ഇടതുപക്ഷ ചായ്‌വുള്ള സംഘടനകൾ ട്രംപ് വിരുദ്ധ പ്രതിഷേധങ്ങളുമായി യു എസിലുടനീളമുള്ള തെരുവുകളിലിറങ്ങി. ആയിരത്തിലധികം പേരാണ് തെരുവുകളിൽ പ്രതിഷേധവുമായി ഇറങ്ങിയത്. ട്രംപ് വൈറ്റ് ഹൗസില്‍ തിരിച്ചെത്തിയതിനു ശേഷമുള്ള ഏറ്റവും വലിയ പ്രതിഷേധമാണ് ഇത്. അദ്ദേഹത്തിന്റെ നയങ്ങള്‍ക്കതിരെയുള്ള പ്രകടനമാണ് ഇന്നലെ ജനങ്ങൾ നടത്തിയത്.
മൂടിക്കെട്ടിയ കാലാവസ്ഥയിൽ, യുക്രൈൻ അധിനിവേശത്തിനിടയിലും റഷ്യയുമായി സൗഹാർദപരമായ ബന്ധം തേടുന്ന ഭരണകൂടത്തിന്റെ നയങ്ങളോടുള്ള എതിർപ്പ് പ്രതിഷേധത്തിൽ പ്രകടമായിരുന്നു. സർക്കാർ ജീവനക്കാരുടെ എണ്ണം കുറയ്ക്കൽ മുതൽ വ്യാപാര താരിഫ് കുറയ്ക്കൽ, പൗരസ്വാതന്ത്ര്യത്തെ ഇല്ലാതാക്കൽ വരെ പ്രതിഷേധത്തിനു കാരണമായി. പ്രതിഷേധക്കാർ പ്ലക്കാർഡുകളും യുക്രേനിയൻ പതാകകളുമേന്തിയാണ് എത്തിയത്. “ഹാൻഡ്സ് ഓഫ്” എന്ന് വിളിക്കപ്പെടുന്ന പ്രതിഷേധ ദിനത്തിനു പിന്നിലെ സംഘടനകളിലൊന്നായ മൂവ്ഓണും ഡസൻ കണക്കിന് തൊഴിലാളി, പരിസ്ഥിതി, മറ്റ് പുരോഗമന ഗ്രൂപ്പുകൾ എന്നിവരും റാലിയിൽ പങ്കുചേർന്നു.
50 സംസ്ഥാനങ്ങളിലെ 1200 ലധികം സ്ഥലങ്ങളിലാണ് പ്രതിഷേധങ്ങൾ സംഘടിപ്പിച്ചത്. പൗരാവകാശ സംഘടനകൾ, തൊഴിലാളി യൂണിയനുകൾ, LGBTQ+ അഭിഭാഷകർ, തിരഞ്ഞെടുപ്പ് പ്രവർത്തകർ എന്നിവരുൾപ്പെടെ 150 ലധികം ഗ്രൂപ്പുകൾ റാലികളെ പിന്തുണച്ചു. വാഷിംഗ്ടൺ, ന്യൂയോർക്ക്, ഹ്യൂസ്റ്റൺ, ഫ്ലോറിഡ, കൊളറാഡോ, ലോസ് ഏഞ്ചൽസ് തുടങ്ങി മറ്റ് സ്ഥലങ്ങളിലും റാലി നടത്തി.
