സംസ്ഥാനത്തെ എസ്എസ്എൽസി, ഹയർ സെക്കണ്ടറി പരീക്ഷയുടെ തീയതികൾ പ്രഖ്യപിച്ച് വിദ്യാഭ്യാസ വകുപ്പ് മന്ത്രി വി ശിവൻകുട്ടി. മാധ്യമങ്ങൾക്ക് നൽകിയ വാർത്താ സമ്മേളനത്തിലാണ് ഇത് സംബന്ധിച്ച പ്രഖ്യാപനം മന്ത്രി നടത്തിയത്. ഈ വർഷം നാലരലക്ഷം വിദ്യാർത്ഥികളാണ് എസ്എസ്എൽസി പരീക്ഷക്കായി ഒരുങ്ങുന്നത്.
പത്താം ക്ലാസ് പരീക്ഷ മാർച്ച് ഒമ്പത് മുതൽ 29 വരെയും ഹയർസെക്കണ്ടറി വോക്കേഷണൽ ഹയർസെക്കണ്ടറി പരീക്ഷകൾ മാർച്ച് 10 മുതൽ 30 വരെയും നടത്തുവാനാണ് വിദ്യാഭ്യാസ വകുപ്പിൻറെ തീരുമാനം. മെയ് പത്തിനുള്ളിൽ ഫലപ്രഖ്യാപനം നടത്തും. എസ്എസ്എൽസി പരീക്ഷക്ക് മുന്നോടിയായുള്ള മോഡൽ പരീക്ഷകൾ ഫെബ്രുവരി 27ന് ആരംഭിച്ച് മാർച്ച് മൂന്നിന് ആവസാനിക്കും. ഫെബ്രുവരി ഒന്ന് മുതൽ പ്ലസ് വൺ, പ്ലസ് ടു വിദ്യാർത്ഥികളുടെ പ്രയോഗിക പരീക്ഷകൾ ആരംഭിക്കുമെന്നും വിദ്യാഭ്യാസ മന്ത്രി വാർത്താസമ്മേളനത്തിൽ അറിയിച്ചു.
