ലോകത്ത് ആദ്യമായി മനുഷ്യര്‍ക്ക് പക്ഷിപ്പനി പ്രതിരോധ കുത്തിവയ്പ്പുകള്‍ നല്‍കാന്‍ ഫിന്‍ലാന്‍ഡ്. മൃഗങ്ങളുമായി സമ്പര്‍ക്കം പുലര്‍ത്തുന്ന തൊഴിലാളികള്‍ക്ക് അടുത്ത ആഴ്ച പക്ഷിപ്പനി പ്രതിരോധ കുത്തിവയ്പ്പുകള്‍ നല്‍കാന്‍ തുടങ്ങുമെന്ന് അധികൃതര്‍ അറിയിച്ചു.
10,000 പേര്‍ക്ക് വാക്‌സിനുകള്‍ ആദ്യ ഘട്ടത്തില്‍ നല്‍കാനാണ് തീരുമാനം. ഓസ്ട്രേലിയന്‍ നിര്‍മ്മാതാക്കളായ CSL സെക്വിറസില്‍ നിന്ന് 15 രാജ്യങ്ങള്‍ക്കായി 40 ദശലക്ഷം ഡോസുകള്‍ ഇതുവരെ വാങ്ങിയിട്ടുണ്ട്. വാക്‌സിന്‍ ആദ്യം പുറത്തിറക്കുന്നത് ഫിന്‍ലന്‍ഡായിരിക്കുമെന്ന് സിഎസ്എല്‍ സെക്വിറസ് വാര്‍ത്താ ഏജന്‍സിയായ റോയിട്ടേഴ്‌സിനോട് സ്ഥിരീകരിച്ചു.
പക്ഷി, കോഴി ഫാമുകളിലെ തൊഴിലാളികള്‍, പക്ഷിപ്പനി സാമ്പിളുകള്‍ കൈകാര്യം ചെയ്യുന്ന ലാബ് ടെക്‌നീഷ്യന്‍മാര്‍, മൃഗസംരക്ഷണ ഓഫീസര്‍മാരായി ജോലി ചെയ്യുന്ന മൃഗഡോക്ടര്‍മാര്‍, കന്നുകാലി ഫാമുകള്‍, മൃഗങ്ങളുടെ ഉപോല്‍പ്പന്ന സംസ്‌കരണ പ്ലാന്റുകള്‍ എന്നിവയ്ക്കായി സങ്കേതങ്ങളില്‍ പ്രവര്‍ത്തിക്കുന്ന തൊഴിലാളികള്‍ എന്നിവര്‍ക്ക് വാക്‌സിനുകള്‍ നല്‍കും.
അവരുടെ ജോലിയോ സാഹചര്യങ്ങളോ കാരണം ഏവിയന്‍ ഇന്ഫ്ലുവന്സ പിടിപെടാനുള്ള സാധ്യത കൂടുതലുള്ള 18 വയസും അതില്‍ കൂടുതലുമുള്ളവര്‍ക്ക് വാക്‌സിന്‍ ലഭ്യമാകുമെന്ന് ഫിന്നിഷ് ഇന്‍സ്റ്റിറ്റ്യൂട്ട് ഫോര്‍ ഹെല്‍ത്ത് ആന്‍ഡ് വെല്‍ഫെയര്‍ (THL) പ്രസ്താവനയില്‍ പറഞ്ഞു.
പക്ഷികളെ ബാധിക്കുന്ന ഒരു വൈറസ് രോഗമാണ്, പക്ഷിപ്പനി (Avian flu, Bird flu). പക്ഷികളില്‍ വരുന്ന ഒരുതരം വൈറല്‍ പനിയാണിത്. ഏവിയന്‍ ഇന്ഫ്ലുവന്സ വൈറസാണ് പനിക്ക് കാരണമാകുന്നത്. പെട്ടെന്ന് പടരുന്നതിനാല്‍ പക്ഷികള്‍ കൂട്ടത്തോടെ ചാകും. മനുഷ്യരിലേക്ക് രോഗം പടരാന്‍ സാധ്യതയുണ്ടെന്നുള്ളതാണ് പക്ഷിപ്പനിയുടെ പ്രത്യേകത. രോഗബാധിതരായ പക്ഷികളുമായി അടുത്ത സമ്പര്‍ക്കം പുലര്‍ത്തുന്ന മനുഷ്യര്‍ക്ക് പക്ഷിപ്പനി, കോഴി തൊഴിലാളികളെപ്പോലുള്ള അണുബാധകള്‍ ഉണ്ടാകാനുള്ള സാധ്യതയുണ്ട്. വൈറസ് ഒരു വ്യക്തിയുടെ കണ്ണിലോ മൂക്കിലോ വായിലോ കടക്കുമ്പോഴോ ശ്വസിക്കുമ്പോഴോ ഇത് സംഭവിക്കാം. പക്ഷികളില്‍ നിന്നും മനുഷ്യനിലേക്ക് പടര്‍ന്നു പിടിക്കുന്ന ഈ രോഗം 2003 ല്‍ ഏഷ്യയാകെ ഭീതി വിതച്ചിരുന്നു.
