പഴവർഗങ്ങൾ കഴിക്കുന്നത് കാൻസറിനു കാരണമോ? ഫ്രക്ടോസ് എന്ന നിശ്ശബ്ദ കൊലയാളി

പഴവർഗങ്ങൾ കാൻസർ രോഗിക്ക് കഴിക്കാമോ, ഫ്രക്ടോസ് എന്താണ്, ഫ്രക്ടോസ് കാൻസർ ഉണ്ടാക്കുമോ, ഫ്രക്ടോസ് ഉണ്ടാക്കുന്ന അപകടങ്ങൾ എങ്ങനെ ഒഴിവാക്കാം, അഗാവേ സിറപ്പ് എന്താണ്, ഡ്രൈഡ് ഫ്രൂട്സ് എന്തുമാത്രം കഴിക്കാം, ഫ്രൂട്ട് ഡയറ്റ് നല്ലതാണോ തുടങ്ങിയ ചോദ്യങ്ങൾക്കുള്ള ഉത്തരങ്ങൾ. പ്രശസ്ത കാൻസർ സർജൻ ഡോ. ജോജോ ജോസഫ് എഴുതുന്നു.

കഴിഞ്ഞ ദിവസം ഒ. പി. യിൽ നടന്ന ഒരു സംഭവമാണ് ഈ വിഷയം എഴുതാൻ എന്നെ പ്രേരിപ്പിച്ചത്. ഇന്ദു എന്നയാൾ എന്നെ കാണാനെത്തി. രോഗി എന്നുപറയാൻ പറ്റില്ല; കാൻസറിനെ അതിജീവിച്ച ഒരു വ്യക്തിയാണ് അവർ. എട്ടു വർഷം മുമ്പ് അവർക്ക് കാൻസർ വന്നു; ചികിത്സിച്ച് ഭേദമായി. ഇപ്പോൾ കാൻസർ പ്രതിരോധപ്രവർത്തനങ്ങളിൽ സജീവപങ്കാളിയാണ്. അതുപോലെതന്നെ കാൻസർ വരുന്ന സ്ത്രീകൾക്ക് പിന്തുണ ഗ്രൂപ്പ്, അതിലൂടെ അവർക്ക് കൗൺസലിങ് കൊടുക്കൽ തുടങ്ങി നിരവധി പ്രവർത്തനങ്ങൾ ചെയ്യുന്നു. ഇതൊക്കെ അവരുടെ റഗുലർ ജോലിക്കു പുറമേ ചെയ്യുന്നതാണ് എന്നതാണ് അവരുടെ പ്രത്യേകത. കഴിഞ്ഞ ദിവസം പെട്ടെന്ന് അവർ എന്റെ ഒ. പി. യിൽ വന്നു. ഒരൽപം ടെൻഷൻ മുഖത്തു കാണാം.

“ബുക്ക്‌ ചെയ്യാതെ വന്നത് ബുദ്ധിമുട്ടായി എന്നറിയാം. വളരെ അത്യാവശ്യമായതുകൊണ്ടാണ്.” അവർ പറഞ്ഞു.

“സാരമില്ല, എന്താണ് പ്രശ്നം?” ഞാൻ ചോദിച്ചു.

അവർ നേരെ കാര്യത്തിലേക്കു കടന്നു.

“എനിക്ക് പ്രശ്നമൊന്നും ഇല്ല. എന്റെ മകന്റെ കാര്യം സംസാരിക്കാനാണ്.”

അമ്മയ്ക്കുശേഷം മകനും അസുഖം വന്നോ എന്ന് ഞാൻ സംശയിച്ചു. അവർ മകനെ അകത്തുവിളിച്ചു. ഇന്ദു കാര്യങ്ങൾ പറഞ്ഞുതുടങ്ങി.

മകന് അസുഖമൊന്നും ഇല്ല. കക്ഷി ഒരു ജേർണലിസ്റ്റ് ആണ്. പ്രധാനമായും ഹെൽത്ത്‌ ആൻഡ് വെൽനെസ് ആണ് കൈകാര്യം ചെയ്യുന്നത്. അമ്മയ്ക്ക് ഇങ്ങനെയൊരു അസുഖം വന്നതുകൊണ്ട് അവൻ കാൻസർ സംബന്ധമായ എന്ത് വാർത്ത കിട്ടിയാലും അത് വിശദമായി അന്വേഷിക്കും. കഴിഞ്ഞ ദിവസം മകൻ അമ്മയോടു പറഞ്ഞു: ഇനി ഇവിടെ ആരും പഴങ്ങളൊന്നും കഴിക്കേണ്ട. പഴങ്ങളിൽ ഫ്രക്ടോസ് (Fructose) ധാരാളമുണ്ട്. ഫ്രക്ടോസ് (Fructose) ആണ് എല്ലാ ആരോഗ്യപ്രശ്നങ്ങൾക്കും കാരണം. അതുകൊണ്ട് ഇനിമുതൽ അമ്മയും കഴിക്കേണ്ട, ഈ വീട്ടിൽ ആരും കഴിക്കേണ്ട.

