പ്രസിഡന്റ് ബഷാർ അൽ അസദിനെ സ്ഥാനഭ്രഷ്ടനാക്കിയതിനുശേഷം ഡമാസ്കസിന്റെ പ്രാന്തപ്രദേശത്തുള്ള ഒരു സൈനിക ആശുപത്രിയുടെ മോർച്ചറിയിൽ ക്രൂരമായ പീഡനത്തിന്റെ അടയാളങ്ങളുള്ള 40 ഓളം മൃതദേഹങ്ങൾ കണ്ടെത്തിയതായി വെളിപ്പെടുത്തി സിറിയൻ വിമത പോരാളികൾ. തിങ്കളാഴ്ച ഹരസ്ത ആശുപത്രിയിലെ മോർച്ചറി മുറിയിൽ രക്തം പുരണ്ട വെളുത്ത മൂടുപടം കൊണ്ട് പൊതിഞ്ഞ മൃതദേഹങ്ങളുടെ ചിത്രങ്ങളും ഇവർ പുറത്തുവിട്ടു.
നിരവധി മൃതദേഹങ്ങൾക്ക് മുഖത്തും ശരീരത്തും മുറിവുകളും ചതവുകളും ഉണ്ടായിരുന്നു. നമ്പറുകളും പേരുകളും വഹിക്കുന്ന പശ ടേപ്പ് കഷണങ്ങളും മൃതദേഹങ്ങളും ദൃശ്യമായിരുന്നു. “ഞാൻ സ്വന്തം കൈകളാൽ മോർച്ചറിയുടെ വാതിൽ തുറന്നു. അതൊരു ഭയാനകമായ കാഴ്ചയായിരുന്നു” – തെക്കൻ സിറിയയിൽനിന്നുള്ള ഒരു വിമതഗ്രൂപ്പിലെ അംഗമായ മുഹമ്മദ് അൽ ഹജ്ജ് എ. എഫ്. പി. വാർത്താ ഏജൻസിയോടു പറഞ്ഞു.
മൃതദേഹങ്ങൾ അവിടെ ഉപേക്ഷിക്കുന്നതായി ഒരു സ്റ്റാഫ് അംഗത്തിൽനിന്ന് വിവരം ലഭിച്ചതിനെ തുടർന്നാണ് വിമതർ ആശുപത്രിയിൽ പോയതെന്ന് അദ്ദേഹം പറഞ്ഞു. “ഞങ്ങൾ കണ്ടെത്തിയതിനെക്കുറിച്ച് ഞങ്ങൾ (വിമത) സൈനിക കമാൻഡിനെ അറിയിക്കുകയും സിറിയൻ റെഡ് ക്രസന്റുമായി ഏകോപിപ്പിക്കുകയും ചെയ്തു. അവർ മൃതദേഹങ്ങൾ ഡമാസ്കസ് ആശുപത്രിയിലേക്കു കൊണ്ടുപോയി. അങ്ങനെ കുടുംബങ്ങൾക്ക് വന്ന് അവരെ തിരിച്ചറിയാൻ കഴിയും.” മൃതദേഹങ്ങൾ എത്ര നാളായി മോർച്ചറിയിൽ സൂക്ഷിച്ചിരുന്നുവെന്ന് വ്യക്തമല്ലെങ്കിലും അവ അഴുകലിന്റെ വിവിധ ഘട്ടങ്ങളിലായിരുന്നു.
അസദ് സർക്കാരിന്റെ ജയിലുകളിൽ 60,000 ത്തോളം ആളുകൾ പീഡിപ്പിക്കപ്പെടുകയും കൊല്ലപ്പെടുകയും ചെയ്തതായി യു. കെ. ആസ്ഥാനമായുള്ള മോണിറ്ററിംഗ് ഗ്രൂപ്പായ സിറിയൻ ഒബ്സർവേറ്ററി ഫോർ ഹ്യൂമൻ റൈറ്റ്സ് പറയുന്നു. ആഭ്യന്തരയുദ്ധത്തിനു കാരണമായ 2011 ലെ ജനാധിപത്യ അനുകൂല പ്രതിഷേധങ്ങൾക്കെതിരെ ക്രൂരമായ അടിച്ചമർത്തലിന് അസദ് ഉത്തരവിട്ടതിനുശേഷം ഒരുലക്ഷത്തിലധികം ആളുകളെ കാണാതായതായി മനുഷ്യാവകാശ ഗ്രൂപ്പുകൾ പറയുന്നു.
