ഭൂമി രജിസ്‌ട്രേഷന്‍, അളവ്, പോക്കുവരവ് എന്നിവയെല്ലാം പൂര്‍ണമായി ഓണ്‍ലൈനാകുന്നു. രജിസ്‌ട്രേഷന്‍, റവന്യൂ, സര്‍വേ വകുപ്പുകളില്‍ നടന്നിരുന്ന ഭൂ സേവനങ്ങള്‍ ഒറ്റ പോര്‍ട്ടലിലേക്ക് മാറ്റുന്നതോടെ ഈ മൂന്ന് കാര്യങ്ങളും വീട്ടിലിരുന്ന് ചെയ്യാനാകുമെന്നതാണ് നേട്ടം. ഭൂമിയിടപാടിന് മുന്‍പായി വില്‍ക്കാന്‍ ഉദ്ദേശിക്കുന്ന ഭൂമിയുടെ തണ്ടപ്പേര്‍ സര്‍ട്ടിഫിക്കറ്റിന് വേണ്ടി റവന്യൂ വകുപ്പിനും സ്‌കെച്ചിനായി സര്‍വേ വകുപ്പിനും അപേക്ഷ നല്‍കണം
ഇവ കിട്ടിയാല്‍ രജിസ്‌ട്രേഷനിലേക്ക് കടക്കാം. ആധാരത്തിന്റെ വിവിധ മാതൃകകള്‍ പോര്‍ട്ടലില്‍ ഉണ്ടാകും. തങ്ങള്‍ക്ക് അനുയോജ്യമായ മാതൃക ആധാരത്തില്‍ വ്യക്തിവിവരങ്ങള്‍ ചേര്‍ത്താല്‍ മതി. ആധാരമെഴുത്തുകാരുടെ സഹായത്തോടെയും ഇത് ചെയ്യാംഇ- സ്റ്റാമ്പിനും രജിസ്‌ട്രേഷനുമുള്ള ഫീസ് ഉപഭോക്താവിന്റെ അക്കൗണ്ടില്‍ നിന്ന് നേരിട്ട് അടയ്ക്കണം.
ഇടനിലക്കാരെ ഒഴിവാക്കാനും അധിക ഫീസ് വാങ്ങാതിരിക്കാനുമാണിത്. ആധാരമെഴുത്ത് പൂര്‍ത്തിയായാല്‍ ഒപ്പിടുന്നതിന് ഉടമ സബ് രജിസ്ട്രാര്‍ ഓഫീസില്‍ പോകേണ്ടിവരും. സബ് രജിസ്ട്രാര്‍ ഓഫീസില്‍ എത്താതെ രജിസ്‌ട്രേഷന്‍ നടത്തുന്ന സംവിധാനം കൊണ്ടുവരാനും ശ്രമം നടക്കുന്നുണ്ട്.രജിസ്‌ട്രേഷന്‍ നടക്കുമ്പോള്‍ തന്നെ സര്‍വേ, റവന്യൂ രേഖകളില്‍ പുതിയ ഉടമയുടെ പേരും വിവരങ്ങളും രേഖപ്പെടുത്തും.
അതുകൊണ്ടുതന്നെ പോക്കുവരവ് ചെയ്യാന്‍ പ്രത്യേക അപേക്ഷ നല്‍കേണ്ടതില്ല. സ്ഥലപരിശോധന ആവശ്യമുള്ള പോക്കുവരവ് കേസുകളില്‍, ഉദ്യോഗസ്ഥ സംഘത്തിന് തത്സമയം തന്നെ അറിയിപ്പ് നല്‍കും. ഐ.എല്‍.എം.ഐ.എസ്. പോര്‍ട്ടല്‍ വഴി ഓണ്‍ലൈനായി മൂന്നു വകുപ്പുകള്‍ക്കുമുള്ള ഫീസ് അടയ്ക്കാം.