ഇന്ദുവിന്റെ പ്രശ്നം എന്താണെന്നുവച്ചാൽ അവർക്ക് ഭക്ഷണത്തിനുശേഷം എന്തെങ്കിലും ഒരു പഴം കഴിച്ചാലേ തൃപ്തി വരികയുള്ളൂ. അതുകൊണ്ട് ഡോക്ടർ മകനോടൊന്നു സംസാരിക്കണം. ഇതാണ് ഇന്ദുവിന്റെ ആവശ്യം.

ഞാൻ ഇന്ദുവിന്റെ മകനുമായി സംസാരിച്ചു. അവൻ പറഞ്ഞു:

“ഞാൻ ഒരു ഹെൽത്ത് ചാനലിൽ കണ്ടതാണ്. അതിൽ സത്യം മാത്രമേ പറയൂ. ഫ്രക്ടോസ് (Fructose) ആണ് സകല ആരോഗ്യപ്രശ്നങ്ങൾക്കും കാരണം. അത് പഴങ്ങളിൽക്കൂടെയാണ് നമ്മിൽ എത്തുന്നത്. ഫ്രക്ടോസ് എന്നുപറയുന്നത് ഫ്രൂട്ട് ഷുഗർ ആണ് എന്ന് ഡോക്ടറോട് ഞാൻ പറയേണ്ടതില്ലല്ലോ. അപ്പോൾ അത് നമ്മൾ ഒഴിവാക്കണ്ടേ?”

അദ്ദേഹത്തോട് പറഞ്ഞ കാര്യങ്ങളാണ് ഞാൻ ഇവിടെ കുറിക്കുന്നത്. അതായത്, പഴവർഗങ്ങൾ കാൻസർ രോഗിക്ക് കഴിക്കാമോ, ഫ്രക്ടോസ് കാൻസർ ഉണ്ടാക്കുമോ, ഫ്രക്ടോസ് ഉണ്ടാക്കുന്ന അപകടങ്ങൾ എങ്ങനെ ഒഴിവാക്കാം എന്നിവയാണ് പ്രധാനമായും ഈ ലേഖനത്തിൽ ഉൾപ്പെടുത്തിയിരിക്കുന്നത്.

എന്താണ് ഫ്രക്ടോസ്?

ഫ്രൂട്ട് ഷുഗർ ആണ് ഫ്രക്ടോസ് എന്ന് ഇനി പ്രത്യേകം പറയേണ്ടതില്ലല്ലോ. നമ്മുടെ പ്രകൃതിയിലെ ബേസിക് അല്ലെങ്കിൽ അടിസ്ഥാനപരമായ ഷുഗർ എന്നുപറയുന്നത് ഗ്ലൂക്കോസ്, ഫ്രക്ടോസ്, ഗലാക്ടോസ് എന്നിവയെ ആണ്. ഇതിൽ ഏറ്റവും മധുരം ഫ്രക്ടോസിനാണ്; ഏതാണ്ട് ഗ്ളൂക്കോസിന്റെ രണ്ടിരട്ടി. ഫ്രക്ടോസ് പഴങ്ങളിൽ കൂടുതലായി കാണപ്പെടുന്നു. ഗലാക്ടോസ് പാലിൽ കൂടുതലായി കാണപ്പെടുന്നു. ഗ്ലൂക്കോസ് എല്ലാ മധുരമുള്ള കാർബിലും ഉണ്ടാകും. ഗ്ലൂക്കോസ് ആണ് നമ്മുടെ ശരീരത്തിന് നേരിട്ട് ഉപയോഗിക്കാൻ കഴിയുന്ന ഏക ബേസിക് ഷുഗർ. അതുകൊണ്ടുതന്നെ ഗ്ലൂക്കോസ് ഇല്ലാതെ ജീവൻ നിലനിൽക്കില്ല. അതുകൊണ്ട് നാം ഫ്രക്ടോസും ഗാലക്ടോസും കഴിച്ചാലും അത് ശരീരത്തിന് ഉപയോഗിക്കണമെങ്കിൽ ശരീരം അത് ആദ്യം ഗ്ലൂക്കോസാക്കി മാറ്റണം. ഗ്ലൂക്കോസാക്കി മാറ്റുന്നത് പ്രധാനമായും കരളിൽവച്ചാണ്. ഒന്നുരണ്ട് ബേസിക് കാര്യങ്ങൾ കൂടി പറഞ്ഞാലേ ഇനി പറയുന്ന കാര്യങ്ങൾ എളുപ്പത്തിൽ മനസ്സിലാകൂ. ഈ ബേസിക് ഷുഗറുകൾ കൂടിച്ചേർന്നാണ് നമ്മൾ അന്നജം എന്നു വിളിക്കുന്ന കാർബോ ഹൈഡ്രറ്റ് ഉണ്ടാകുന്നത്. ഉദാഹരണത്തിന്, നമ്മുടെ പഞ്ചസാര അഥവാ ടേബിൾ ഷുഗർ ഉണ്ടാകുന്നത് ഒരു ഗ്ളൂക്കോസും ഒരു ഫ്രക്ടോസും കൂടിച്ചേരുമ്പോളാണ്.

