ഓസ്ട്രേലിയയിൽ എത്തിയ ഇറാൻ വനിതാ ഫുട്ബോൾ ടീമിലെ രണ്ട് അംഗങ്ങൾക്ക് കൂടി ഓസ്ട്രേലിയൻ സർക്കാർ രാഷ്ട്രീയ അഭയം നൽകി. ടീം നാട്ടിലേക്ക് മടങ്ങുന്നതിന് തൊട്ടുമുമ്പ് ഒരു കളിക്കാരിയും ടീമിലെ മറ്റൊരു ജീവനക്കാരിയുമാണ് സഹായം അഭ്യർത്ഥിച്ചത്. ഇതോടെ ടീമിലെ ആകെ ഏഴുപേർക്ക് സുരക്ഷിതമായി ഓസ്ട്രേലിയയിൽ കഴിയാൻ അനുമതി ലഭിച്ചതായി ഓസ്ട്രേലിയൻ ആഭ്യന്തര മന്ത്രി ടോണി ബർക്ക് സ്ഥിരീകരിച്ചു.
കഴിഞ്ഞ ചൊവ്വാഴ്ച രാത്രി ടീമിലെ മറ്റുള്ളവർ മലേഷ്യ വഴി മടങ്ങിയെങ്കിലും ഈ ഏഴുപേർ ഓസ്ട്രേലിയയിൽ തന്നെ തുടർന്നു. ഇവർക്ക് താമസ സൗകര്യവും ജോലി കണ്ടെത്തുന്നതിനും പഠിക്കുന്നതിനുമുള്ള എല്ലാ സഹായങ്ങളും സർക്കാർ ഉറപ്പുനൽകിയിട്ടുണ്ട്. സ്വന്തം രാജ്യത്തെ ഭീഷണികൾക്കിടയിൽ ധീരമായ തീരുമാനമെടുത്ത ഈ സ്ത്രീകളെ രാജ്യം സ്വാഗതം ചെയ്യുന്നതായും മന്ത്രി വ്യക്തമാക്കി.
ടീം അംഗങ്ങളെ ഓരോരുത്തരെയും തനിച്ച് കണ്ട് സംസാരിച്ച ശേഷമാണ് ആർക്കൊക്കെ സംരക്ഷണം വേണമെന്ന് അധികൃതർ തീരുമാനിച്ചത്. കുടുംബത്തെ ഓർത്ത് ആശങ്കയുള്ളതിനാൽ ചിലർ മടങ്ങിപ്പോകാൻ തീരുമാനിച്ചപ്പോൾ മറ്റു ചിലർ ഓസ്ട്രേലിയയിൽ പുതിയ ജീവിതം തുടങ്ങാൻ ആഗ്രഹം പ്രകടിപ്പിക്കുകയായിരുന്നു. ഇവർക്ക് സ്ഥിരതാമസത്തിനുള്ള വിസ നൽകുന്ന നടപടികൾ സർക്കാർ ഉടൻ തന്നെ ആരംഭിക്കും.
