റിലയൻസ് ജിയോ ഇന്ത്യയിലെ കൂടുതൽ നഗരങ്ങളിലേക്ക് 5-ജി സേവനം ലഭ്യമാക്കുന്നു. ബംഗളൂരുവിലും ഹൈദരാബാദിലും ഇപ്പോൾ 5-ജി സേവനം ലഭ്യമാണെന്ന് ടെലികോം കമ്പനി അറിയിച്ചു. ദസറയോടനുബന്ധിച്ച് നേരത്തെ തിരഞ്ഞെടുത്ത നഗരങ്ങളിൽ ജിയോ ട്രൂ 5-ജി സേവനങ്ങളുടെ ബീറ്റാ ലോഞ്ച് പ്രഖ്യാപിച്ചിരുന്നു. ഇതിനു പിന്നാലെയാണ് രാജ്യത്തെ ഏറ്റവും വലിയ ടെലികോം ഓപ്പറേറ്ററുടെ അപ്ഡേറ്റ് ഏകദേശം ഒരു മാസത്തിനു ശേഷം എത്തുന്നത്.
മുംബൈ, ദില്ലി, കൊൽക്കത്ത, ചെന്നൈ, വാരാണസി എന്നിവിടങ്ങളിലാണ് ആദ്യം 5-ജി ആരംഭിച്ചത്. പിന്നീട് രാജസ്ഥാനിലെ നാഥ്ദ്വാരയിൽ ജിയോ 5-ജി സേവനങ്ങൾ ആരംഭിച്ചു. ബംഗളൂരുവിലും ഹൈദരാബാദിലും സേവനങ്ങൾ ലഭിക്കണമെങ്കിൽ ജിയോ ഉപയോക്താക്കൾക്ക് ‘ജിയോ വെൽക്കം ഓഫറിന്റെ’ ഇൻവൈറ്റ് ലഭിക്കാൻ കാത്തിരിക്കേണ്ടിവരും. യോഗ്യരായ ഉപയോക്താക്കൾക്ക് 500 Mbps മുതൽ 1 Gbps വരെ വേഗതയാണ് ജിയോ വാഗ്ദാനം ചെയ്യുന്നത്. നിലവിൽ, ഉപയോഗത്തിന് പരിമിതികളൊന്നുമില്ല.
യോഗ്യരായ ജിയോ ഉപയോക്താക്കൾക്ക് ഒന്നുകിൽ കമ്പനിയുടെ മൈ ജിയോ ആപ്പിൽ നിന്ന് ഒരു എസ്എംഎസ് അല്ലെങ്കിൽ നോട്ടിഫിക്കേഷൻ ലഭിക്കും. അതിൽ ജിയോ 5-ജി വെൽക്കം ഓഫറും അത് എങ്ങനെ ഉപയോഗിക്കാം എന്നതിനെ കുറിച്ചുള്ള മറ്റ് വിശദാംശങ്ങളും ഉൾപ്പെടും. ക്ഷണം ലഭിക്കുന്ന ആളുകൾക്ക് 5-ജി ആക്സസ് ചെയ്യുന്നതിന് പുതിയ സിം വാങ്ങേണ്ടതില്ല. ഉപയോക്താക്കൾക്ക് നിലവിലുള്ള അവരുടെ ഫോണുകളിൽ 5-ജി ഉപയോഗിക്കാൻ കഴിയുമെന്നും കമ്പനി സ്ഥിരീകരിച്ചു.
