ഏകദിന ലോകകപ്പിലെ വിജയത്തിനുപിന്നാലെ ഓസ്‌ട്രേലിയൻ ഓൾ റൗണ്ടർ മിച്ചൽ മാർഷിനെതിരെ പ്രതിഷേധം ശക്തമാകുന്നു. ലോകകപ്പ് ട്രോഫിയിൽ കാലുയർത്തിവച്ച ചിത്രങ്ങള്‍ ഓസ്‌ട്രേലിയൻ താരം പങ്കുവച്ചതിനു പിന്നാലെയാണ് കിക്കറ്റ് ആരാധകര്‍ പ്രതിഷേധവുമായി രംഗത്തെത്തിയത്. ലോകകപ്പ് ട്രോഫിയോട് അല്പം ആദരവ് കാണിക്കാമെന്നാണ് സോഷ്യൽ മീഡിയയിൽ ഉയർന്ന പ്രധാന വിമർശനം.
ഞായറാഴ്ച അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ, ആറു വിക്കറ്റിനാണ് ഓസ്‌ട്രേലിയ ഇന്ത്യയെ പരാജയപ്പെടുത്തി തങ്ങളുടെ ആറാം ഏകദിന ലോകകപ്പ് നേടിയത്. വിജയാഘോഷങ്ങള്‍ക്കുപിന്നാലെ ഡ്രെസിംഗ് റൂമില്‍വച്ച് ലോകകപ്പ് ട്രോഫിയിൽ കാല്‍വച്ചിരിക്കുന്ന മാര്‍ഷിന്റെ ചിത്രം സാമൂഹികമാധ്യമത്തില്‍ പങ്കുവയ്ക്കുകയായിരുന്നു. ഇതിനുപിന്നാലെയാണ് അദ്ദേഹത്തിനെതിരെ രൂക്ഷവിമർശനങ്ങൾ ഉയർന്നത്.
അതേസമയം, തുടർച്ചയായ 10 വിജയങ്ങൾക്കുശേഷം ഫെെനലിലെത്തിയ ഇന്ത്യയ്ക്കായിരുന്നു ടൂർണമെൻ്റിൽ കപ്പ് സ്വന്തമാക്കാൻ ഏറ്റവും കൂടതൽ സാധ്യത കല്പിച്ചിരുന്നത്. പക്ഷേ, ഓസ്‌ട്രേലിയന്‍ താരം ട്രാവിസ് ഹെഡിന്റെ സെഞ്ച്വറിയോടെ ഇന്ത്യയുടെ മോഹങ്ങൾ ഓസ്‌ട്രേലിയ തല്ലിക്കെടുത്തുകയായിരുന്നു.
