ഡെമോക്രാറ്റിക് റിപ്പബ്ലിക് ഓഫ് കോംഗോ (DRC) ഫ്രാൻസിലും ബെൽജിയത്തിലുമുള്ള ടെക്നോളോജിക്കൽ കമ്പനിയായ ആപ്പിളിന്റെ അനുബന്ധ സ്ഥാപനങ്ങൾക്കെതിരെ ക്രിമിനൽ പരാതികൾ ഫയൽ ചെയ്തു. ഡി. ആർ. കോംഗോയുടെ കിഴക്കുഭാഗത്തുള്ള ചില ഖനികൾ നിയന്ത്രിക്കുന്ന സായുധസംഘങ്ങൾ നടത്തുന്ന കുറ്റകൃത്യങ്ങളിൽ ആപ്പിൾ പങ്കാളിയാണെന്ന് കോംഗോ സർക്കാരിനുവേണ്ടി സമർപ്പിച്ച പരാതികളിൽ ആരോപിക്കുന്നു. എന്നാൽ, ധാതുക്കളുടെ ‘ഉത്തരവാദിത്തപരമായ ഉറവിടത്തിൽ ആഴത്തിൽ പ്രതിജ്ഞാബദ്ധമാണ്’ എന്ന് പ്രസ്താവിച്ചുകൊണ്ട് ആപ്പിൾ ഈ അവകാശവാദങ്ങളെ ശക്തമായി എതിർത്തു.
സംഘട്ടനമേഖലകളിൽനിന്ന് എടുത്ത ടിൻ, ടാന്റലം, ടങ്സ്റ്റൺ എന്നിവയുൾപ്പെടെയുള്ള ‘ബ്ലഡ് മിനറൽസ്’ കൊണ്ട് ആപ്പിളിന്റെ വിതരണശൃംഖല മലിനമായതായി ഡി. ആർ. കോംഗോയുടെ അഭിഭാഷകർ ആരോപിച്ചു. ഈ ധാതുക്കൾ പിന്നീട് ‘അന്താരാഷ്ട്ര വിതരണശൃംഖലകളിലൂടെ വെളുപ്പിക്കപ്പെടുന്നു’ എന്ന് അവർ അവകാശപ്പെടുന്നു. ഇത് മിലിഷ്യകൾക്കും തീവ്രവാദ ഗ്രൂപ്പുകൾക്കും ധനസഹായം നൽകുന്നതിലൂടെ അക്രമത്തിനും സംഘട്ടനത്തിനും ആക്കം കൂട്ടുന്നു എന്നും അവർ പറഞ്ഞു. നിർബന്ധിത ബാലവേലയ്ക്കും പാരിസ്ഥിതിക നാശത്തിനുമുള്ള സംഭാവനകളും ആരോപണങ്ങളിൽ ഉൾപ്പെടുന്നു.
ആപ്പിൾ തങ്ങളുടെ വിതരണക്കാരെ വ്യവസായത്തിലെ ഏറ്റവും ഉയർന്ന നിലവാരത്തിൽ നിർത്തുന്നുവെന്ന് പ്രസ്താവിച്ചുകൊണ്ട് ആരോപണങ്ങൾ നിരസിച്ചു. ഡി. ആർ. സി. യിൽനിന്നും റുവാണ്ടയിൽനിന്നും സോഴ്‌സിംഗ് ടിൻ, ടാന്റലം, ടങ്സ്റ്റൺ, സ്വർണ്ണം എന്നിവ താൽക്കാലികമായി നിർത്തിവയ്ക്കാൻ വിതരണക്കാരെ അറിയിച്ച് ഈ വർഷം ആദ്യം നടപടി സ്വീകരിച്ചതായി കമ്പനി അവകാശപ്പെടുന്നു. സ്വതന്ത്ര ഓഡിറ്റർമാർക്കോ, വ്യവസായ സർട്ടിഫിക്കേഷൻ സംവിധാനങ്ങൾക്കോ ആവശ്യമായ ജാഗ്രത പാലിക്കാൻ ഇനി സാധ്യമല്ലെന്ന ആശങ്കയെ തുടർന്നാണ് ഈ നടപടി സ്വീകരിച്ചതെന്ന് ആപ്പിൾ വ്യക്തമാക്കി.
ഡി. ആർ. കോംഗോയുടെ കിഴക്കൻ ഭാഗങ്ങൾ ധാതുക്കളുടെ ഒരു പ്രധാന സ്രോതസ്സാണ്. ഈ ധാതുക്കളുടെ ആഗോള ആവശ്യം പതിറ്റാണ്ടുകളായി ഈ മേഖലയിൽ യുദ്ധങ്ങൾക്ക് ആക്കം കൂട്ടി. നിയമാനുസൃതമായ ഖനികളിൽനിന്നും സായുധസംഘങ്ങൾ നടത്തുന്ന സൗകര്യങ്ങളിൽനിന്നുമുള്ള വലിയ അളവിലുള്ള ധാതുക്കൾ അയൽരാജ്യമായ റുവാണ്ടയിലേക്കു കൊണ്ടുപോകുകയും ഒടുവിൽ ഫോണുകളും കമ്പ്യൂട്ടറുകളും പോലുള്ള ഉപഭോക്തൃ ഇലക്ട്രോണിക്സ് ഉപകരണങ്ങളുടെ നിർമാണത്തിനായി ഉപയോഗിക്കുന്നുവെന്നും നാളുകൾക്കു മുൻപേ ആരോപണങ്ങളുണ്ട്.
