ഭീകരസംഘടനയിലേക്ക് യുവാക്കളെ റിക്രൂട്ട് ചെയ്യുന്ന സംഘം ജമ്മുകാശ്മീരില്‍ പിടിയില്‍. സുരക്ഷാസേനക്ക് ലഭിച്ച രഹസ്യവിവരത്തെ തുടര്‍ന്ന് കുൽഗാം ജില്ലയില്‍ നടത്തിയ പരിശോധനയിലാണ് സംഘം പിടിയിലായത്. ഗവേഷകവിദ്യാർഥി ഉള്‍പ്പെടെയുള്ളവരാണ് സൈന്യത്തിനു മുന്നില്‍ കീഴടങ്ങിയത്.
കശ്മീർ സർവകലാശാലയിലെ പിഎച്ച്ഡി ഗവേഷകൻ കൂടിയായ സബീൽ ഉള്‍പ്പടെയുള്ളവരെയാണ് സൈന്യം അറസ്റ്റ് ചെയ്തത്. യുവാക്കളെ ഭീകരസംഘടനയിലേക്ക് റിക്രൂട്ട് ചെയ്യുന്ന സംഘം കുൽഗാം കേന്ദ്രീകരിച്ചു പ്രവർത്തിക്കുന്നതായി ലഭിച്ച രഹസ്യവിവരത്തെ തുടര്‍ന്ന് നടത്തിയ പരിശോധനയില്‍ സുരക്ഷാസേന ഇയാളെ പിടികൂടുകയായിരുന്നു. സബീലില്‍ നിന്നും ലഭിച്ച മൊഴിയുടെ അടിസ്ഥാനത്തിലാണ് മറ്റ് രണ്ട് ഭീകരരെ സേന അറസ്റ്റ് ചെയ്തത്.
ആശയങ്ങൾ പ്രചരിപ്പിച്ച് സബീൽ, യുവാക്കളെ റിക്രൂട്ട് ചെയ്യുകയും ഭീകരർക്ക് ഇയാൾ ആയുധങ്ങൾ എത്തിച്ചുനൽകാറുണ്ടെന്നും സുരക്ഷാസേന വ്യക്തമാക്കി. ഭീകരവാദപ്രവർത്തനങ്ങൾക്കായി സബീൽ വിദേശത്തു നിന്നും ഫണ്ട് സമാഹരിക്കാറുണ്ടെന്നും കണ്ടെത്തിയിട്ടുണ്ട്. സഹപാഠികളായ പെൺകുട്ടികളെയടക്കം ഇയാൾ ഭീകരസംഘടനയിലേക്ക് റിക്രൂട്ട് ചെയ്തിട്ടുണ്ടെന്നാണ് വിവരം.
