പ്രതിപക്ഷമായ കോണ്‍ഗ്രസിന്റെയും ജെഡിഎസിന്റെയും എതിര്‍പ്പുകള്‍ക്കിടയില്‍ കര്‍ണാടക നിയമസഭയുടെ ഉപരിസഭ വിവാദമായ ‘മതമാറ്റ വിരുദ്ധ ബില്‍’ പാസാക്കി. കഴിഞ്ഞ ഡിസംബറില്‍ ‘കര്‍ണാടക മതസ്വാതന്ത്ര്യത്തിനുള്ള അവകാശ സംരക്ഷണ ബില്‍’ നിയമസഭ പാസാക്കിയിരുന്നു. ഭരണകക്ഷിയായ ഭാരതീയ ജനതാ പാര്‍ട്ടിക്ക് (ബിജെപി) ഭൂരിപക്ഷം കുറവായിരുന്നതിനാല്‍, ബില്‍ നിയമനിര്‍മ്മാണ കൗണ്‍സിലില്‍ പാസാക്കാന്‍ സര്‍ക്കാര്‍ ഈ വര്‍ഷം മേയില്‍ ഒരു ഓര്‍ഡിനന്‍സ് പുറപ്പെടുവിച്ചിരുന്നു.
വ്യാഴാഴ്ച ഉപരിസഭയുടെ പരിഗണനയ്ക്കായി ആഭ്യന്തരമന്ത്രി അരഗ ജ്ഞാനേന്ദ്ര ബില്‍ അവതരിപ്പിച്ചു. അടുത്ത കാലത്തായി മതപരിവര്‍ത്തനം വ്യാപകമായതായി ചൂണ്ടിക്കാട്ടിയ അദ്ദേഹം, വശീകരണത്തിലൂടെയും ബലപ്രയോഗത്തിലൂടെയും, സമാധാനം തകര്‍ക്കുകയും വിവിധ മതങ്ങള്‍ പിന്തുടരുന്ന ആളുകള്‍ക്കിടയില്‍ അവിശ്വാസത്തിലേക്ക് നയിക്കുകയും ചെയ്യുന്ന സംഭവങ്ങള്‍ വ്യാപകമാണെന്ന് ചൂണ്ടിക്കാട്ടി. ബില്‍ ആരുടെയും മതസ്വാതന്ത്ര്യം ഇല്ലാതാക്കുന്നില്ലെന്നും ആര്‍ക്കും ഇഷ്ടമുള്ള മതം ആചരിക്കാമെന്നും എന്നാല്‍ സമ്മര്‍ദത്തിലൂടെയും പ്രലോഭിപ്പിച്ചും അത് പാടില്ലെന്നും ജ്ഞാനേന്ദ്ര പറഞ്ഞു.
ഗവര്‍ണറുടെ അനുമതിക്ക് ശേഷം, ഓര്‍ഡിനന്‍സ് പ്രഖ്യാപിച്ച തീയതിയായ 2022 മെയ് 17 മുതല്‍ നിയമം പ്രാബല്യത്തില്‍ വരും. പ്രോ-ടേം ചെയര്‍മാന്‍ രഘുനാഥ് റാവു മല്‍ക്കാപുരെ ബില്‍ വോട്ടിനിടാനിരിക്കെ നിയമസഭാ കൗണ്‍സിലിലെ പ്രതിപക്ഷ നേതാവ് ബി കെ ഹരിപ്രസാദ് പ്രതിഷേധ സൂചകമായി ബില്ലിന്റെ പകര്‍പ്പ് വലിച്ചുകീറി പ്രതിഷേധിച്ചു. ഇത്തരമൊരു നിയമം പാസാക്കുന്ന രാജ്യത്തെ പത്താമത്തെ സംസ്ഥാനമാണിത്.
പുതിയ ബില്‍
തെറ്റായി ചിത്രീകരിക്കല്‍, ബലപ്രയോഗം, അനാവശ്യ സ്വാധീനം, ബലപ്രയോഗം, വശീകരിക്കല്‍, വഞ്ചനാപരമായ മാര്‍ഗങ്ങള്‍ അല്ലെങ്കില്‍ ഇവയിലേതെങ്കിലുമൊന്ന് ഉപയോഗിച്ച് വ്യക്തിയെ നേരിട്ടോ അല്ലാതെയോ ഒരു മതത്തില്‍ നിന്ന് മറ്റൊരു മതത്തിലേക്ക് പരിവര്‍ത്തനം ചെയ്യുകയോ പരിവര്‍ത്തനം ചെയ്യാന്‍ ശ്രമിക്കുകയോ ചെയ്യരുത്. വിവാഹ വാഗ്ദാനം വഴിയോ, ഏതെങ്കിലും വ്യക്തി അത്തരം മതപരിവര്‍ത്തനത്തിന് പ്രേരിപ്പിക്കുകയോ ഗൂഢാലോചന നടത്തുകയോ ചെയ്യരുത്. എന്നാല്‍, ആരെങ്കിലും തന്റെ തൊട്ടുമുന്‍പത്തെ മതത്തിലേക്ക് വീണ്ടും പരിവര്‍ത്തനം ചെയ്താല്‍, അത് ഈ നിയമപ്രകാരം ഒരു പരിവര്‍ത്തനമായി കണക്കാക്കില്ല.
