പിറന്നാള്‍ നമ്മളില്‍ ഭൂരിഭാഗംപേര്‍ക്കും ഏറെ പ്രത്യേകതയുള്ള ദിവസമാണ്. അന്ന് വ്യത്യസ്തമായി ആഘോഷിക്കാന്‍ ആണ് നാം ഓരോരുത്തരും ആഗ്രഹിക്കുന്നത്. യുകെയിലെ 102 വയസ്സുകാരിയായ മുത്തശ്ശി തന്റെ പിറന്നാളാഘോഷിച്ചത് ആകാശത്ത് ആണെന്നാണ് പുറത്തു വരുന്ന റിപ്പോര്‍ട്ട്.
മെനെറ്റ് ബെയ്ലി എന്ന മുത്തശ്ശി ആണ് സ്‌കൈഡൈവിങ് നടത്തി തന്റെ 102-ാം പിറന്നാള്‍ ആഘോഷമാക്കിയത്. ഏഴായിരം അടി ഉയരത്തില്‍ നിന്ന് സ്‌കൈഡൈവിങ് ചെയ്ത് ബ്രിട്ടന്റെ ചരിത്രത്തിലെ തന്നെ ഏറ്റവും പ്രായമേറിയ സ്‌കൈഡൈവര്‍ ആയി മാറിയിരിക്കുകയാണ് ഇപ്പോള്‍ മെനെറ്റ്.
ഇതിന്റെ വീഡിയോ ഡെയ്ലി മെയിലാണ് ഇന്‍സ്റ്റഗ്രാമിലൂടെ പങ്കുവച്ചത്. ഇന്‍സ്ട്രക്ടര്‍ക്കൊപ്പം മെനറ്റ് വിമാനത്തില്‍ നിന്ന് ചാടുന്നതും കുറച്ചുകഴിഞ്ഞ് ഭൂമിയില്‍ ലാന്‍ഡ് ചെയ്യുന്നതും വീഡിയോയില്‍ കാണാം. എങ്ങനെയുണ്ടായിരുന്നു അനുഭവം എന്ന ചോദ്യത്തിന് ‘മനോഹരമായിരുന്നു’ എന്നാണ് മുത്തശ്ശി മറുപടി പറയുന്നത്. സോഷ്യല്‍ മീഡിയയില്‍ ട്രെന്‍ഡിങ് ആണ് ഈ വിഡിയോ.