ഫ്രക്ടോസ് കുഴപ്പക്കാരനാകുന്നതും പ്രശ്നം ഉണ്ടാക്കുന്നതും എപ്പോൾ? 

ഫ്രക്ടോസിനെ നേരിട്ട് ഉപയോഗിക്കാൻ നമ്മുടെ ശരീരത്തിന് പറ്റില്ല എന്ന് നാം നേരത്തെ മനസ്സിലാക്കിയിരുന്നല്ലോ. ഗ്ലൂക്കോസ് ആക്കിയതിനുശേഷമേ ശരീരത്തിന് ഫ്രക്ടോസ് ഉപയോഗിക്കാൻ പറ്റുകയുള്ളൂ. അത് പ്രധാനമായും നടക്കുന്നത് നമ്മുടെ കരളിൽവച്ചാണ്. ‘ഫ്രക്ടോകിനേസ് C’ (Fructokinase C) എന്നുപറയുന്ന ഒരു രാസാഗ്നിയാണ്‌ ഫ്രക്ടോസിനെ ഗ്ലൂക്കോസാക്കി മാറ്റുന്നത്. ഫ്രക്ടോകിനേസ് C (Fructokinase C) രാസാഗ്നിയുടെ പ്രത്യേകത എന്നുപറഞ്ഞാൽ അതിന് ഒരു റിവേഴ്‌സ് നിയന്ത്രണമില്ല. അതായത്, സാധാരണ നമുക്ക് ഒരു പരിധിയിൽ കൂടുതൽ ഒരു പ്രോഡക്റ്റ് ഉണ്ടാവുകയോ, അല്ലെങ്കിൽ ശരീരത്തിന്റെ ആവശ്യം കഴിഞ്ഞാൽ ആ പ്രത്യേക രാസാഗ്നിയുടെ പ്രവർത്തനം ഓട്ടോമാറ്റിക് ആയി കുറയുകയോ ചെയ്യും. എന്നാൽ ഫ്രക്ടോകിനേസ് സി (Fructokinase C) – ക്ക് ഒരു നിയന്ത്രണമല്ലാത്തതിനാൽ എപ്പോൾ ഫ്രക്ടോസ് ചെല്ലുന്നുവോ അപ്പോഴേ ഈ രാസാഗ്നി പ്രവർത്തിക്കാൻ തുടങ്ങും.

ഏതു രാസാഗ്നി പ്രവർത്തിക്കണമെങ്കിലും ഊർജം ആവശ്യമാണ്. ഈ ഊർജം എടുക്കുന്നത് നമ്മുടെ ശരീരത്തിന്റെ പവർ യൂണിറ്റായ എ.ടി.പി (ATP) എന്നുപറയുന്ന മോളിക്യൂളിൽ നിന്നാണ്. ഫ്രക്ടോസ് കൂടുതൽ ചെല്ലുന്തോറും നമുക്ക് കൂടുതൽ ATP നഷ്ടപ്പെടുന്നു. അതേ തുടർന്ന് യൂറിക് ആസിഡ് പ്രൊഡക്ഷൻ (Uric Acid Production) നമ്മുടെ ശരീരത്ത് അളവ് വിട്ടു കൂടും. ഈ പ്രവർത്തനങ്ങളെല്ലാം ശരീരത്തിന്റെ ഓക്സിഡറ്റീവ് സ്‌ട്രെസ് കൂടുതലാക്കും. അതുപോലെതന്നെ നമ്മുടെ കോശങ്ങളിലെ മൈറ്റോകോണ്ട്രിയ (Mitochondria) യുടെ (പവർ ഹൌസ് – അതായത് ശരീരത്തിന്റെ എല്ലാ രാസപ്രവർത്തനങ്ങളും നടക്കുന്ന സ്ഥലം) പ്രവർത്തനം തകരാറിലാകും. ഇങ്ങനെ ഓരോന്നായി ഒന്നിനുപിറകെ ഓരോരോ പ്രവർത്തനങ്ങൾ തകരാറിലാകും.

