ഇമാജിന്‍ എന്ന പേരില്‍ എഐ അധിഷ്ഠിത ഇമേജ് ജനറേറ്റര്‍ പ്ലാറ്റ്ഫോം അവതരിപ്പിച്ച് മെറ്റ. പ്രാദേശിക ഭാഷകളില്‍ നിര്‍ദ്ദേശങ്ങള്‍ നല്‍കി എഐ മുഖേന ചിത്രങ്ങള്‍ നിര്‍മ്മിക്കാനാകുന്ന പ്ലാറ്റ്ഫോമാണിത്. ഡാല്‍.ഇ, ലിയനാര്‍ഡോ എഐ, മിഡ്ജേണി എന്നീ പ്ലാറ്റ്ഫോമുകള്‍ക്ക് സമാനമാണ് മെറ്റ അവതരിപ്പിച്ച പുതിയ പ്ലാറ്റഫോമും.
ഈ കഴിഞ്ഞ നവംബറില്‍ നടന്ന കണക്ട് ഡെവലപ്പര്‍ കോണ്‍ഫറന്‍സിലാണ് മെറ്റ ഇമേജ് ജനറേറ്റര്‍ പ്രദര്‍ശിപ്പിച്ചത്. മുമ്പ് മെറ്റയുടെ എഐ ചാറ്റ്ബോട്ടിനൊപ്പം തന്നെ ലഭ്യമായിരുന്ന ഈ ടൂള്‍ ഇപ്പോള്‍ പ്രത്യേക പ്ലാറ്റ്ഫോമായി രൂപകല്‍പ്പന ചെയ്തിരിക്കുകയാണ്.
മെറ്റയുടെ എമു ഇമേജ് ജനറേഷന്‍ മോഡല്‍ ഉപയോഗിച്ചാണ് ഇമാജിന്‍ വിത്ത് മെറ്റയുടെ പ്രവര്‍ത്തനം. നിലവില്‍ യുഎസിലെ ഉപയോക്താക്കള്‍ക്ക് ഈ സേവനം സൗജന്യമായി ലഭിക്കും. imagine.meta.com യുആര്‍എല്‍ സന്ദര്‍ശിച്ചാല്‍ ഉപഭോക്താക്കള്‍ക്ക് സേവനം ലഭിക്കും. ഈ ടൂള്‍ മുഖേന നിര്‍മ്മിക്കുന്ന ചിത്രങ്ങള്‍ക്ക് താഴെയായി എഐ നിര്‍മിതമാണെന്ന് വ്യക്തമാക്കുന്ന വാട്ടര്‍മാര്‍ക്കും ഉള്‍പ്പെടുത്തും.
