ഇറ്റലിയുടെ ഫുട്‌ബോൾ ഇതിഹാസം സാൽവതോറെ സ്‌കില്ലാച്ചി അന്തരിച്ചു. 59 വയസ്സായിരുന്നു. അർബുദബാധിതനായി ചികിത്സയിൽ കഴിയവേ, പാലർമോയിലെ ആശുപത്രിയിൽ വച്ചായിരുന്നു മരണം.
1990 ലോകകപ്പിൽ മികച്ച കളിക്കാരനുള്ള ഗോൾഡൻ ബോൾ നേടിയ താരമാണ് സ്‌കില്ലാച്ചി. ടോട്ടോ എന്ന വിളിപ്പേരിൽ പ്രശസ്തനായിരുന്നു ഇദ്ദേഹം. 1980-കളിലാണ് അന്താരാഷ്ട്ര ഫുട്‌ബോളിലെത്തിയ ഇദ്ദേഹം ഇറ്റാലിയൻ ക്ലബ്ബുകളായ ജുവന്റസിനും ഇന്റർമിലാനും വേണ്ടി ബൂട്ടണിഞ്ഞിട്ടുണ്ട്. ലോകകപ്പിനുമുൻപ് 1990 ൽ ജുവന്റസിന് യുവേഫ കപ്പും ഇറ്റാലിയൻ കപ്പും നേടിക്കൊടുക്കുന്നതിൽ മുഖ്യ പങ്കുവഹിച്ചു.
1990-ലെ ലോകകപ്പിൽ സ്‌കില്ലാച്ചിയുടെ മികവിൽ ആയിരുന്നു ഇറ്റലി മൂന്നാംസ്ഥാനത്തെത്തിയത്. സെമിയിൽ അർജന്റീനയോട് തോറ്റ ഇറ്റലി, പിന്നീട് മൂന്നാംസ്ഥാനക്കാർക്കുള്ള മത്സരത്തിൽ ഇംഗ്ലണ്ടിനെ തോൽപ്പിച്ചു. ആ മത്സരത്തിൽ പകരക്കാരനായി ഇറങ്ങിയ താരം ആറു ഗോളുകൾ അടിച്ചുകൂട്ടിയാണ് ആ ലോകകപ്പിലെ ടോപ്‌സ്‌കോററായത്.