ആദ്യം സംഭവിക്കുക ‘നോൺ ആൽക്കഹോലിക് സ്റ്റിയറ്റോ ഹെപടൈറ്റീസ്’ എന്നുപറയുന്ന കരൾവീക്കമാണ്. അതിനുശേഷം അത് ‘ഫാറ്റി ലിവർ’ ആയി മാറും. ഇതുകൂടാതെ, അമിതവണ്ണം, ഇൻസുലിൻ റെസിസ്റ്റൻസ്, ഇൻസുലിൻ റെസിസ്റ്റൻസിന്റെ അനന്തരഫലമായ പ്രമേഹം, ഇതിനെ തുടർന്ന് ഹൈപ്പർ ടെൻഷൻ, പിന്നെ ഹൃദരോഗം എന്നിവയ്‌ക്കെല്ലാം വഴിയൊരുക്കുന്നു. ഇവയെല്ലാം ഒന്നിച്ചുവരുമ്പോൾ അത് കാൻസറിനു കാരണമായിത്തീരുന്നു. ഇതുകൂടാതെ, ഫ്രക്ടോസിന് മറ്റൊരു പ്രശ്നമുണ്ട്. ഫ്രക്ടോസ് കഴിക്കുമ്പോൾ അത് നേരെ കുടലിൽ എത്തുന്നു. അത് കുടലിലെ കോശങ്ങളിലെ ഫ്രക്ടോകിനേസ് (Fructokinase) പോലെയുള്ള രാസാഗ്നി ഉത്തേജിപ്പിക്കപ്പെടാൻ ഇടയാക്കുന്നു. കുടലിലെ ജൈവവ്യവസ്ഥ താളംതെറ്റാൻ ഇത് ഇടയാക്കും. അതേ തുടർന്ന് കുടലിലുള്ള ചില കീടാണുക്കൾ നമ്മുടെ രക്തത്തിൽ, അതായത് കരളിലേക്കു പോകുന്ന പോർട്ടൽ വെനസ് സിസ്റ്റത്തിൽ (Portal Venous System) കയറുകയും അങ്ങനെ ആ പോർട്ടൽ വെനസ് സിസ്റ്റം (Portal Venous System) വഴി കരളിൽ എൻഡോടോക്സിൻ (endotoxins) എത്തുകയും അത് കരളിൽ നീര് ഉണ്ടാക്കാനും അതേ തുടർന്ന് ഫാറ്റി ലിവർ (Fatty Liver), ലിവർ സിറോസിസ് (Liver Cirrhosis) അങ്ങനെയുള്ള പ്രശ്നങ്ങൾക്കും കാരണമായിത്തീരുകയും ചെയ്യും.

എവിടുന്നാണ് ഫ്രക്ടോസ് അമിതമായ രീതിയിൽ ശരീരത്തിലേക്ക് എത്തുന്നത്?

സാധാരണ ഒരാളെ സംബന്ധിച്ച് പഴങ്ങൾ കഴിക്കുന്നതിൽ നമുക്കൊരു പരിധിയുണ്ട്. അപ്പോൾ പഴങ്ങളിലുള്ള ഫ്രക്ടോസ് അല്ല പ്രധാന പ്രശ്നക്കാരൻ. പിന്നെ എവിടെ നിന്നാണ് ഇത് നമ്മളിൽ എത്തുന്നത്? ഫ്രക്ടോസിന് ഗ്ളൂക്കോസിനെക്കാൾ ഇരട്ടി മധുരമുണ്ട് എന്ന് നേരത്തെ പറഞ്ഞിരുന്നല്ലോ. അതുപോലെതന്നെ ഇതിന് മറ്റൊരു പ്രത്യേകത കൂടിയുണ്ട്. അതായത്, മദ്യം അല്ലെങ്കിൽ ചരസ് പോലെയുള്ള മയക്കുമരുന്നിനെപ്പോലെ അഡിക്റ്റീവ് ആണ് നമ്മുടെ കുഞ്ഞൻ ഫ്രക്ടോസ്. ഈ രണ്ടു പ്രത്യേകതകൾ ഫ്രക്ടോസിനെ കോമേഴ്‌ഷ്യൽ ഭക്ഷണനിർമാതാക്കളുടെ ഇഷ്ടതോഴനാക്കി മാറ്റി എന്നതാണ് വാസ്തവം. അങ്ങനെ കോമേഴ്‌ഷ്യൽ ഭക്ഷണങ്ങളുടെ അഡിറ്റീവ് ആയി ഇത് എല്ലായിടത്തും ഉപയോഗിക്കുന്നു. അങ്ങനെയുള്ള ഫുഡ്‌ അഡിറ്റീവ് ആയിട്ടുവരുന്ന ഫ്രക്ടോസാണ് നമുക്ക് ആരോഗ്യപ്രശ്നങ്ങൾ ഉണ്ടാക്കുന്നത്.

