍ത്ത എത്തുന്നത്.
തിങ്കളാഴ്ച വൈകിട്ടോടെയാണ് കൊല്ലം പൂയപ്പള്ളി കാറ്റാടിയിൽ വച്ച് കാറിൽ എത്തിയ അജ്ഞാത സംഘം അബിഗേല്‍ സാറ എന്ന കുട്ടിയെ തട്ടികൊണ്ട് പോയത്. ഒപ്പം ഉണ്ടായിരുന്ന സഹോദരനെ തട്ടി മാറ്റിയായിരുന്നു ഈ നീക്കം. തുടര്‍ന്നു സംസ്ഥാനവ്യാപകമായി അന്വേഷണം ഊര്‍ജ്ജിതമാക്കിയിരുന്നു. ഈ സാഹചര്യത്തില്‍ ചൊവ്വാഴ്ച ഉച്ചയോടെ കൊല്ലം ആശ്രാമം മൈതാനത്ത് ഉപേക്ഷിച്ചനിലയിൽ ആറുവയസ്സുകാരിയെ കണ്ടെത്തുകയായിരുന്നു. ആരോഗ്യസ്ഥിതി വിലയിരുത്തിയശേഷം പൊലീസ് കുട്ടിയെ വീട്ടിലെത്തിക്കുമെന്നാണ് വിവരം.
