നീളൻ താടിയും ഗൗരവ ഭാവവുമായി ഗോൾ വല വിറപ്പിച്ചിരുന്ന ഫ്രാൻസ് ഫുട്‌ബോൾ താരത്തെ രാജ്യന്തര ജേഴ്സിയിൽ ഇനി കാണാൻ കഴിയില്ല. കരിം ബെൻസേമ എന്ന സമർത്ഥനായ ആ താരം അന്താരാഷ്ട്ര ഫുട്ബോളിൽ നിന്ന് വിരമിച്ചു. മുപ്പത്തഞ്ചാം പിറന്നാൾ ആഘോഷ വേളയിലാണ് താരത്തിന്റെ വിരമിക്കൽ പ്രഖ്യാപനം.
ഖത്തർ ലോകകപ്പില്‍ ബെൻസേമയ്ക്ക് ടീമിൽ ഇടം ലഭിച്ചിരുന്നെങ്കിലും ഫ്രഞ്ച് സൂപ്പർ താരം കളത്തിനു പുറത്തായിരുന്നു. പരിക്കിനെ തുടർന്നായിരുന്നു ഇത്. നേരത്തെ, ലോകകപ്പ് ഫൈനല്‍ കാണാനുള്ള ഫ്രഞ്ച് പ്രസിഡന്‍റിന്‍റെ ക്ഷണവും ബെന്‍സേമ നിരസിച്ചിരുന്നു. പരിക്ക് ഭേദമായിട്ടും ബെൻസെമയെ പരിശീലകൻ ടീമിലേക്ക് തിരിച്ചുവിളിക്കാത്തതിലെ നീരസം കാരണമാണ് ഈ പിന്മാറ്റമെന്നായിരുന്നു റിപ്പോർട്ടുകൾ. ഫ്രാൻസിനായി 97 മത്സരങ്ങളിൽ നിന്ന് 37 ഗോളുകളാണ് ബെൻസേമയുടെ ബൂട്ടുകളില്‍ നിന്നുള്ള സമ്പാദ്യം.
അതേ സമയം അന്താരാഷ്ട്ര ഫുട്ബോളിൽ നിന്നും ബെൻസേമ പിന്മാറിയെങ്കിലും റയൽ മാഡ്രിഡിന് വേണ്ടി താരം കളി തുടരും. കഴിഞ്ഞയാഴ്ച താരം റയൽ മാഡ്രിഡിനായി സൗഹൃദ മത്സരം കളിച്ചിരുന്നു.