ഇനി ഏതൊക്കെയാണ് ആ ഭക്ഷണപദാർഥങ്ങൾ എന്ന് നമുക്കു നോക്കാം. നമ്മൾ പുറത്തുനിന്നു വാങ്ങിക്കഴിക്കുന്ന മധുരമുള്ള എല്ലാ ഭക്ഷണങ്ങളും, അതായത്‌ ഐസ്ക്രീം, ബോട്ടിൽഡ് ജ്യൂസ്‌, വിവിധതരം സോഡാകൾ, കുക്കീസ്, ബിസ്ക്കറ്റ്സ്, കപ്പ് കേക്സ്, പാസ്റ്ററിസ് കാൻഡിസ്, ജാം, ബ്രെഡ്, സോസ് എന്നിവയിലെല്ലാം അമിതമായ അളവിൽ ഫ്രക്ടോസ് അടങ്ങിയിട്ടുണ്ട്. ഇതുകൂടാതെ, ബർഗർ പോലെയുള്ള ഫാസ്റ്റ് ഫുഡ്സ്. ഫാസ്റ്റ് ഫുഡ്സിലെല്ലാം അമിതമായി ഫ്രക്ടോസ് അടങ്ങിയിട്ടുണ്ട്. അത് ഏതുതരം ആയാലും. നമ്മുടെ നാട്ടിൽ സർവസാധാരണമായിക്കൊണ്ടിരിക്കുന്ന പാക്കറ്റ് ബ്രേക്ഫാസ്റ്റ് സീറിലുകളിലും ഉയർന്ന അളവിൽ എച്. എഫ്. സി. എസ് (High Fructose containing Corn Syrup – HFCS) അടങ്ങിയിട്ടുണ്ട്. മറ്റൊരു പ്രധാന വില്ലൻ വിവിധതരം സോസുകളാണ്. കെച് അപ്പ്‌ ഇല്ലാതെ കുട്ടികൾ ഇപ്പോൾ ഒന്നും കഴിക്കില്ല. ഓർക്കുക, സോസുകളിൽ ധാരാളം HFCS അടങ്ങിയിട്ടുണ്ട്.

ഇത് ഏതൊക്കെ രീതിയിലാണ് ഇത് നമ്മുടെ ഭക്ഷണത്തിൽ കലരുന്നത് എന്ന് നമുക്ക് നോക്കാം. ഏറ്റവും പ്രധാനപ്പെട്ട കാറ്റഗറി ഫുഡ്‌ അഡിറ്റീവ് ആയി ഉപയോഗിക്കുന്ന കോൺ സിറപ്പ് അടങ്ങിയ ഉയർന്ന ഫ്രക്ടോസ് ഉം അതുപോലെതന്നെ ‘അഗേവ്’ (Agave) എന്ന ചെടിയിൽനിന്നും ഉണ്ടാക്കുന്ന അഗാവേ സിറാപ്പിലൂടെയുമാണ്. ഈ രണ്ടു സിറപ്പുകളിലാണ് ഏറ്റവും കൂടുതൽ ഫ്രക്ടോസ് അടങ്ങിയിരിക്കുന്നത്. നിങ്ങൾ പുറത്തുനിന്ന് വാങ്ങിക്കുന്ന ഭക്ഷണത്തിന്റെ ലേബൽ ഒന്ന് ശ്രദ്ധിക്കുക. അവിടെ ഈ പേരുകളുണ്ടെങ്കിൽ അതിന്റെ ഉപയോഗത്തിന് ഒരു പരിധി നിശ്ചയിക്കുക.

