ഒറ്റത്തവണ ഉപയോഗിക്കുന്ന പ്ലാസ്റ്റിക്കുകളുടെ നിരോധനം ജൂണ്‍ 30നകം നടപ്പിലാക്കാന്‍ കേന്ദ്രസര്‍ക്കാര്‍ നിര്‍ദേശം. കേന്ദ്ര നഗരകാര്യ മന്ത്രാലയമാണ് സംസ്ഥാനങ്ങള്‍ക്ക് നിര്‍ദേശം നല്‍കിയത്. രാജ്യവ്യാപകമായി നടപ്പാക്കുന്ന ‘ക്ലീന്‍ ആന്‍ഡ് ഗ്രീന്‍’ ക്യാമ്പയിനിന്റെ ഭാഗമായാണ് നിര്‍ദേശം.
പരിസ്ഥിതി ദിനത്തോടനുബന്ധിച്ചാണ് ക്ലീന്‍ ആന്‍ഡ് ഗ്രീന്‍ ക്യാമ്പയിന്‍ നടത്തുന്നത്. നഗര മേഖലകളില്‍ പ്ലാസ്റ്റിക് കൂടുതലായി തള്ളുന്ന ഹോട്ട് സ്പോട്ടുകള്‍ കണ്ടെത്തി നടപടികള്‍ സ്വീകരിക്കണമെന്നും ക്യാമ്പയിനില്‍ നിര്‍ദേശിക്കുന്നു. മിന്നല്‍ പരിശോധനകള്‍ നടത്തുക, പിഴ ചുമത്തുക തുടങ്ങിയ നടപടികള്‍ സ്വീകരിച്ച് പ്ലാസ്റ്റിക് നിരോധനം കര്‍ശനമാക്കണമെന്നാണ് കേന്ദ്രത്തിന്റെ നിര്‍ദേശം.
ഇതിനോടകം രാജ്യത്തെ 4,704 നഗര തദ്ദേശ സ്ഥാപനങ്ങളില്‍ ഒറ്റത്തവണ പ്ലാസ്റ്റിക് നിരോധനത്തിനായി ഉത്തരവിട്ടിട്ടുണ്ട്. ശേഷിക്കുന്ന 2,100 തദ്ദേശ സ്ഥാപനങ്ങളിലാണ് ഇനി ഉത്തരവ് പ്രാബല്യത്തില്‍ വരുത്താനുള്ളത്. ഇനിയും നടപ്പിലാക്കാത്ത തദ്ദേശ സ്ഥാപനങ്ങള്‍ കണ്ടെത്തി ഉത്തരവ് പ്രാബല്യത്തില്‍ വരുത്തുന്നുണ്ടെന്ന് സംസ്ഥാനങ്ങള്‍ ഉറപ്പാക്കണമെന്നും കേന്ദ്രം നിഷ്‌കര്‍ഷിക്കുന്നു.
