മാനന്തവാടിയിലിറങ്ങിയ കാട്ടാനയെ ഇന്ന് മയക്കുവെടി വെക്കും. ഓപ്പറേഷന്‍ ബേലൂര്‍ മഖ്ന എന്ന പേരിലാണ് മിഷന്‍ ആരംഭിച്ചിരിക്കുന്നത്. ആനയെ മയക്കുവെടി വെക്കാനുള്ള ദൗത്യം പുനഃരാരംഭിച്ചു. ദൗത്യത്തിന്റെ ഭാഗമായി കുങ്കിയാനകള്‍ പടമലയിലെത്തി.
കാട്ടാനയെ പിടികൂടി മുത്തങ്ങയിലേക്ക് മാറ്റാനാണ് തീരുമാനം. ഇന്നലെ ബേലൂര്‍ മഖ്നയെന്ന കാട്ടാനയിറങ്ങിയത് മാനന്തവാടി ജനവാസ മേഖലയിലാണ്. കര്‍ണാടക ജനവാസമേഖലയില്‍ നിന്നാണ് ഈ കാട്ടാനയെ കഴിഞ്ഞ ദിവസം കാടുകയറ്റിയത്.
ആനയെ മയക്കുവെടി വെക്കാനുള്ള നടപടികള്‍ ഇന്നലെ തന്നെ ആരംഭിച്ചിരുന്നുവെങ്കിലും സാധിച്ചിരുന്നില്ല. നിലവില്‍ ആനയെ ജനവാസ മേഖലയില്‍ നിന്ന് തുരത്തി കാടുകയറ്റിയിരുന്നു. ആന അനുയോജ്യമായ സ്ഥലത്തെത്തിയാല്‍ ഉടന്‍ മയക്കുവെടി വെക്കും. അതേസമയം ആന ഇന്നലെ കൊലപ്പെടുത്തിയ അജിയുടെ സംസ്‌കാരം ഇന്ന് നടക്കും.
