ഉത്തരകൊറിയയില്‍ കോവിഡ് -19 അതിവേഗം പടരുന്ന സാഹചര്യം രാജ്യത്തിന് വലിയ ഭീഷണിയാണെന്ന്, പ്രസിഡന്റ് കിം ജോങ്-ഉന്‍ പറഞ്ഞു. ശനിയാഴ്ച നടന്ന അടിയന്തര യോഗത്തില്‍ രാജ്യത്ത് വൈറസിന്റെ വ്യാപനം നേരിടാന്‍ സമഗ്രമായ പോരാട്ടത്തിന് കിം ആഹ്വാനം ചെയ്തു.
സ്ഥിരീകരിച്ച ആദ്യത്തെ കേസുകള്‍ വ്യാഴാഴ്ച ഉദ്യോഗസ്ഥര്‍ പ്രഖ്യാപിച്ചതിന് ശേഷമാണ് കിംന്റെ പ്രസ്താവന. ‘മാരകമായ പകര്‍ച്ചവ്യാധിയുടെ വ്യാപനമാണ് നമ്മുടെ രാജ്യത്തെ നിലവിലെ ഏറ്റവും വലിയ പ്രക്ഷുബ്ധത,’ കിമ്മിനെ ഉദ്ധരിച്ച് ഔദ്യോഗിക കെസിഎന്‍എ വാര്‍ത്താ ഏജന്‍സി റിപ്പോര്‍ട്ട് ചെയ്തു. പരമാവധി അടിയന്തര വൈറസ് നിയന്ത്രണങ്ങള്‍ക്കും കിം ഉത്തരവിട്ടു, അതില്‍ പ്രാദേശിക ലോക്ക്ഡൗണുകള്‍ക്കും ജോലിസ്ഥലങ്ങളില്‍ ഒത്തുചേരല്‍ നിയന്ത്രണങ്ങള്‍ക്കുമുള്ള ഓര്‍ഡറുകള്‍ ഉള്‍പ്പെടുന്നു. വ്യാഴാഴ്ച പുതിയ കോവിഡ് നിയമങ്ങള്‍ വിശദീകരിക്കുന്ന ഒരു മീറ്റിംഗില്‍, കിം ആദ്യമായി ഒരു മാസ്‌ക് ധരിച്ച് കാണപ്പെട്ടു.
കോവിഡിന്റെ വലിയ വ്യാപനം ഉത്തരകൊറിയയില്‍ ഗുരുതരമായ പ്രത്യാഘാതങ്ങള്‍ ഉണ്ടാക്കുമെന്ന് പൊതുവേ ആശങ്കയുണ്ട്. വാക്‌സിനേഷന്‍ പ്രോഗ്രാമിന്റെ അഭാവവും മോശം ആരോഗ്യ പരിരക്ഷാ സംവിധാനവും കാരണം 25 ദശലക്ഷത്തിലധികം ജനസംഖ്യ ഇപ്പോള്‍ ആരോഗ്യകാര്യത്തില്‍ ദുര്‍ബലമാണ്.
കഴിഞ്ഞ ആഴ്ചകളില്‍ പനി ബാധിച്ച് അര ദശലക്ഷം കേസുകള്‍ ഉണ്ടായതായി ശനിയാഴ്ച സംസ്ഥാന മാധ്യമങ്ങള്‍ റിപ്പോര്‍ട്ട് ചെയ്തു. രാജ്യത്ത് പരിമിതമായ പരിശോധനാ ശേഷിയുള്ളതിനാല്‍ മിക്ക കോവിഡ് കേസുകളും സ്ഥിരീകരിച്ചിട്ടില്ല.
പനി ബാധിച്ച് ഏപ്രില്‍ മുതല്‍ 27 പേര്‍ മരിച്ചതായി സംസ്ഥാന മാധ്യമങ്ങള്‍ റിപ്പോര്‍ട്ട് ചെയ്യുന്നു. രാജ്യം കോവിഡില്‍ നിന്ന് മുക്തമാണെന്ന രണ്ടും വര്‍ഷം നീണ്ട ഉത്തരകൊറിയന്‍ അവകാശവാദങ്ങള്‍ക്ക് അന്ത്യം കുറിച്ചിരിക്കുകയാണിപ്പോള്‍.
