ദക്ഷിണ കൊറിയയിൽ നടന്ന കായിക മത്സരത്തിൽ ഹിജാബ് ധരിക്കാതെ പങ്കെടുത്തതിന്റെ പേരിൽ വിമർശനത്തിനിരയായ ഇറാനിയൻ കായികതാരം വിശദീകരണവുമായി രംഗത്തെത്തി. മത്സരത്തിനിടെ ധരിച്ചിരുന്ന ഹിജാബ് താഴെ പോയത് ശ്രദ്ധിച്ചിരുന്നില്ല എന്നാണ് എൽനാസ് റെഖാബി വെളിപ്പെടുത്തുന്നത്. തന്റെ ട്വിറ്റർ അക്കൗണ്ടിലൂടെയാണ് എൽനാസ് ഇക്കാര്യം വെളിപ്പെടുത്തിയത്.
“മോശം സമയവും, അപ്രതീക്ഷിതമായി ക്ലയിംബിങ്ങിനു വിളിച്ചതും മൂലം എന്റെ തല മറച്ചത് അശ്രദ്ധമായി പോയി”- എന്നത് താരം ട്വിറ്ററിൽ കുറിച്ചത്. ഒപ്പം എല്ലാവരെയും വിഷമിപ്പിച്ചതിൽ ക്ഷമാപണവും നടത്തിയിരുന്നു. ദക്ഷിണ കൊറിയയിൽ നടന്ന ഏഷ്യൻ ചാമ്പ്യൻഷിപ്പിൽ എൽനാസ് റെക്കാബി ഹിജാബ് ധരിക്കാതെ മത്സരത്തിൽ പങ്കെടുത്ത ദൃശ്യങ്ങൾ ഇറാനിലെ ഹിജാബ് വിരുദ്ധ പ്രതിഷേധക്കാരാണ് പ്രചരിപ്പിച്ചത്. തങ്ങളുടെ പ്രതിഷേധങ്ങൾക്കു ഉള്ള അനുകൂല പ്രകടനമായിട്ടാണ് അവർ ഹിജാബ് ധരിക്കാതെ ഇറങ്ങിയ എൽനാസിന്റെ ദൃശ്യങ്ങൾ പ്രചരിപ്പിച്ചുകൊണ്ട് ചൂണ്ടിക്കാട്ടിയത്.
ഇതേ തുടർന്ന് ഇറാൻ സോളിലെ മത്സരവേദിയിൽ നിന്ന് എൽനാസിനെ തിരിച്ചുവിളിപ്പിച്ചു. ബുധനാഴ്ച രാവിലെ നേരം പുലരുന്നതിന് മുമ്പ്, അവൾ ടെഹ്‌റാനിലേക്ക് തിരിച്ചെത്തിയിരുന്നു. ഇവിടെ വലിയ ആൾക്കൂട്ടമായിരുന്നു ഇവരെ സ്വീകരിക്കാൻ ഉണ്ടായിരുന്നത്. എന്നാൽ അതിനു ശേഷം താരം എവിടെയാണെന്ന് പലർക്കും അറിയില്ല.
