യുഎസിലെ പള്ളിയിലും വ്യാപാരകേന്ദ്രത്തിലുമുണ്ടായ വെടിവയ്പില്‍ മൂന്നുപേര്‍ കൊല്ലപ്പെട്ടു. എട്ടുപേര്‍ക്കു പരിക്കേറ്റു. ന്യുയോര്‍ക്കിലെ സൂപ്പര്‍മാര്‍ക്കറ്റില്‍ പതിനെട്ടുകാരന്റെ വെടിയേറ്റു പത്തുപേര്‍ കൊല്ലപ്പെട്ടതിന്റെ പിറ്റേന്നു തെക്കന്‍ കലിഫോര്‍ണിയയിലും ടെക്‌സസിലുമാണു മൂന്നുപേരുടെ ജീവനെടുത്ത അക്രമം നടന്നത്.
തെക്കന്‍ കലിഫോര്‍ണിയയിലെ പള്ളിയില്‍ വിരുന്നുസത്കാരത്തിനിടെ ഏഷ്യന്‍ വംശജനായ അറുപതുകാരന്‍ നടത്തിയ വെടിവയ്പിലാണ് ഒരാള്‍ കൊല്ലപ്പെട്ടത്. വെടിവയ്പില്‍ അഞ്ചുപേര്‍ക്കു പരിക്കേറ്റു. പള്ളിയിലെ പാസ്റ്റര്‍ കസേരയുപയോഗിച്ച് അക്രമിയെ തലക്കടിച്ചു വീഴ്ത്തി കെട്ടിയിടുകയായിരുന്നു.
നാല്‍പതോളം പേരാണു പള്ളിയിലുണ്ടായിരുന്നത്. അക്രമിയില്‍നിന്നു രണ്ട് തോക്കുകള്‍ പിടികൂടി. മരിച്ചയാളും വെടിയേറ്റവരും ഏഷ്യന്‍, തായ്വാന്‍ വംശജരാണ്. ടെക്സസില്‍ പഴയ സാധനങ്ങള്‍ വിറ്റഴിക്കുന്ന ചന്തയിലുണ്ടായ വെടിവയ്പിലാണു രണ്ടുപേര്‍ മരിച്ചത്. രണ്ടു സംഘങ്ങള്‍ തമ്മിലുള്ള തര്‍ക്കമാണു വെടിവയ്പില്‍ കലാശിച്ചത്. മൂന്നുപേരെ ആശുപത്രിയിലേക്കു മാറ്റിയെന്ന് ഹാരിസ് കൗണ്ടി പോലീസ് അറിയിച്ചു.
