രാജ്യത്ത് അടുത്ത നാല് ദിവസം ബാങ്കുകള്‍ അടഞ്ഞ് കിടക്കും. നാളെ മുതല്‍ നാല് ദിവസമാണ് ബാങ്കുകള്‍ അടഞ്ഞുകിടക്കുക. ശനി, ഞായര്‍ അവധി ദിവസങ്ങളും പിന്നീടുള്ള രണ്ട് ദിവസം ട്രേഡ് യൂണിയനുകളുടെ സംയുക്ത പണിമുടക്കില്‍ ബാങ്ക് ജീവനക്കാരും അണിചേരുന്നതാണ് കാരണം. ഓണ്‍ലൈന്‍ ഇടപാടുകളെ സമരം ബാധിക്കാനിടയില്ല. എന്നാല്‍ നേരിട്ട് ബാങ്കില്‍ ചെല്ലേണ്ടവര്‍ക്കും, ഓണ്‍ലൈന്‍ ഇടപാട് പരിചയമില്ലാത്ത ഉപഭോക്താക്കളെയും ബാങ്കുകള്‍ അടഞ്ഞുകിടക്കുന്നത് സാരമായി ബാധിക്കും.
മാര്‍ച്ച് 28, 29 തീയതികളിലാണ് അഖിലേന്ത്യാ പൊതുപണിമുടക്ക്. ബാങ്ക് ജീവനക്കാരുടെ പ്രധാന സംഘടനകളുടെ സംയുക്ത കൂട്ടായ്മയായ യുണൈറ്റഡ് ഫെഡറേഷന്‍ ഓഫ് ബാങ്ക് യൂണിയന്‍ പ്രതിഷേധത്തിന് പിന്തുണ പ്രഖ്യാപിച്ചിട്ടുണ്ട്. ബാങ്ക് സ്വകാര്യവത്കരണം, പുറം കരാര്‍ തുടങ്ങിയവ ഉപേക്ഷിക്കുക, നിക്ഷേപ പലിശ വര്‍ദ്ധിപ്പിക്കുക, കിട്ടാക്കടങ്ങള്‍ തിരിച്ചുപിടിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് ബാങ്ക് ജീവനക്കാര്‍ അഖിലേന്ത്യാ പണിമുടക്കില്‍ അണിചേരുന്നത്.
നാലു ദിവസത്തെ അവധി കഴിഞ്ഞാല്‍ രണ്ടു പ്രവര്‍ത്തി ദിനത്തിനുശേഷം (30, 31) വീണ്ടും ബാങ്ക് അവധിയാണ്. ഏപ്രില്‍ ഒന്നിന് വാര്‍ഷിക കണക്കൈടുപ്പ് നടക്കുന്നതിനാലാണ് അവധി. അതായത്, അടുത്തയാഴ്ച ആകെ ബാങ്ക് പ്രവര്‍ത്തി ദിനം മൂന്നു ദിവസം മാത്രം. ഈ സാമ്പത്തികവര്‍ഷത്തില്‍ ഇനി രണ്ടു പ്രവര്‍ത്തിദിനം മാത്രമാണ് ബാങ്കിനുള്ളത്.
