സംസ്ഥാനത്ത് ഓട്ടാറിക്ഷ-ടാക്‌സി യാത്രാനിരക്ക് വര്‍ധിപ്പിക്കാന്‍ ശിപാര്‍ശ. ഓട്ടോ മിനിമം ചാര്‍ജ് 25 രൂപയില്‍നിന്ന് 30 ആക്കി വര്‍ധിപ്പിക്കാനാണു ജസ്റ്റിസ് രാമചന്ദ്രന്‍ കമ്മറ്റിയുടെ ശിപാര്‍ശ. മിനിമം ദൂരത്തിനുശേഷമുള്ള ഒരു കിലോമീറ്ററിനും നിരക്ക് 12 രൂപയില്‍നിന്നു പതിനഞ്ചായി വര്‍ധിപ്പിക്കാനും കമ്മിറ്റി ശിപാര്‍ശ ചെയ്തു.
ചാര്‍ജ് വര്‍ധന സംബന്ധിച്ച് ജസ്റ്റിസ് രാമചന്ദ്രന്‍ കമ്മറ്റിയുമായി ഗതാഗത മന്ത്രി ആന്റണി രാജു ചര്‍ച്ച നടത്തി. ചാര്‍ജ് വര്‍ധന സംബന്ധിച്ച് സര്‍ക്കാര്‍ നിയോഗിച്ച ജസ്റ്റിസ് രാമചന്ദ്രന്‍ കമ്മിറ്റി ബന്ധപ്പെട്ടവരുമായി മൂന്ന് ചര്‍ച്ച നടത്തിയതിനുശേഷമാണു ശുപാര്‍ശ സമര്‍പ്പിച്ചത്.
നിലവിലെ ഭീമമായ ഇന്ധന വിലയുടെ അടിസ്ഥാനത്തില്‍ ഓട്ടോ-ടാക്‌സി ചാര്‍ജ്ജ് വര്‍ധന അനിവാര്യമാണെന്ന വാഹന ഉടമകളുടെയും യൂണിയനുകളുടെയും ആവശ്യം ന്യായമാണെന്നാണ് ചര്‍ച്ചയില്‍ പൊതുവായി ഉണ്ടായ ധാരണയെന്ന് മന്ത്രി പറഞ്ഞു.
ഓട്ടോ യാത്രാ നിരക്കിന്റെ കാര്യത്തില്‍ കോര്‍പറേഷന്‍, മുനിസിപ്പാലിറ്റി പരിധിക്ക് പുറത്ത് 50 ശതമാനം അധിക നിരക്കും രാത്രികാല യാത്രയില്‍ നഗരപരിധിയില്‍ 50 ശതമാനം അധികനിരക്കും നില നിര്‍ത്തണമെന്നു കമ്മിറ്റി നിര്‍ദേശിച്ചു. വെയ്റ്റിങ്ങ് ചാര്‍ജ്ജ് 15 മിനിറ്റിന് 10 രൂപ എന്നത് നിലവില്‍ ഉള്ളതുപോലെ തുടരുവാനാണ് കമ്മറ്റിയുടെ ശിപാര്‍ശ.
1500 സിസിയില്‍ താഴെയുള്ള ടാക്‌സി കാറുകള്‍ക്ക് മിനിമം ചാര്‍ജ് 175 രൂപയില്‍ നിന്ന് 210 ആയും കിലോമീറ്റര്‍ ചാര്‍ജ് 15 രൂപയില്‍ നിന്ന് 18 രൂപയായും വര്‍ധിപ്പിക്കാന്‍ കമ്മിറ്റി ശിപാര്‍ശ ചെയ്തു.
1500 സിസിയില്‍ അധികമുള്ള ടാക്‌സി കാറുകള്‍ക്ക് മിനിമം ചാര്‍ജ് 200 രൂപയില്‍നിന്ന് 240 ആയും കിലോമീറ്റര്‍ നിരക്ക് 17 രൂപയില്‍നിന്ന് 20 ആയും വര്‍ധിപ്പിക്കാനും കമ്മറ്റി ശിപാര്‍ശ ചെയ്തു. വെയ്റ്റിങ് ചാര്‍ജ് നിലവിലുള്ളതുപോലെ മണിക്കൂറിന് 50 രൂപയായും ഒരു ദിവസം പരമാവധി 500 രൂപയായും നിലനിര്‍ത്തണമെന്നും ശിപാര്‍ശ ചെയ്തു.