ഒരു ഉദാഹരണം പറഞ്ഞാൽ, HFCS 90 എന്നൊരു അഡിറ്റീവിനകത്ത് 90 ശതമാനവും ഫ്രക്ടോസാണ് അടങ്ങിയിരിക്കുന്നത്. ഇതുകൂടാതെ നമ്മൾ സേഫ് എന്നു കരുതുന്ന തേൻ, കരാമൽ, മൊളസ്സസ്, പാംഷുഗർ, പഞ്ചസാര (50% ഫ്രക്ടോസ് & 50% ഗ്ളൂക്കോസ്) നിരവധി പേരിൽ ഈ ഫ്രക്ടോസ് ചേർത്ത ഭക്ഷണം നമ്മുടെ ഇടയിൽ വിറ്റഴിക്കപ്പെടുന്നുണ്ട്.

ഇനി എന്താണ് HFCS എന്ന ഓമനപ്പേരിൽ അറിയപ്പെടുന്ന ഫുഡ്‌ അഡിറ്റീവ് എന്നു നോക്കാം. ചോളം പൊടിച്ചെടുത്തു ശുദ്ധീകരിച്ചശേഷം അതിനെ ചില രാസാഗ്നി ഉപയോഗിച്ച് അതിലെ ഗ്ലൂക്കോസിനെക്കൂടി ഫ്രക്ടോസ് ആക്കി മാറ്റിയാണ് കോൺ സിറപ്പ് അടങ്ങിയ ഉയർന്ന ഫ്രക്ടോസ് (High Fructose Containing Corn Syrup) അഥവാ HFCS ഉണ്ടാക്കുന്നത്. പതിയെ ജനം ഇതിന്റെ അപകടങ്ങൾ മനസ്സിലാക്കി. ഫുഡിന്റെ ലേബൽ നോക്കി ആൾക്കാർ അങ്ങനെയുള്ള ഭക്ഷണങ്ങൾ ഉപേക്ഷിച്ചുതുടങ്ങിയതോടുകൂടി ഇവർ HFCS ന് മറ്റു ചില ഓമനപ്പേരുകളിട്ട് ആൾക്കാരെ ആശയക്കുഴപ്പത്തിലാക്കി എന്നതാണ് വാസ്തവം.

ഫ്രക്ടോസ് (Fructose)
ഫ്രക്ടോസ് സിറപ്പ് (Fructose Syrup)
കോൺ സിറപ്പ് (Corn Syrup)
ഫ്രക്ടോസ് സിറപ്പ് സോളിഡ്‌സ് (Corn Syrup Solids)
കോൺ സ്വീറ്റ്നർ (Corn Sweetener)
മൈസ് സിറപ്പ് (Maize Syrup)
ഗ്ലൂക്കോസ്/ ഫ്രക്ടോസ് സിറപ്പ് (Glucose/ Fructose Syrup)
ഐസൊലേറ്റഡ് ഫ്രക്ടോസ് (Isolated Fructose). ഇതെല്ലാം ഉയർന്ന ഫ്രക്ടോസ് അടങ്ങിയ കോൺ സിറപ്പ് (High Fructose Containing Corn Syrup) ന്റെ മറ്റ് ഓമനപേരുകൾ മാത്രം.

അഗാവേ സിറപ്പ് എന്താണ്?

അമേരിക്കയിൽ വരണ്ട പ്രദേശങ്ങളിൽ കാണുന്ന ഒരു ചെടിയാണ് അഗാവേ. അതിന്റെ തണ്ടിൽനിന്നും മധുരമുള്ള സിറപ്പ് ലഭിക്കും.അത് ഫെർമെന്റ് ചെയ്ത് വാറ്റിയാണ് ടെക്കില എന്ന പ്രശസ്ത മദ്യം ഉണ്ടാക്കുന്നത്. ഫെർമെന്റ് ചെയ്യുന്നതിനുമുൻപ് എടുക്കുന്നതാണ് അഗാവേ സിറപ്പ്. ഏതാണ്ട് 80% ഫ്രക്ടോസ് ആണ് ഇതിലുള്ളത്. അഗാവേ സിറപ്പ് കേരളത്തിൽപോലും ഇന്ന് ലഭ്യമാണ്. ഇത്രയും വായിക്കുമ്പോൾ എന്തുകൊണ്ടാണ് നമ്മുടെ യുവതലമുറയിൽ വളരെയധികം ഫാറ്റി ലിവർ, ഹൃദ്രോഗം, പൊണ്ണത്തടി, കാൻസർ എന്നിവ ഉണ്ടാവുന്നതെന്ന് മനസ്സിലായിക്കാണുമെന്നു കരുതുന്നു.

