പ്രേക്ഷക പ്രീതിയും നിരൂപകരുടെ പ്രശംസയും ഏറ്റു വാങ്ങിയ ചിത്രമാണ് ദുല്‍ഖര്‍ സല്‍മാന്‍ നായകനായ ‘ചുപ്പ്’. നെഗറ്റിവ് റോളില്‍ ഉള്ള വേഷം ഗംഭീരമാക്കിയ നടന്‍ പ്രേക്ഷകരുടെ കൈയ്യടി നേടിയിരുന്നു. ചിത്രത്തിലെ അഭിനയത്തിന് മികച്ച നടനുള്ള ദാദ സാഹിബ് ഫാല്‍ക്കേ ഇന്റര്‍നാഷണല്‍ ഫിലിം ഫെസ്റ്റിവല്‍ പുരസ്‌കാരം സ്വന്തമാക്കിയിരിക്കുകയാണ് ദുല്‍ഖര്‍.
മലയാളത്തിലെ അഭിനേതാക്കളില്‍ ആദ്യമായി ഈ അവാര്‍ഡ് ലഭിക്കുന്നത് ദുല്‍ഖര്‍ സല്‍മാനാണ്. ആര്‍ ബല്‍കി രചനയും സംവിധാനവും നിര്‍വ്വഹിച്ച ‘ചുപ്പ്’ സൈക്കോളജിക്കല്‍ ത്രില്ലര്‍ വിഭാഗത്തില്‍ പെടുന്നതാണ്. സണ്ണി ഡിയോള്‍ ആണ് ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിച്ചത്. ദുല്‍ഖറിന്റെ മൂന്നാമത്തെ ബോളിവുഡ് ചിത്രമായിരുന്നു ഇത്.
പൂകൃഷി ഉപജീവനമാക്കിയ ഡാനി എന്ന നിഗൂഢതകളുള്ള ഒരു കഥാപാത്രമാണ് ചിത്രത്തില്‍ ദുല്‍ഖറിന്റേത്. പ്രേക്ഷകരുടെ കണ്ണില്‍ പ്രതിച്ഛായാ ഭാരമില്ലാത്ത ഒരാളായിരിക്കണം ഡാനിയെ അവതരിപ്പിക്കേണ്ടതെന്ന് താന്‍ തീരുമാനിച്ചിരുന്നതായി സംവിധായകന്‍ ആര്‍ ബല്‍കി നേരത്തെ പറഞ്ഞിരുന്നു. ദുല്‍ഖറിന്റെ വേഫേറെര്‍ ഫിലിംസ് ആണ് കേരളത്തില്‍ ചുപ്പ് വിതരണത്തിനെത്തിച്ചത്.
