ഗാസയിലെ വെടിനിര്‍ത്തലിന്റെ കാര്യത്തില്‍ ഇസ്രയേലും ഹമാസും തമ്മിലുള്ള ഭിന്നതകള്‍ കുറയുകയാണെന്നും കരാറിനുള്ള സാധ്യതയേറെയാണെന്നും യു.എസ്. വിദേശകാര്യ സെക്രട്ടറി ആന്റണി ബ്ലിങ്കന്‍ പറഞ്ഞു. പശ്ചിമേഷ്യാ സന്ദര്‍ശനത്തിന്റെ ഭാഗമായി ബുധനാഴ്ച സൗദി അറേബ്യയിലെത്തിയ ബ്ലിങ്കന്‍, ‘അല്‍-ഹദത്’ ചാനലിനു നല്‍കിയ അഭിമുഖത്തിലാണ് ഈ പ്രതീക്ഷ പ്രകടിപ്പിച്ചത്. വെടിനിര്‍ത്തലിനായി യു.എസും ഈജിപ്തും ഖത്തറും ആഴ്ചകളായി കഠിനശ്രമത്തിലാണ്.
ഗാസയുടെ അയല്‍രാജ്യമായ ഈജിപ്തില്‍ വ്യാഴാഴ്ചയെത്തിയ ബ്ലിങ്കന്‍, പ്രസിഡന്റ് അബ്ദെല്‍ ഫത്ത അല്‍ സിസി, വിദേശകാര്യമന്ത്രി സമേഹ് ഷൗക്രി എന്നിവരുമായി ഗാസയിലെ സ്ഥിതിഗതികള്‍ ചര്‍ച്ചചെയ്തു. ഈജിപ്തുവഴിയാണ് പ്രധാനമായും ഗാസയിലേക്ക് അവശ്യവസ്തുക്കള്‍ ചെല്ലുന്നത്.
