അമേരിക്കന്‍ നടനും സംവിധായകനുമായ കാള്‍ വെതേഴ്‌സ് അന്തരിച്ചു. 76 വയസായിരുന്നു. ഉറങ്ങിക്കിടക്കുമ്പോഴായിരുന്നു മരണമെന്ന് കുടുംബം അറിയിച്ചു. 50 വര്‍ഷം നീണ്ട അഭിനയ ജീവിതത്തില്‍ 75ലധികം സിനിമകളിലും നിരവധി ടിവി ഷോകളിലും നടന്‍ അഭിനയിച്ചിട്ടുണ്ട്.
ഫുട്ബോളില്‍ നിന്ന് അഭിനയ രംഗത്തേക്ക് ചുവടുവച്ച നടനാണ് കാള്‍ വെതേഴ്‌സ്. അഭിനയിച്ചതില്‍ അധികവും ആക്ഷന്‍ കോമഡി ചിത്രങ്ങളാണ്. അര്‍നോള്‍ഡ് ഷ്വാസ്‌നഗര്‍ നായകനായ ‘പ്രെഡേറ്റര്‍’, റോക്കി സീരീസ്, ഹാപ്പി ഗില്‍മോര്‍, ദ മണ്ഡലോറിയന്‍, അറസ്റ്റെഡ് ഡെവലപ്‌മെന്റ് തുടങ്ങിയവയാണ് പ്രധാന ചിത്രങ്ങള്‍. നിരവധി ടെലിവിഷന്‍ സീരീസ് എപ്പിസോഡുകള്‍ സംവിധാനം ചെയ്തിട്ടുണ്ട്. 2021ല്‍ എമ്മി പുരസ്‌കാരത്തിന് നാമനിര്‍ദേശം ചെയ്യപ്പെട്ടിട്ടുണ്ട്.
വെതേഴ്‌സ് ആദ്യമായി അറിയപ്പെട്ടിരുന്നത് ആദ്യ നാല് റോക്കി ചിത്രങ്ങളില്‍ സില്‍വസ്റ്റര്‍ സ്റ്റാലോണിനൊപ്പം അപ്പോളോ ക്രീഡ് എന്ന കഥാപാത്രം അഭിനയിച്ചതിലൂടെയാണ്. വെതേഴ്‌സ് അഭിനയിച്ച ദൃശ്യങ്ങള്‍ മൈക്കല്‍ ബി ജോര്‍ദാന്‍ സിനിമകളിലും ഉപയോഗിച്ചിട്ടുണ്ട്.
