ഗാസയിലെ ജനങ്ങള്‍ക്കെതിരായ യുദ്ധം ഇസ്രായേല്‍ അവസാനിപ്പിച്ചാല്‍ ബന്ദി കൈമാറ്റം ഉള്‍പ്പെടെയുള്ള ഒരു സമ്പൂര്‍ണ്ണ കരാറിലെത്താന്‍ തയ്യാറാണെന്ന് ഹമാസ്. ആക്രമണം അവസാനിപ്പിക്കാന്‍ യുഎന്‍ ഉന്നത കോടതിയായ അന്താരാഷ്ട്ര നീതിന്യായ കോടതി (ഐസിജെ) ഉത്തരവിട്ടെങ്കിലും തെക്കന്‍ ഗാസ നഗരമായ റഫയില്‍ ഇസ്രായേല്‍ ആക്രമണം ശക്തമാക്കിയ സാഹചര്യത്തിലാണ് ഹമാസിന്റെ പ്രസ്താവന.
‘ഗാസയിലെ ഞങ്ങളുടെ ജനങ്ങള്‍ക്കെതിരായ യുദ്ധവും ആക്രമണവും അവസാനിപ്പിച്ചാല്‍, സമഗ്രമായ ഒരു വിനിമയ ഇടപാട് ഉള്‍പ്പെടുന്ന ഒരു സമ്പൂര്‍ണ്ണ കരാറിലെത്താനാണ് ഞങ്ങളുടെ സന്നദ്ധത എന്ന ഞങ്ങളുടെ വ്യക്തമായ നിലപാട് ഞങ്ങള്‍ മധ്യസ്ഥരെ അറിയിച്ചു,’ ഹമാസ് പ്രസ്താവനയില്‍ വ്യക്തമാക്കി.
വെടിനിര്‍ത്തലിനായുള്ള ഹമാസിന്റെ മുന്‍കാല വാഗ്ദാനങ്ങളെല്ലാം ഇസ്രായേല്‍ നിരസിച്ചിരുന്നു. തങ്ങളുടെ നാശത്തിലേക്ക് കൂപ്പുകുത്തുന്ന ഭീകര സംഘത്തെ തുടച്ചുനീക്കാനാണ് തീരുമാനമെന്നും ഇസ്രായേല്‍ പറഞ്ഞിരുന്നു. ബന്ദികളെ രക്ഷിക്കുന്നതിലും ഹമാസ് പോരാളികളെ വേരോടെ പിഴുതെറിയുന്നതിലുമാണ് റാഫയിലെ ആക്രമണം ഊന്നല്‍ നല്‍കുന്നതെന്ന് ഇസ്രായേല്‍ പറയുന്നു.
ഗാസയിലെ ഹമാസിനെതിരായ തങ്ങളുടെ യുദ്ധം വര്‍ഷം മുഴുവനും തുടരുമെന്ന് ഇസ്രായേല്‍ ചൊവ്വാഴ്ച പറഞ്ഞിരുന്നു. റാഫ ആക്രമണം യുഎസ് നയത്തില്‍ മാറ്റം വരുത്തുന്ന ഒരു വലിയ ഗ്രൗണ്ട് ഓപ്പറേഷനായി കണക്കാക്കുന്നില്ലെന്ന് വാഷിംഗ്ടണ്‍ പറഞ്ഞതിന് പിന്നാലെയാണ് ഇസ്രായേലും നയം വ്യക്തമാക്കിയത്.