ഈ വിഷയം പൂർണ്ണമാകണമെങ്കിൽ ഇന്ദുവിന്റെ മകന്റെ സംശയം കൂടി തീർക്കണമല്ലോ. അതായത്, പഴവർഗങ്ങൾ കഴിച്ചാൽ അതിലെ ഫ്രക്ടോസ് നമുക്ക് അപകടകാരിയായി മാറുമോ എന്നതാണല്ലോ അദ്ദേഹത്തിന്റെ സംശയം. പഴവർഗങ്ങൾ അതിലെ ഫ്രക്ടോസിനോടൊപ്പം പല ഗുണഫലങ്ങളും നൽകുന്ന ഒരു ഭക്ഷണപദാർഥമാണ്. അതിനാൽ പഴങ്ങൾ നമുക്ക് കഴിക്കാം. ഒരു കാര്യം പ്രത്യേകം ശ്രദ്ധിക്കുക, പഴങ്ങൾ പ്രകൃതി നമുക്ക് എങ്ങനെ തന്നിരിക്കുന്നോ അതേ രീതിയിൽ വേണം കഴിക്കാൻ. അതായത്, മുഴുവൻ പഴവും കഴിക്കണം. അതിനെ ജ്യൂസ് അടിച്ചോ, ഷെയ്‌ക്ക്‌ ആക്കിയോ, സ്മൂത്തി ആക്കിയോ ഒക്കെ കുടിച്ചാൽ ഈ പറഞ്ഞതുപോലെ ഗുണത്തെക്കാളേറെ ദോഷമാണ് നിങ്ങൾക്ക് നൽകുക.

ഡ്രൈഡ് ഫ്രൂട്സ് എന്തുമാത്രം കഴിക്കാം?

അതുപോലെ നമ്മുടെ ഇപ്പോഴത്തെ ഒരു ഫാഷനാണ് ഡ്രൈഡ് ആയിട്ടുള്ള ഫ്രൂട്സ് വാങ്ങിച്ചുകഴിക്കുക എന്നത്. അതായത്, ഡ്രൈഡ് മംഗോ, ഡ്രൈഡ് പൈനാപ്പിൾ, ഈന്തപ്പഴം ഇതൊക്കെ വാങ്ങിച്ചുകഴിക്കുന്ന ശീലം. ഇതൊക്കെ കഴിക്കരുത് എന്നല്ല ഞാൻ പറഞ്ഞത്. പക്ഷേ, അതിലൊക്കെ ഫ്രക്ടോസ് കണ്ടന്റ് സാധാരണ പഴത്തെക്കാൾ വളരെ കൂടുതലാണ്. ഇവയൊക്കെ കഴിക്കണമെങ്കിൽ പച്ചയ്ക്കു കഴിക്കുക. പൈനാപ്പിളും മാങ്ങയും ഡ്രൈഡ് ആക്കി കഴിക്കാതിരിക്കുക, അല്ലാതെ തന്നെ കഴിക്കുക. അപ്പോൾ ഇങ്ങനെ ഡ്രൈഡ് ആക്കി കഴിക്കുന്ന/ കിട്ടുന്ന പഴങ്ങളിലും ഫ്രക്ടോസ് കണ്ടന്റ് വളരെ കൂടുതലാണ്. ഇത് കഴിക്കരുതെന്നല്ല, ഒരു പരിധി നിശ്ചയിക്കുക.

ഫ്രൂട്ട് ഡയറ്റ് നല്ലതാണോ?

ഇതിനോടൊപ്പം പ്രത്യേകം ഓർമിക്കേണ്ട മറ്റൊരു കാര്യമുണ്ട്. അതായത്, ഒരു ഫാൻസി ഡയറ്റ് ഉണ്ട്. അതായത്, ഫ്രൂട്ട് ഡയറ്റ്. എന്നുവച്ചാൽ ഡയബെറ്റിസ്‌ ഉള്ളവർ ഫ്രൂട്ട് മാത്രം കഴിക്കുക. അങ്ങനെയുള്ള ഈ ഫ്രൂട്ട് ഡയറ്റ് ഒന്നും ഒരിക്കലും റെക്കമെന്ഡഡ് അല്ല. കാരണം, ഈ ഫ്രൂട്ട് ഡയറ്റ് മാത്രം കഴിച്ചാൽ എന്താണ് സംഭവിക്കുക എന്ന് നിങ്ങൾക്ക് ഇത്രയും വായിച്ചപ്പോൾ മനസ്സിലായിക്കാണുമല്ലോ. നിങ്ങളുടെ കരളിന്റെ പണി തീരുമ്പോഴേ ഈ ഫ്രൂട്ട് ഡയറ്റ് കൊണ്ട് എന്താണ് ഗുണമെന്ന് മനസ്സിലാക്കുകയുള്ളൂ എന്നോർക്കുക.

