രാജ്യത്ത് ആദ്യമായി ഒരു സംസ്ഥാന സര്‍ക്കാരിന്റെ നിയന്ത്രണത്തിലുള്ള ഒ.ടി.ടി പ്ലാറ്റ്‌ഫോം ഇന്ന് ഉദ്ഘാടനം ചെയ്യും. സി- സ്‌പേസ് എന്ന പേരിട്ടിരിക്കുന്ന പ്ലാറ്റ്‌ഫോം മുഖ്യമന്ത്രി പിണറായി വിജയന്‍ ഇന്ന് രാവിലെ 9. 30 ന് കൈരളി തിയറ്ററില്‍ വച്ച് ജനങ്ങള്‍ക്ക് സമര്‍പ്പിക്കും.
കെ.എസ്ഡി.എഫ്.സി ക്കാണ് സി- സ്‌പേസിന്റെ നിര്‍വഹണ ചുമതല. പ്ലാറ്റ്‌ഫോമിലേക്കുള്ള സിനിമകള്‍ തെരഞ്ഞെടുക്കുന്നതിനായി 60 അംഗ ക്യുറേറ്റര്‍ സമിതി രൂപീകരിച്ചിട്ടുണ്ട്. ഇവര്‍ ശുപാര്‍ശ ചെയ്യുന്ന സിനിമകള്‍ മാത്രമേ സി- സ്‌പേസില്‍ പ്രദര്‍ശിപ്പിക്കൂ.
ആദ്യഘട്ടത്തിലേക്ക് 42 സിനിമകള്‍ തെരഞ്ഞെടുത്തിട്ടുണ്ട്. 35 ഫീച്ചര്‍ ഫിലിമുകളും ആറ് ഡോക്യുമെന്ററികളും ഒരു ഹ്രസ്വചിത്രവുമാണ് തിരഞ്ഞെടുത്തിരിക്കുന്നത്. കാണുന്ന സിനിമയ്ക്ക് മാത്രം പണം ഈടാക്കുന്ന ആദ്യ ഒ.ടി.ടി പ്ലാറ്റ്‌ഫോം കൂടിയാവും സി- സ്‌പേസ്. ഈടാക്കുന്ന തുകയുടെ പകുതി ലാഭവിഹിതമായി പ്രൊഡ്യൂസര്‍ക്ക് നല്‍കും. പ്ലേ സ്റ്റോര്‍, ആപ്പ് സ്റ്റോര്‍ എന്നിവ വഴി സി- സ്‌പേസ് ഡൗണ്‍ലോഡ് ചെയ്യാനാകും.
