ചെങ്കടലിലും ഏദന്‍ ഉള്‍ക്കടലിലും ഹൂതികള്‍ തൊടുത്ത 15 ഡ്രോണ്‍ വെടിവച്ചിട്ടതായി അമേരിക്ക. ശനിയാഴ്ച പ്രാദേശിക സമയം പുലര്‍ച്ചെ നാലിനും 6.30നും ഇടയിലാണ് ഡ്രോണുകള്‍ തകര്‍ത്തതെന്ന് അമേരിക്കന്‍ സൈന്യത്തിന്റെ സെന്‍ട്രല്‍ കമാന്‍ഡ് അറിയിച്ചു.
അമേരിക്കന്‍ വാണിജ്യ കപ്പല്‍ ഹൂതികള്‍ ആക്രമിച്ചതിനുപിന്നാലെയാണ് ഡ്രോണുകള്‍ തകര്‍ത്തത്. വെള്ളിയാഴ്ച ഏദന്‍ ഉള്‍ക്കടലില്‍ സിംഗപ്പുര്‍ പതാകയുള്ള ചരക്കുകപ്പല്‍ പ്രോപ്പെല്‍ ഫോര്‍ച്യൂണ്‍ ലക്ഷ്യമിട്ട് മിസൈല്‍ ആക്രമണം നടത്തിയതായി ഹൂതി വക്താവ് യഹിയ സരീ അറിയിച്ചിരുന്നു. എന്നാല്‍, കപ്പലിന് കേടുപാടുകള്‍ ഉണ്ടായിട്ടില്ല. ഇതിനു പിന്നാലെ അമേരിക്കന്‍ യുദ്ധക്കപ്പലുകള്‍ക്കുനേരെ 37 ഡ്രോണ്‍ തൊടുത്തതായും ഹൂതികള്‍ അറിയിച്ചിരുന്നു.
