മരിയുപോളിലെ അസോവ്സ്റ്റല്‍ സ്റ്റീല്‍ പ്ലാന്റില്‍ രണ്ട് മാസത്തിലേറെയായി കുടുങ്ങിക്കിടന്ന നൂറുകണക്കിന് സൈനികരെ ഒഴിപ്പിച്ചതായി യുക്രെയ്ന്‍ സ്ഥിരീകരിച്ചു. ഗുരുതരമായി പരിക്കേറ്റ 53 സൈനികരെ റഷ്യന്‍ പിന്തുണയുള്ള വിമതരുടെ നിയന്ത്രണത്തിലുള്ള നോവോസോവ്‌സ്‌ക് പട്ടണത്തിലേക്ക് കൊണ്ടുപോയതായി ഡെപ്യൂട്ടി പ്രതിരോധ മന്ത്രി ഹന്ന മാലിയാര്‍ പറഞ്ഞു. വിമതരുടെ നിയന്ത്രണത്തിലുള്ള മറ്റൊരു നഗരമായ ഒലെനിവ്കയിലേക്കുള്ള മാനുഷിക ഇടനാഴി വഴി 211 പേരെ ഒഴിപ്പിച്ചതായും അവര്‍ പറഞ്ഞു.
പരിക്കേറ്റ സൈനികരെ ഒഴിപ്പിക്കാന്‍ കരാറിലെത്തിയതായി റഷ്യ നേരത്തെ അറിയിച്ചിരുന്നു. പ്ലാന്റില്‍ കുടുങ്ങിയിരുന്ന യുക്രേനിയന്‍ പോരാളികളുമായി ഒരു ഡസനോളം ബസുകള്‍ തിങ്കളാഴ്ച വൈകുന്നേരം തെക്കന്‍ തുറമുഖ നഗരത്തിലെ ഈ സൈറ്റില്‍ നിന്ന് പുറപ്പെടുന്നത് കണ്ടതായി റോയിട്ടേഴ്സ് വാര്‍ത്താ ഏജന്‍സിയും റിപ്പോര്‍ട്ട് ചെയ്തു. പരിക്കേറ്റ യുക്രേനിയന്‍ സൈനികരെ അസോവ്സ്റ്റലില്‍ നിന്ന് ഒഴിപ്പിക്കുന്നതിന്റെ ദൃശ്യങ്ങള്‍ റഷ്യന്‍ സര്‍ക്കാര്‍ മാധ്യമങ്ങളും പോസ്റ്റ് ചെയ്തു.
യുക്രേനിയന്‍ സൈന്യവും രഹസ്യാന്വേഷണ, ചര്‍ച്ചാ സംഘങ്ങളും റെഡ് ക്രോസും യുഎന്നും ഒഴിപ്പിക്കല്‍ പ്രവര്‍ത്തനത്തില്‍ പങ്കാളികളായിരുന്നുവെന്ന് ചൊവ്വാഴ്ച രാത്രിയിലെ തന്റെ വീഡിയോ പ്രസംഗത്തില്‍, യുക്രേനിയന്‍ പ്രസിഡന്റ് വോലോഡൈമര്‍ സെലെന്‍സ്‌കി പറഞ്ഞു. ”യുക്രെയ്നിന് തങ്ങളുടെ വീരന്മാരെ ജീവനോടെ വേണം,” അദ്ദേഹം പറഞ്ഞു.
തിങ്കളാഴ്ച രാത്രി ഫേസ്ബുക്കില്‍ പോസ്റ്റ് ചെയ്ത സന്ദേശത്തില്‍, യുക്രെയ്‌നിന്റെ ജനറല്‍ സ്റ്റാഫ്, രാജ്യത്തിന്റെ സൈനികരെ ‘വീരന്മാര്‍’ എന്ന് വിളിക്കുകയും അവരുടെ ശ്രമങ്ങള്‍ കീവിന്റെ തെക്കന്‍ ഭാഗത്തെ പ്രതിരോധം സംഘടിപ്പിക്കാന്‍ സഹായിച്ചതായി പറയുകയും ചെയ്തു.
ഭൂഗര്‍ഭ ബങ്കറുകളില്‍ എത്ര പേര്‍ ഇപ്പോഴും അവശേഷിക്കുന്നുവെന്നത് വ്യക്തമല്ല. യുക്രെയ്‌നിലെ സൈന്യവും രഹസ്യാന്വേഷണ വിഭാഗവും നാഷണല്‍ ഗാര്‍ഡും അതിര്‍ത്തി സേനയും അവശേഷിക്കുന്നവരെ രക്ഷിക്കാന്‍ സംയുക്ത ശ്രമങ്ങള്‍ നടത്തുന്നുണ്ടെന്ന് മിസ് മാലിയാര്‍ പറഞ്ഞു. കഴിയുന്നത്ര ആളുകളുടെ ജീവന്‍ രക്ഷിക്കുക എന്നതാണ് തന്റെ മുന്‍ഗണനയെന്ന് ലെഫ്റ്റനന്റ് കേണല്‍ ഡെനിസ് പ്രോകോപെങ്കോയും പറഞ്ഞു.