എത്ര ഫ്രക്ടോസ് നമുക്ക് ഒരു ദിവസം കഴിക്കാം?

ഇനി മറ്റൊരു കാര്യം. എത്ര ഫ്രക്ടോസ് നമുക്ക് ഒരു ദിവസം കഴിക്കാം എന്നതാണ്. ഇതെക്കുറിച്ച് പല പഠനങ്ങളും നടത്തിയിട്ടുണ്ട്. ഏതാണ്ട് 100 ഗ്രാമിൽ കൂടുതൽ ഒരു ദിവസം അകത്തു ചെന്നുകഴിഞ്ഞാൽ അത് അപകടമാണെന്നാണ് പഠനങ്ങൾ സൂചിപ്പിക്കുന്നത്. അത് ഏതു രീതിയിലായാലും, അതായത് പഴങ്ങൾ ആയിട്ടാണെങ്കിലും ഡ്രൈഡ് ഫ്രൂട്ട് ആയിട്ടാണെങ്കിലും അകത്തുചെന്നാൽ നൂറു ഗ്രാമിൽ കൂടുതൽ കഴിക്കുന്നത് അപകടകരമാണ്. ഒരു ലിമിറ്റ് എന്ന് പറയുന്നത് 40 mg മുതൽ 80 mg വരെയാണ്. എന്നാൽ, ഫാറ്റി ലിവർ അല്ലെങ്കിൽ പൊണ്ണത്തടി അതുപോലെയുള്ള ആൾക്കാർ ഒരു ദിവസം 25 ഗ്രാമിൽ കൂടുതൽ ഫ്രക്ടോസ് കഴിക്കാൻ പാടില്ല. മറ്റൊരു കാര്യം നിങ്ങൾ ശ്രദ്ധിച്ചിട്ടുണ്ടാകും, കുട്ടികൾക്ക് ഉയർന്ന ഫ്രക്ടോസ് അടങ്ങിയ ഭക്ഷണങ്ങൾ (High Fructose Containing Food) ആയ ബേക്കറി ഫുഡ്, ഫാസ്റ്റ് ഫുഡിനോട് ഒക്കെ കൂടുതൽ ആവേശം തോന്നുന്നത് അല്ലെങ്കിൽ അത് വാങ്ങിച്ചുകൊടുത്തില്ലെങ്കിൽ അവർ ദേഷ്യപ്പെടുന്നത്. അതിനു കാരണം ഫ്രക്ടോസ് (Fructose) ഉണ്ടാക്കുന്ന അഡിക്ഷൻ ആണ്. അതായത്, ഫ്രക്ടോസ് എന്നുപറയുന്നത് നമ്മുടെ കഞ്ചാവും മരിവാനായും പോലെതന്നെ ആസക്തിയുണ്ടാക്കുന്ന ഒരു വസ്തുവാണ്. കൂടാതെ, അതിന്റെ ഇരട്ടിമധുരവും കുട്ടികളിൽ ഈ ആസക്തി കൂടാൻ കാരണമാകുന്നു. അതുകൊണ്ട് ഫ്രക്ടോസിനോടുള്ള സമ്പർക്കം കഴിയുന്നതും ഒഴിവാക്കുന്നതാണ് കുട്ടികൾക്കു നല്ലത്.

ഈ വിഷയം നിങ്ങൾ മനസ്സിലാക്കിയാൽ പോരാ, മറിച്ച് നമുക്കൊരു ഉറച്ച തീരുമാനമെടുക്കാം. അതായത് ഉയർന്ന ഫ്രക്ടോസ് അടങ്ങിയ ഭക്ഷണങ്ങൾ (High Fructose Containing) ആയിട്ടുള്ള ഭക്ഷണപദാർഥങ്ങൾ ഒഴിവാക്കാം. അതുപോലെതന്നെ ഓരോ ഭക്ഷണ പദാർത്ഥവും പുറത്തുനിന്നു വാങ്ങുമ്പോൾ അതിലെ ഫ്രക്ടോസ് കണ്ടന്റ് എത്രയെന്ന് പ്രത്യേകം പരിശോധിക്കാൻ നമ്മുടെ കുട്ടികളെ പഠിപ്പിച്ചുകൊടുക്കാം. അതുവഴി ആരോഗ്യമുള്ള ഒരു പുതിയ തലമുറയെ നമുക്ക് വാർത്തെടുക്കാം.