അഫ്ഗാനിസ്ഥനില്‍ നീതി ഉറപ്പാക്കാനും, സ്വാതന്ത്ര്യം സംരക്ഷിക്കാനും ഇസ്ലാമിക നിയമങ്ങള്‍ നടപ്പിലാക്കുമെന്ന് താലിബാന്‍ പരമോന്നത നേതാവ്. രാജ്യത്ത് നിന്നും അധിനിവേശ ശക്തികളെ പുറത്താക്കി ഇസ്ലാമിക നിയമങ്ങള്‍ നടപ്പിലാക്കുക മതപണ്ഡിതരുടെ ഉത്തരവാദിത്തമാണെന്നും മുല്ല ഹിബത്തുള്ള അഖുന്ദ്സാദ പറഞ്ഞു. രാജ്യത്തെ മതനേതാക്കളുടെയും മുതിര്‍ന്നവരുടെയും സമ്മേളനത്തെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം.
നീതിയുടെ അഭാവത്തില്‍ ഒരു സര്‍ക്കാരിനും അതിജീവിക്കാന്‍ കഴിയില്ല, നീതിയാണ് സര്‍ക്കാരിന്റെ ആയുധം. അയല്‍ രാജ്യങ്ങള്‍ക്ക് ഞങ്ങളില്‍ നിന്ന് ഒരു ദോഷവും ഉണ്ടാകില്ല. അഫ്ഗാന് ആരോടും ദുരുദ്ദേശമില്ലെന്നും അദ്ദേഹം വ്യക്തമാക്കി. രാജ്യത്ത് നിക്ഷേപം നടത്താന്‍ വ്യവസായികളോട് ഹിബത്തുള്ള ആഹ്വാനം ചെയ്തു. മൂന്ന് ദിവസത്തെ മഹാസമ്മേളനത്തില്‍ പങ്കെടുക്കാന്‍ രാജ്യത്തെമ്പാടുനിന്നും ഏകദേശം 3,500 മതപണ്ഡിതന്മാരെയും മുതിര്‍ന്നവരെയും ക്ഷണിച്ചിട്ടുണ്ട്.
മൂന്ന് ദിവസത്തെ സംഗമം ശനിയാഴ്ച സമാപിക്കും. രാജ്യത്ത് താലിബാന്‍ പുനഃസ്ഥാപിക്കപ്പെട്ട് പതിനൊന്ന് മാസങ്ങള്‍ക്ക് ശേഷം, ഇസ്ലാമിക പുരോഹിതരുടെ രാജ്യവ്യാപകമായ ആദ്യ സമ്മേളനമാണിത്. സംഭവം റിപ്പോര്‍ട്ട് ചെയ്യാന്‍ മാധ്യമങ്ങളെ അനുവദിച്ചിട്ടില്ല, എന്നാല്‍ പെണ്‍കുട്ടികളുടെ വിദ്യാഭ്യാസം ഉള്‍പ്പെടെ നിരവധി വിഷയങ്ങള്‍ നിയമസഭയില്‍ ചര്‍ച്ച ചെയ്യപ്പെടുമെന്ന് വൃത്തങ്ങള്‍ അറിയിച്ചു.
