രണ്ടാം നരേന്ദ്ര മോദി സര്‍ക്കാരിന്റെ കാലത്ത് കൊണ്ടുവന്ന അഗ്നിപഥ് പദ്ധതിയില്‍ കാതലായ മാറ്റങ്ങള്‍ വരുത്താന്‍ പദ്ധതി. മൂന്നാം മോദി സര്‍ക്കാര്‍ അധികാരത്തില്‍ വന്നശേഷം ഇക്കാര്യത്തില്‍ തീരുമാനമുണ്ടായേക്കും. അഗ്നിപഥ് പദ്ധതി പുനഃപരിശോധിക്കണമെന്ന് എന്‍ഡിഎ ഘടകകക്ഷികളായ ജെഡിയു ലോക് ജനശക്തി പാര്‍ട്ടി ബിജെപിയോട് ആവശ്യപ്പെട്ടിട്ടുണ്ട്.
നിലവിലെ പദ്ധതി പ്രകാരം നാല് വര്‍ഷത്തെ സേവനത്തിന് ശേഷം മികവ് പുലര്‍ത്തുന്ന 25 ശതമാനം പേര്‍ക്ക് 15 വര്‍ഷത്തേക്ക് നിയമനം നല്‍കും. എന്നാല്‍ 75 ശതമാനം പേര്‍ക്കും സേന വിടേണ്ടിവരും. ജോലി സ്ഥിരതയില്ലാത്ത ഈ സംവിധാനത്തിനെതിരെ വ്യാപക വിമര്‍ശനം ഉയര്‍ന്നിരുന്നു. ഇതേത്തുടര്‍ന്നാണ് മുഴുവന്‍ അഗ്‌നിവീര്‍മാര്‍ക്കും 15 വര്‍ഷത്തേക്ക് നിയമനം നല്‍കുന്ന കാര്യം പരിഗണിക്കുന്നത്.
നിലവില്‍ അഗ്‌നിവീര്‍മാര്‍ സൈനിക ജോലിക്കിടെ മരിക്കുകയോ, പരിക്കേല്‍ക്കുകയോ ചെയ്താല്‍ മറ്റ് സൈനികര്‍ക്ക് ലഭിക്കുന്ന അതെ സാമ്പത്തിക സഹായം ലഭിക്കില്ല. ഈ വിവേചനം ഒഴിവാക്കണം എന്ന ആവശ്യം ശക്തമായി ഉയര്‍ന്നിരുന്നു. ഇക്കാര്യത്തിലും സര്‍ക്കാര്‍ അനുകൂലമായ തീരുമാനം എടുത്തേക്കും എന്നാണ് സൂചന. അഗ്നിപഥ് പദ്ധതി നടപ്പാക്കിയതിന് ശേഷം സൈനിക വിഭാഗങ്ങളിലെ സ്ഥിരം സൈനികരുടെ എണ്ണം കുറഞ്ഞുവരികയാണ്. ഈ പ്രതിസന്ധി മറികടക്കാന്‍ പുതിയ പരിഷ്‌കാരങ്ങള്‍ കൊണ്ടുവരാനാണ് സര്‍ക്കാര്‍ ആലോചിക്കുന്നത്.
